ބަޔަކު ރަހީނުކުރި މައްސަލައާ ގުޅިގެން ހައްޔަރުކުރި އެކަކު 15 ދުވަހަށް ބަންދު، ކުޑަކުއްޖާ އާއިލާއާ ޙަވާލުކޮށްފި

ދިވެހިންތަކެއް ރަހީނުކުރި މައްސަލައާ ގުޅިގެން ހައްޔަރުކުރި މީހުންގެ ބަންދުގެ މުއްދަތު ޖަހައިފިއެވެ.

ފުލުހުން ބުނީ ހެންވޭރު އަބަދަށް އުފާ މަގުގައި ހުރި ގެއެއްގައި ބަޔަކު ރަހީނުކޮށްފައި ތިބި ކަމަށް ފުލުހުންނަށް މައުލޫމާތު ލިބިފައި ވަނީ ހޮނިހިރު ދުވަހު ކަމަށެވެ.

Advertisement

ބަޔަކު ރަހީނުކޮށްފައި ތިބި ކަމަށް އެ އިދާރާ އަށް މައުލޫމާތު ލިބުމާއި ގުޅިގެން ފުލުހުން އެ މައްސަލަ ބަލައި، މީހުން ރަހީނުކޮށްފައި ބައިތިއްބާފައި ތިބި ގޭގެ ތެރެއަށް ވަދެފައި ވަނީ ބާރުގެ ބޭނުންކޮށްގެން ކަމަށް ފުލުހުން ވަނީ ބުނެފައެވެ.

ފުލުހުން ބުނީ ރަހީނުކޮށްފައި ވަނީ ދިވެހި 3 ފިރިހެނުން ކަމަށާއި އެ ތިން މީހުން ވެސް މިހާރު ސަލާމަތްކޮށްފައިވާ ކަމަށެވެ. އަދި އެ މީހުންނަށް އެކިވަރުގެ އަނިޔާތައް ކޮށްފައިވާ ކަމަށް ވެސް ފުލުހުން ވަނީ ބުނެފައެވެ.

އެ ތިން މީހުންނަށް ސިއްޙީ ފަރުވާ ދިނުމަށްޓަކައި އައިޖީއެމްއެޗް ހޮސްޕިޓަލަށް ވަނީ ގެންގޮސްފައެވެ.

މި މައްސަލައިގައި މިހާތަނަށް ހައްޔަރުކުރި މީހުންގެ ތެރޭގައި އުމުރުން 18 އަހަރުން ދަށުގެ ކުޑަ ފިރިހެން ކުއްޖެއް ހިމެނެއެވެ. މި މައްސަލަ އާއި ގުޅިގެން އިތުރު ދިވެހި ފިރިހެނެއް ވެސް ހައްޔަރުކޮށްފައިވެއެވެ.

ފުލުހުން ބުނީ، މި މައްސަލައާ ގުޅިގެން ހައްޔަރު ކުރި އެކަކުގެ ބަންދަށް 15 ދުވަސް ކްރިމިނަލް ކޯޓުން ދީފައިވާ ކަމަށެވެ.

އަދި މި މައްސަލައާ ގުޅިގެން ހައްޔަރުކުރި 18 އަހަރުން ދަށުގެ ކުއްޖާ މިހާރު ވަނީ އާއިލާއާ ޙަވާލުކޮށްފައެވެ.

ދިވެހިންތަކެއް ރަހީނުކުރި މައްސަލައެއް ފެންމަތިވެފައިވާއިރު، ސްނެޕްޗެޓް މެދުވެރިކޮށް ވާހަކަ ދައްކައިގެން އޮޅުވާލައިގެން ވިލިމާލެއާއި، މާލެ ސަރަޙައްދުގެ ގެސްޓު ހައުސްތަަކަށް ގެންގޮސްގެން، އަނިޔާކޮށް، ބަރަހަނާ ފޮޓޯ ނަގައި އޭގެ ބޭނުންކޮށްގެން ބްލެކްމެއިލް ކުރާ ނެޓްވޯކްތަކެއް މިހާރު ރާއްޖޭގައި އޮޕަރޭޓް ކުރަމުންދާކަމަށް ފުލުހުން މީގެ ކުރިން ވަނީ ބުނެފައެވެ.

 އެގޮތުން ގްރޫޕު ހަދައިގެން ތޫނު ހަތިޔާރު ބޭނުންކޮށްގެން ފޭރޭ މި ނެޓްވޯކުގައި 18 އަހަރު ނުފުރޭ ކުދިންވެސް ޙަރަކާތްތެރިވާކަމަށް މިހާތަނަށް ތަހުގީގަށް ފާހަގަވެފައިވާކަމަށް ފުލުހުން ބުނެފައިވެއެވެ.