8 އަހަރުގެ ހަނގުރާމައަށްފަހު ޔަމަނުގެ ފުރަތަމަ ޙައްޖު ފްލައިޓް ޖިއްދާއަށް

އާރާއި ބާރުގެ ދަހިވެތިކަމުގައި އުފެދޭ ދެބަސްވުންތައް ހޫނުވަމުން ގޮސް ހަނގުރާމައަކަށް ބަދަލުވާ އިރު، އެކަމުގެ އެންމެ ހިތި ރަހަ ތަޖުރިބާ ކުރަން ޖެހޭ ބަޔަކަށް ވަނީ، ކަމާ ނުވެސް ބެހި ތިބި ބައެކެވެ. ދިރިއުޅުމުގެ މައިދާނުގައި ކުރިމަތިލާން ޖެހިދާނެއޭވެސް ހީ ނުކުރާ ފަދަ އެތައް ކަމަކާ ކުރިމަތިލާން ޖެހި، އެތައް ޙައްޤަކުން މަޚްރޫމުވާން މަޖުބޫރު ވަނީ، ބަދަލުވަމުންދާ އާރާއި ބާރުގެ ތެރެއިން ޒާތީ ފައިދާއެއްގެ ޒައްރެއްގެ މިންވަރުވެސް ލިބުން ނާދިރު މީހުންނަށެވެ. އެތައް އަހަރަކަށް ދިގުލާ ގޮސްފައި ވާ ހަނގުރާމައެއްގައި ހަފުސްވެފައި ވާ ޔަމަނުގެ ރަށްވެހިންނަކީ އެފަދަ ހާލެއްގައި ތިބި ބައެކެވެ.

އަސާސީ ޙައްޤުތަކުން މަޚްރޫމުވެ، ދީނީ އަޅުކަން އަދާ ކުރެވެން އޮތް ލުއިފަސޭހަ މަގުތައް ބަންދުވެފައި އޮތް އެތައް ދުވަހެއް ތަޙައްމަލު ކޮށްފިއެވެ. ރޭގަނޑަކަށް ފަހު ފަތިހަށް އަލި ވިލޭ ފަދައިން، ޔަމަނުގެ މަސްރަޙަށްވެސް ކޮންމެވެސް ބަދަލުތަކެއް މި ވަނީ އަންނަން ފަށާފައެވެ. މި އަހަރަކީ ޔަމަނުގައި ހަނގުރާމަ ފެށި ފަހުން ފުރަތަމަ ފަހަރަށް، ޙައްޖުގެ މަތިވެރިކަން އަޅުކަން އަދާ ކުރުމަށް، ޔަމަނުގެ ވެރިރަށް ސަންއާއިން ސީދާ ފްލައިޓެއް ފުރި ފުރަތަމަ އަހަރެވެ.

1444 ވަނަ އަހަރުގެ ޙައްޖުގެ އަޅުކަމަށް ޔަމަނުން ސަޢުދީ އަރަބިއްޔާއަށް ދާ ޙައްޖާޖުން ގޮވައިގެން ސަންއާއިން ފްލައިޓް އުދުއްސާލީ ޖޫން 17 ވީ ހޮނިހިރު ދުވަހުއެވެ.

އީރާނުގެ ތާޢީދާއެކު ހަރަކާތްތެރިވާ ހޫޘީ ހަނގުރާމަވެރިން، ސަންއާގެ ކޮންޓްރޯލް ނަގާ، 2014 ވަނަ އަހަރު ޔަމަނުގައި އޮތް ސަރުކާރު ވައްތާލި ފަހުން، ޔަމަނުގެ ވައިގެ ސަރަޙައްދު ކޮނޓްރޯލް ކުރަމުން ދަނީ ސަޢުދީ އަރަބިއްޔާ އިސްވެ އޮވެ، އެކުލަވާލާފައި ވާ ބައިނަލްއަޤުވާމީ އަސްކަރީ ކޯލިޝަނުންނެވެ. ޔަމަން އެއަރވޭޒްއިން ދާދި ފަހުން ވަނީ، މިއަހަރުގެ ޙައްޖު މޫސުމާ ދިމާކޮށް ސަންއާއިން ސަޢުދީގެ ޖިއްދާއަށް ސީދާ ދަތުރު އުސޫލުން 4 ފްލައިޓެއް އެޅުމަށް، ސަޢުދީއާއެކު އެއްބަސްވުމަކަށް އައިސްފައެވެ. ސަންއާގެ ކޮންޓްރޯލް އަދިވެސް އޮތީ ހޫޘީންގެ އަތުގައި ކަމަށް ވާ އިރު، ހުރުމަތްތެރިވެގެންވާ މައްކާއާ އެންމެ ކައިރިން ޔަމަނުގައި އެއަރޕޯޓެއް އޮންނަނީވެސް ސަންއާގައެވެ.

ޙައްޖުގެ މަތިވެރި އަޅުކަމަށް ފުރުމުގެ މިނެއް ނެތް އުފަލާއެކު، ސީދާ އުފަން ފަސްގަނޑުން ޙައްޖުގެ އަޅުކަމަށް ފުރޭ ކަމީ ޔަމަނުގެ ޙައްޖާޖުން މިއަދު އިންތިހާއަށް އުފާ ކުރާ ކަމެކެވެ.

މެއި 2022 އަށް ފަހު، ސަންއާއިން އުދުއްސާލާފައި ވަނީ ކޮމަރޝަލް އުސޫލުން އުދުހޭ އެންމެ ފްލައިޓެކެވެ. އެއީ ސަންއާއިން އުރުދުންގެ އައްމާނަށް ކުރި ދަތުރެކެވެ. އޭގެ ކުރިން، ސަންއާއަށް ޖައްސާ، އަދި ސަންއާއިން އުދުއްސާ ހަދަން ހުއްދަ ދީފައި ވަނީ އދއިން އޮޕަރޭޓް ކުރާ ފްލައިޓްތަކަށް އެކަންޏެވެ.

ޔަމަނުގައި އުފެދުނީ ދާޚިލީ ނުތަނަވަސް ކަމެއް ކަމަކު، އެ ނުތަނަވަސްކަމުގައި ހަނގުރާމައިގެ އަނދިރި ކުލަތައް ޖެހިގެން ދިޔައީ ސަރަޙައްދީ ތަފާތު ފިކުރުތަކުގެ ދެބަސްވުންތަކާ މަސްހުނިވި ހިސާބުންނެވެ. ޔަމަނުގައި ދިގުލާ ގޮސްފައި ވާ ހަނގުރާމައަށް ސުލްޙަވެރި ޙައްލެއް ހޯދުމަށް ކުރިއަށް ގެންދާ މަޝްވަރާތަކަށް މިހާރު ވަނީ ހިސާބެއްގެ ކުރިއެރުމެއްވެސް ލިބިފައެވެ. އެއީ އީރާނާއި ސަޢުދީ އަރަބިއްޔާއާ ދެމެދު އުފެދިފައި ވާ ދެބަސްވުންތަކަށް ދޫ ދިނުމަށް، އެ ދެ ޤައުމުން މި އަހަރުގެ މަރޗް މަހު އެއްބަސްވުމަކަށް އައި ހިސާބުންނެވެ. ސަޢުދީއާއި އީރާނުގެ ދެބަސްވުންތަކަކީ، ސަރަޙައްދީ ފެންވަރުގެ ނުތަނަވަސް ކަމެކެވެ.