އެސްޓީއޯއިން ކޮންމެ އަހަރެއްގެ ބޮޑު އީދާ ދިމާކޮށް ކުރިއަށްގެންދާ އީދު ޕްރޮމޯޝަން މިއަހަރު ވެސް ފަށައިފިއެވެ.
"އެސްޓީއޯ އީދު އޮފާ 2023" ގެ ނަމުގައި ކުރިއަށްގެންދާ މި ޕްރޮމޯޝަން އެސްޓީއޯ ޕީޕަލްސް ޗޮއިސް އާއި އަތޮޅުތެރޭގެ އެސްޓީއޯގެ ފިހާރަތަކުގައި ކުރިއަށްދާނެއެވެ. އެގޮތުން، އެސްޓީއޯ ޕީޕަލްސް ޗޮއިސް އާއި އެސްޓީއޯ ހުޅުމާލެ ފިހާރަ، އަދި އެސްޓީއޯ ރީޖަނަލް 10 ސަރަހައްދެއްގައި ހުންނަ ފިހާރަތަކުގައި ބުރާސްފަތި ދުވަހުން ފެށިގެން މި ޕްރޮމޯޝަން ވަނީ ފަށައިފައެވެ.
އެސްޓީއޯ އިން މައުލޫމާތު ދޭ ގޮތުގައި އިއްޔެ ފެށި މި ޕްރޮމޯޝަން އަންނަ މަހުގެ 31 ގެ ނިއަލަށް ކުރިއަށްދާނެއެވެ. މި ޕްރޮމޯޝަނަށް ހާއްސަކޮށްފައިވާ ޕްރޮޑަކްޓު ތަކުން 42 އިންސައްތައާ ހަމައަށް ޑިސްކައުންޓް ލިބިގެންދާނެ ކަމަށް ވެސް އެ ކުންފުނިން ބުނެއެވެ.
މި ޕްރޮމޯޝަނުގެ މުއްދަތުގައި އެސްޓީއޯ ފިހާރަތަކުގައި ޕްރޮމޯޝަނަށް ހާއްސަ ޕްރޮޑަކްޓުތަކުން ކުރާ ކޮންމެ 500 ރުފިޔާގެ ވިޔަފާރިއަކަށް ޑިޖިޓަލް ކޫޕަނެއް ދޫކުރާނެއެވެ. އަދި ޕްރޮމޯޝަން ނިމުމުން ހުރިހާ ކަސްޓަމަރުންގެ މެދުގައި ގުރުއަތު ނަގައި ނަސީބުވެރި ތިން ފަރާތެއް ހޮވުމަށް ވަނީ ހަމަޖެހިފައެވެ.
މި ޕްރޮމޯޝަނުގައި ނަގާ ގުރުއަތުން އެއްވަނަ އަށް ހޮވޭ ނަސީބުވެރިއަކަށް އެސްޓީއޯއިން ވަނީ ހިޓާޗީ ބްރޭންޑުގެ ފްރިޖެއް ދޭން ނިންމާފައެވެ. އަދި ދެވަނަ އަށް ހޮވޭ ފަރާތަކަށް އެލްޖީ ބްރޭންޑުގެ ޑިޝްވޮޝަރެއް ލިބޭ އިރުއިރު ތިންވަނައަށްދާ ފަރަތަކަށް 2000 ރުފިޔާގެ އަގުހުރި އިލެކްޓްރޯނިކް ސާމާނު ލިބޭނެ ކަމަށް އެސްޓީއޯ އިން މައުލޫމާތު ދީފައިވެއެވެ.
