އެމެރިކާ ޤައުމީ ޓީމުގެ ކޯޗުކަމަށް ގްރެގް ބާހޯލްޓާ އަނެއްކާ ވެސް ހަމަޖައްސައިފި އެވެ.

މިދިޔަ އަހަރު ޤަތަރުގައި ނިމުނު ފީފާ ވޯލްޑް ކަޕްގައި އެމެރިކާ ޓީމަށް އިރުޝާދު ދިން ބާހޯލްޓާ އެ މަގާމުން އެންމެ ފުރަތަމަ ވަކި ކޮށްފައި ވަނީ މިއަހަރުގެ ޖަނަވަރީ މަހުގެ ތެރޭގަ އެވެ. އެއީ އޭރު އޭނާގެ މައްޗަށް ކުރެވުނު ގެވެށި އަނިޔާއެއް މައްސަލައަކާ ގުޅިގެންނެވެ. ނަމަވެސް އެކަން ބާހޯލްޓާގެ މައްޗަށް ސާބިތު ނުވާ ކަމަށް އެމެރިކާގެ މީޑިއާތަކުގައި ވަނީ ބުނެފަ އެވެ. އެމެެރިކާގެ ފުޓުބޯޅަ އިދާރާ އިން ވަނީ އަލުން އަނެއްކާ ވެސް އެ ޤައުމުގެ ޤައުމީ ޓީމުގެ ކޯޗަކަށް ބާހޯލްޓާ ހަމަޖައްސަން ނިންމައި، އެކަން ރަސްމީކޮށް އިއުލާންކޮށްފަ އެވެ. އަލުން އެމެރިކާގެ ކޯޗުކަމާ ހަވާލުވެ ބާހޯލްޓާ އަށް އޮތް އެންމެ ބޮޑު ޓާސްކަކީ 2026 ވަނަ އަހަރު އޮންނަ ފީފާ ވޯލްޑް ކަޕަށް ރަނގަޅު ޓީމެއް ތައްޔާރު ކުރުމެވެ. އެއަހަރުގެ މުބާރާތް ބާއްވަނީ އެމެރިކާ، ކެނެޑާ އަދި މެކްސިކޯ ގުޅިގެންނެވެ.

އަލުން ކޯޗުކަމާ ހަވާލުވުމަށް ފަހު ވާހަކަ ދައްކަމުން ބާހޯލްޓާ ބުނީ، ފުޓުބޯޅައިގައި ރަނގަޅު މިސްރާބެއްގައި ދިޔުމަށް އެމެރިކާ އިން ފަށައިވާ މަސައްކަތް ކުރުމަށް އަނެއްކާ ވެސް ފުރުސަތު ލިބުނީތީ އުފާވާ ކަމަށެވެ. ބާހޯލްޓާ ބުނީ ނިމުނު ވޯލްޑް ކަޕްގައި ނެދެލެންޑްސް އަތުން ބަލިވެ އެމެރިކާ މުބާރާތުން ކަޓަން ޖެހުމުން، ކުޅުންތެރިންނާއި، އޭނާ ވެސް މާޔޫސްވި ކަމަށެވެ. ނަމަވެސް އޭރު ވެސް ކުޅުންތެރިންނަށް ވިސްނައިިދިނީ، މާޔޫސްވި ނަމަވެސް ކުރިއަށް ދިޔުމަށް ކަމަށެވެ. ބާހޯލްޓާ ދެކޭ ގޮތުގައި ކާމިޔާބު މަސައްކަތެއްގައި ދެމި ތިބެއްޖެ ނަމަ، އެކަމުގެ ނަތީޖާ ވެސް ކާމިޔާބުވާނެ އެވެ. އެހެންކަމުން އޭނާ މިހާރު ވެސް ބޭނުންވަނީ ކުރިން ކުރި މަސައްކަތް އަލުން ފަށައިގަނެ، ވަރުގަދަ ޓީމެއް އުފެެއްދުމަށެވެ.

ދާދި ފަހުން އެމެރިކާ ވަނީ ކޮންކާކަފް ނޭޝަންސް ލީގުގެ ފައިނަލަށް ދަތުރު ކޮށްފަ އެވެ. ޖޫން މަހުގެ 19 ވަނަ ދުވަހު އޮންނަ ފައިނަލްގައި އެމެރިކާ ނިކުންނާނީ ކެނެޑާއާ ދެކޮޅަށެވެ.