ޤަރުނަކަށްވުރެ ޒަމާންވީ ޢާއިލީ އޮޑިހަރު ގޭގައި އިލްޔާސް ހުރީ އަދިވެސް ދޫދޭ ގޮތަކަށް ނޫން!

ލުބްނާންގެ އައްސޭރިފަށުގެ ސިޓީއެއް ކަމަށްވާ ޞޫރުގައި ބޯޓު ބަނުމުގެ މަސައްކަތުގައި އުޅޭ އިލްޔާސް ބަރްބޫރު، ކޮންމެ ދުވަހެއްގެ މަސައްކަތް ފަށަނީ އޭނާގެ އަމިއްލަ ޖަނަރޭޓަރު ހިންގައިގަތުމާ އެކީގައެވެ. އެއީ ބޯޓު ބަނުމުގެ މަސައްކަތަށް ބޭނުންވާ ލަކުޑި ކަނޑާ، އެކި ގޮތްގޮތަށް އެ ލަކުޑި ކަނޑާއި ކޮށާއި މަށާ ހެދުމުގެ މަސައްކަތަށް ކޮންމެހެންވެސް ބޭނުން ކަމެކެވެ.

އިލްޔާސްއާއި އޭނާގެ އެއްބަނޑު އެއްބަފާ ތިން ބެއިންނަށް، ބޯޓު ބަނުމުގެ މަސައްކަތަކީ ވާރުތަވި މަސައްކަތެކެވެ. ކާފަގެ ފަރާތުން ބައްޕައަށެވެ. ބައްޕަގެ ފަރާތުން އެ ހަތަރު ބެއިންނަށެވެ. އިލްޔާސްގެ ޢާއިލާއިން ޞޫރުގައި ބޯޓު ބަންނަން އޮޑިހަރު ގެއެއް އެންމެ ފުރަތަމަ ހުޅުވީ 1905 ވަނަ އަހަރުއެވެ.

މިހާރު ޢުމުރުން 60 އަހަރު ފުރިފައި ވާ އިލްޔާސްގެ ހަނދާނުގެ ޞަފްޙާތަކަށް ނަޒަރު ހިންގާ އިރު، ފަތު އަޑު ގޮއްވާލާފައި ޢާއިލީ ވިޔަފާރި ކުރިއަރަމުން ދިޔަ ދުވަސްވަރުގެ ހަނދާންތައް އަދިވެސް ތާޒާއެވެ. އޮޑިހަރުގެއަކީ މިއަދު އިލްޔާސްއަށް އާމްދަނީ ލިބޭ ހަމަ އެކަނި މަސްދަރަށް ވީ ނަމަވެސް، ލުބްނާނަށް ކުރިމަތިލާން ޖެހިފައިވާ މާލީ ކާރިޘާގެ ސަބަބުން، އުފުލަން ޖެހިފައި ވާ ތަކުލީފުތައް މިއަދު ގިނަގުނައެވެ.

ކޮންމެ ގޮތަކަށް ކަން އޮތް ކަމުގައި ވީ ނަމަވެސް އިލްޔާސް ހުރީ ޢުއްމީދު ކަނޑާލާ ގޮތަކަށް ނޫނެވެ. އޭނާ ޤަބޫލު ކުރާ ގޮތުގައި އެ މަސައްކަތަކީ "ޞޫރުގެ ތަރިކަ"އެކެވެ.

އިލްޔާސްގެ އޮޑިހަރުގޭގެ ބޭރުގައި އޮތް ބަނދަރު ސަރަޙައްދުގައި މަސްވެރިންތައް އަވަދިނެތި އުޅެމުން ދިޔައެވެ. އެއްބަޔަކު، އެމީހުންގެ ބޯޓުފަހަރު މަރާމާތު ކުރުމުގެ މަސައްކަތުގައެވެ. މަސް ދާގަނޑުތަކުގައި އެޅިފައިވާ ބާގަނޑުތައް ބެއްދުމުގެ މަސައްކަތުގައި އަނެއް ބަޔަކު ފަރުވާތެރިކަމާއެކު ޝާމިލުވެތިއްބެވެ.

އިމާދު އަލް ޒޫޒޫއަކީ މަސްވެރިކަމުގައި 40 އަށް ވުރެ ގިނަ އަހަރު ދުވަސް ހޭދަ ކޮށްފައި ވާ މީހެކެވެ. އޭނާގެ އެކުވެރިޔަކާ އެކު 2 ހިއްސާ ކުރާ މަސްބޯޓެއްވެސް ގެންގުޅޭ މީހެކެވެ. އިމާދު ބުނި ގޮތުގައި މީގެ ކުރިން 7 ޑޮލަރަށް ލިބުނު މަސް ދާގަނޑެއްގެ އަގު، މިހާރު ވަނީ 28 ޑޮލަރަށް އަރާފައެވެ.

މުޅި ޞޫރު ސަރަޙައްދަށް ބަލާ އިރުވެސް، ލަކުޑިން ބޯޓު ބަނުމުގެ މަސައްކަތުގައި ޝާމިލުވެ އުޅެނީ އެ ޢާއިލާއަކަށް އިލްޔާސް ނިސްބަތްވާ ބަރްބޫރުގެ ޢާއިލާއިންނެވެ. ޞޫރަކީ އެންމެ އިހުގެ ޤާދީމީ ވައްޓަފާޅިއަށް ބޯޓު ބަނުމުގެ މަސައްކަތް، މެޑިޓަރޭނިއަން ސަރަޙައްދުގައި ކުރަމުން ދާ ހަމަ އެކަނި ސިޓީއެވެ. ބޮޑެތި ގޮންޖެހުންތަކަކާ ކުރިމަތިލާން ޖެހިފައި ވާ އޮތެއް ކަމަކު، އިލްޔާސްގެ ޢާއިލާއިން ދަނީ އެ މަސައްކަތުގައި ދެމި ތިބެވޭތޯ މަސައްކަތް ކުރަމުންނެވެ.