މިއަހަރު ރާއްޖެއިން ހައްޖަށްދާ ހައްޖާޖީންގެ އެންމެ ފަހު ފްލައިޓު ފުރައިފިއެވެ.

ރާއްޖެއިން ހައްޖަށްދާ މީހުންގެ ފަހު ފްލައިޓު ފުރާފައިވަނީ ހޯމަ ދުވަހުގެ މެންދުރު 3:10 ގައެވެ. މޯލްޑިވްސް ޙައްޖު ކޯޕަރޭޝަން ލިމިޓެޑްގެ ޙަވާލުގައި މި ފްލައިޓުން 288 ޙައްޖުވެރިން ފުރިއެވެ.

ޙައްޖާޖީންގެ ފުރަތަމަ ފްލައިޓު ރާއްޖެއިން ފުރީ މިމަހުގެ 12ވީ ބުދަ ދުވަހުއެވެ. އޭގެ ފަހުން މިމަހުގެ 13، 15، 16 އަދި 19 ވަނަދުވަހުގެ ފްލައިޓްތަކުންވެސް ޙައްޖުވެރިންވަނީ ފުރާފައެވެ.

އެންމެ ފަހު ފްލައިޓުން ޙައްޖައްދިޔަ ޙައްޖުވެރިންނާ އެއަރޕޯޓުން މިއަދު ބައްދަލުކުރައްވައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙްވަނީ ޢަލްވަދާޢު ވިދާޅުވެފައެވެ.

މިއަހަރު އަމީރުލް ޙައްޖުގެ ގޮތުގައި ރައީސުލްޖުމްހޫރިއްޔާ ކަނޑައަޅުއްވާފައިވަނީ، ރައީސުލްޖުމްހޫރިއްޔާގެ ނާއިބު ފައިޞަލް ނަސީމެވެ.