މަޖިލީހުގައި މަރުތަޅު އެޅުވުން: ރައީސުލްޖުމްހޫރިއްޔާއަށް ލިބިވަޑައިގަންނަވާފައިވާ ބާރުތައް ބޭނުންކުރެއްވުމަށް ޝަރީފް ގޮވާލައްވައިފި
ދައުލަތުގެ ޒިންމާދާރު މަގާމުތަކުގައި ތިއްބެވި އެއްވެސް ބޭފުޅަކަށް ހިތުހުރި ގޮތަކަށް ގާނޫނުގެ ބާރު ކަނޑުވާލާ ދައުލަތުގެ އެއްވެސް މުއައްސަސާއެއް ހިސޯރު ކުރުމުގެ ފުރުސަތު ދެވިގެން ނުވާނެ
މަރަދޫ ދާއިރާގެ މެންބަރު އިބްރާހީމް ޝަރީފް
މަޖިލީހުގައި މަރުތަޅު އަޅުވާފައިވާ މައްސަލައިގައި ރައީސުލްޖުމްހޫރިއްޔާއަށް ގާނޫނު އަސާސީން ލިބިވަޑައިގަންނަވާފައިވާ ބާރުތައް ބޭނުންކުރެއްވުމަށް މަރަދޫ ދާއިރާގެ މެންބަރު އިބްރާހީމް ޝަރީފް ގޮވާލައްވައިފިއެވެ.
މަޖިލިސް މަރުތަޅު އަޅުވާފައިވާ މައްސަލައާއި ގުޅިގެން މެންބަރު ޝަރީފް ކުރެއްވި ޓްވީޓްތަކެއްގައި ވިދާޅުވީ ރައްޔިތުންގެ މަޖިލީހުގައި މަރުތަޅު އެޅުވުމުގެ ފުރުސަތު އެއްވެސް ފަރާތަކަށް ދެވިގެން ނުވާނެ ކަމަށެވެ. އަދި މިހިސާބަށް ކަންކަން ދިއުމުން ދައުލަތުގެ އެންމެ އިސްވެރިޔާ ގާނޫނު އަސާސީގެ 115 ވަނަ މާއްދާގެ ދަށުން ފިޔަވަޅު އަޅުއްވަންޖެހޭ ހިސާބަށް ކަންކަން ގޮސްފައިވާ ކަމަށެވެ.
ގާނޫނު އަސާސީގެ 115 ވަނަ މާއްދާއަކީ ރައީސުލްޖުމްހޫރިއްޔާގެ ބާރުތަކާއި މަސްއޫލިއްޔަތުތަކެވެ. މި މާއްދާގައި ރައީސުލްޖުމްހޫރިއްޔާއަށް ލިބިވަޑައިގަންނަވާ ބާރުތަކުގެ ތެރޭގައި މި މާއްދާގެ އިތުރުން ގާނޫނު އަސާސީގެ އެހެނިހެން މާއްދާތަކުގައްޔާއި ގާނޫނުގައި ކަނޑައަޅައި ބަޔާންކޮށްފައިވާ ކަންތައްތަކުގެ އިތުރުން ގާނޫނުގެ ވެރިކަން ކުރިއަރުވައި، އެންމެންގެ ހައްގުތަކާއި މިނިވަންކަން ރައްކާތެރިކުރުން ހިމެނެއެވެ.
ޝަރީފް ވިދާޅުވީ 50 މެންބަރުން ސޮއިކުރައްވާ ނަޝީދުގެ އިތުބާރު ނެތްކަމަށް ހުށަހެޅުމުން ގަދަބާރުން ގާނޫނާއި ހިލާފަށް މަޖިލީހުގެ ރައީސްގެ މަގާމުގައި ނަޝީދު ދެމިހުންނަވާތީ، މަޖިލީހުގެ ރައީސްއަކަށް އޮންނަ ހުރިހާ އިނާޔަތެއް ކަނޑާލަން ޖެހޭ ކަމަށެވެ. އަދި މަގާމުގައި އިތުރަށް ދެމިހުންނެވުމުގެ އެއްވެސް ހައްގެއް ނެތް ކަމަށް ވެސް ޝަރީފް ވިދާޅުވިއެވެ.
ޝަރީފް ވިދާޅުވީ ދައުލަތުގެ އެހެން މުއައްސަސާތަކުގެ ވެރިން ވެސް މަޖިލީހުގެ ރައީސް މުހައްމަދު ނަޝީދު މަޖިލިސް ހިސޯރުކުރެއްވި ގޮތަށް ކަން ކުރައްވަން ފައްޓަވައިފިނަމަ، ނުކުމެދާނެ ނަތީޖާ އެއް ހިތްޕުޅަށް ގެންނަވަން އުނދަގޫ ކަމަށެވެ. މުޅި ނިޒާމު ބޮއްސުންލައި ގާނޫނުގެ ވެރިކަމެއް ނޯންނާނެ ކަމަށާއި، އެއްވެސް މީހަކު މަޖިލިސް ހިސޯރުކުރުމަށް ދޫނުކުރެވޭނެ ކަމަށް އޭނާ ވިދާޅުވިއެވެ.
އަދި އިތުބާރު ނެތްކަމުގެ މައްސަލައެއް ހުށަހެޅުމުން މަޖިލިސް ހިސޯރުކޮށް ގާނޫނު އަސާސީގެ ބާރު ކަނޑުވާލުމުގެ ފުރުސަތެއް ނަޝީދަށް ދެވިއްޖެނަމަ ދައުލަތުގެ އެހެން ވެރިންނަށްވެސް އެ ފުރުސަތު ފަހިވެގެން ނުދާންވީ ސަބަބެއް ނެތް ކަމަށާއި، މިީ ވަރަށް ނުރައްކާތެރި ކަމެއް ކަމަށް ޝަރީފް ވިދާޅުވިއެވެ.
ޝަރީފް ވިދާޅުވީ ދައުލަތުގެ ޒިންމާދާރު މަގާމުތަކުގައި ތިއްބެވި އެއްވެސް ބޭފުޅަކަށް ހިތުހުރި ގޮތަކަށް ގާނޫނުގެ ބާރު ކަނޑުވާލައި ދައުލަތުގެ އެއްވެސް މުއައްސަސާއެއް ހިސޯރު ކުރުމުގެ ފުރުސަތު ދެވިގެން ނުވާނެ ކަމަށެވެ. އަދި ނަޝީދުއާއި ބައިވެރިން ވަނީ ގާނޫނުގެ ބާރު ކަނޑުވާލާ މަޖިލިސް ހިސޯރުކޮށްފައި ކަމަށް ޝަރީފް ވިދާޅުވިއެވެ.
