ނަޖިހުން މަގުތައް ތަޣައްޔަރުވާ މައްސަލައަށް އާދައިގެ އެހެނަސް ނަތީޖާ ވަރުގަދަ ޙައްލެއް!

21 ވަނަ ޤަރުނުގެ ކުރިއެރުމާއި ތަހުޒީބުގެ އަދުގެ ޒަމާނުގައި އެއް ތަނުން އަނެއް ދަތުރު ކޮށް އުޅުމާއި، މުދާ އުފުލުމަށް ލުއި ފަސޭހަ އެތައް މަގެއް ހަމަ ޖެހިފައި އޮތެއް ކަމަކު، އަދިވެސް އެ ނަޞީބު ނުލިބޭ ބަޔަކލު ދުނިޔޭގައި އެބަ ދިރިއުޅެއެވެ. ދިރިއުޅުމުގެ މައިދާނުގައި ކުރިމަތިލާން ޖެހިފައި ވާ އެކި ކަހަލަ ގޮންޖެހުންތަކާއި ހުރަސްތަކާއި ހެދި، ދަތުރުފަތުރު ކޮށް އުޅުމަށް އޮތް އެންމެ ލުއި ފަސޭހަ ގޮތަކީ އަސްގާޑިޔާ ކަމުގައި ވެފައި ވާ ބަޔަކު އަދިވެސް އެބަ އުޅެއެވެ. ދައްކަން މިއުޅެނީ ހުރިހާ ކޮޅަކުން ފިއްތާލެވިފައި ވާ ޣައްޒާގެ ރަށްވެރހިންގެ ވާހަކައެވެ.

2.3 މިލިއަން މީހުންގެ އާބާދީއެއް ދިރިއުޅެމުންދާ ޣައްޒާގެ ތޮއްޖެހިފައި ވާ މަގުތަކުން އަސްގާޑިޔާ ފެނުމަކީ އާންމު ކަމެކެވެ. ދަނޑުބިންތަކުގެ އުފެއްދުންތަކާއި އެނޫންވެސް އެކި ކަހަލަ މުދާ، އެއްތަނުން އަނެއް އުފުލާ ހެދުމަށްޓަކާ ޣައްޒާގައި އަދިވެސް ބޭނުން ކުރަނީ އަސްގާޑިޔާއެވެ. އަސްގާޑިޔާއަކީ ޣައްޒާގެ ދަތުރުފަތުރުގެ ނިޒާމުގެ އަސާސީ މަސްދަރަކަށް ވާ އިރު، ސާފުތާޚިރު ކަމުގެ ގޮތުން ގޮންޖެހުންތަކާ ވަނީ ކުރިމަތިލާން ޖެހިފައެވެ. އަސްތަކުން ބޭރުވާ ނަޖިހުން ޣައްޒާގެ މަގުތައް ނުތާޚިރު ވުމުގެ މައްސަލައަކީ ބޮޑު ވެފައި އޮތް މައްސަލަކަށް ވާ އިރު، އެ މައްސަލައަށް ޙައްލު ހޯދާ، ޣައްޒާގެ މަގުތައް ސާފު ކޮށްދިނުމަށް، އަމިއްލަ ޖަމިއްޔާއަކުން ވަނީ އަތުކުރި އޮޅާލާފައެވެ.

ޣައްޒާގެ މަގުތަކަކީ ނަޖިހުން ސަލާމަތް ވެފައި ވާ މަގުތަކެއް ކަން ކަށަވަރު ކުރުމަށްޓަކާ، އެ ޖަމާޢަތުން ޚިޔާރު ކުރީ އަސްތަކަށް ޚާއްސަ ޑައެޕަރ ނުވަތަ ނެޕީއެއް ތައްޔާރު ކުރުމަށެވެ. މިކަން ކުރީ ޑައެޕަރއެއް ގޮތަށް ހުންނަ ކޮތަޅެއްގެ އެހީގައެވެ.

ޣައްޒާގެ މަގުތައް ސާފު ކުރުމުގެ މަސައްކަތުގައި ހަރަކާތްތެރިވާ ސާހިރު ޚައްޠާބުވެސް ފާހަގަ ކުރި ގޮތުގައި، އަސްތަކުން ބޭރު ކޮށްފައި ވާ ބޮޑުކަމުދާ ތަކެއްޗާއި، އެ ނަޖިސް ވަށައިގެން އެނބުރެމުންދާ ކުނިމެހިތަކާއި، އެ ދުވާ ވާހަކީ އެއްވެސް މީހަކު، އެ ކަމެއް ތަޖުރިބާ ކުރަން އެދޭނެ ފަދަ ކަންކަމެއް ނޫނެވެ.

ޣައްޒާގެ މަގުތައް ސާފުކޮށް ބޭއްވުމަށްޓަކާ ތަޢާރަފު ކުރި ޑައެޕަރތައް ބޭނުން ކުރަނީ ހަމަ އެކަނި އަސްތަކުގައެއް ނުނެވެ. ގާޑިޔާ ދުއްވަން ބޭނުން ކުރާ ހިމާރުތަކުގައިވެސް މި ޑައެޕަރ ބޭނުން ކުރެއެވެ. މަގުތައް ސާފުވުމުގެ އިތުރުން، މިކަމުން ލިބޭ އެހެން ފައިދާއެއްވެސް އެބަ އޮތެވެ. އެއީ، ކައިރި ހިސާބުތަކުގައި ހައްދާ ދަނޑުބިންތަކަށް ބޭނުންވާ ގަސްކާނާ ތައްޔާރު ކުރާނެ ޤުދުރަތީ މާއްދާތަކެއް ލިބުމުގެ ފައިދާއެވެ.

އާންމު ރައްޔިތުންގެ ދިރިއުޅުމަށްވެސް މިކަމުގެ ސަބަބުން އެދެވޭ ބަދަލުތަކެއް އަންނަމުން ދާ ކަން ފާހަގަ ކުރަން ޖެހެއެވެ.

ޔަހޫދީ އިޒްރޭލާއި، މިޞްރުގެ އިތުރުން ފަލަސްޠީނުގެ މައި ސަރުކާރުން ފިއްތުންތަކެއް ކުރިމަތި ކޮށްފައި އޮތެއް ކަމަކު، ޣައްޒާގެ ރަށްވެހިންގެވެސް ފޮނި ޢުއްމީދުތަކަކާއި ހުވަފެންތަކެއް ވެއެވެ. ޓެކްނޮލޮޖީގެ ގޮތުން ކުރިއަރާ، ދިރިއުޅުމުގެ އެތައް ކަމަކަށް ލުއިފަސޭހަކަން ލިބިފައި ވާ އަދުގެ މި ޒަމާނުގައި، އަނގަމަތި ހާ ޖަލެއްގައި ދިރިއުޅެން ޖެހުނެއް ކަމަކު، ޣައްޒާގެ ރަށްވެހިންގެ ހިތްތަކުން، ރަށްވެހި ކަމުގެ ރޫޙު ކުޑަކޮށްވެސް ފަނޑުވެ ނުދާ ކަން، މިފަދަ ކަންކަމުން ސާބިތު ކޮށްދެއެވެ.