މާލޭ ސަރަހައްދުގެ ޓްރާންސްޕޯޓާ ގުޅޭ މާސްޓަރ ޕްލޭނެއް ހެދުމުގެ މަސައްކަތް ފަށަނީ
މަސައްކަތް ކުރަން ގްލޯބަލް އެންވަޔަރަމެންޓް ފެސިލިޓީ (ޖެފް) އިން ފަންޑު ހަމަޖައްސައިދިން
މާލޭގެ މަގުމަތި
މާލޭ ސަރަހައްދުގެ ޓްރާންސްޕޯޓާ ގުޅޭ މާސްޓަރ ޕްލޭނެއް ހެދުމުގެ މަސައްކަތް ފެށުމަށް ނިންމައިފިއެވެ.
އެންވަޔަރަމެންޓް މިނިސްޓްރީން ބުރާސްފަތި ދުވަހު ކުރި އިއުލާނެއްގައި ވަނީ، އެ މިނިސްޓްރީން ހިންގާ "އިންޓަރގްރޭޓެޑް ސަސްޓެއިނަބަލް އެންޑް ލޯ އެމިޝަން ޓްރާންސްޕޯޓް އިން ދަ މޯލްޑިވްސް" މަޝްރޫއުގެ ދަށުން، މާލޭ ސަރަހައްދުގެ ޓްރާންސްޕޯޓާ ގުޅޭ މާސްޓަރ ޕްލޭނެއް ހެދުމުގެ މަސައްކަތް ފަށާފައިވާކަމަށާއި، އެ މަސައްކަތް ކުރަން ގްލޯބަލް އެންވަޔަރަމެންޓް ފެސިލިޓީ (ޖެފް) އިން ފަންޑު ހަމަޖައްސައިދީފައި ވާކަމަށެވެ.
މިނިސްޓްރީން ބުނީ "އިންޓަރގްރޭޓަޑް ޓްރާންސްޕޯޓް މާސްޓަރ ޕްލޭން ފޯ މާލެ އަރބަން ރީޖަން" އަށް ކޮންސަލްޓެންސީގެ ހިދުމަތް ދޭނެ ބަޔަކު ހޯދަން ބޭނުންވާކަމަށާއި، އެކަމަށް ޝައުގުވެރިވާ ފަރާތްތަކުން އަންނަ މަހު 9ގެ ކުރިން ޕްރޮޕޯޒަލް ހުށަހަޅަންވާނެ ކަމަށެވެ.
މިނިސްޓްރީން އާންމުކުރި މައުލޫމާތު ކަރުދާހުގައިވާގޮތުން، ކުރިއަށް އޮތް 10 އަހަރަށް އެކުލަވައިލާ މި މާސްޓަރ ޕްލޭންގެ މައިގަނޑު މަގުސަދަކީ މާލޭ ސަރަހައްދުގައި ތިމާވެއްޓާ ރައްޓެހި އުޅަނދުފަހަރު ބޭނުންކުރާ މިންވަރު ދެނެގަނެ، ދުރު ރާސްތާއަށް އެކަމަށް މީހުން ޝައުގުވެރިކުރުވާނެ ގޮތްތަކެއް ހޯދުމެވެ.
މާލޭ ސަރަހައްދުގައި ޓްރެފިކް ތޮއްޖެހުން ކުޑަކުރެވޭނެ ގޮތްތަކާއި ޕަބްލިކް ޓްރާންސްޕޯޓް ހަރުދަނާ ކުރެވޭ ގޮތްތައްވެސް މި ޕްލޭނުގައި ހިމަނާނެއެވެ. އަދި ވެހިކަލް މަދުކުރެވޭނެ ގޮތްތަކާއި ޕާކިންގ މައްސަލަތައް ފަދަ، މާލޭ ސަރަހައްދުގެ ޓްރާސްޕޯޓާ ގުޅޭ އެންމެ ބޮޑެތި މައްސަލަތަކަށް ހައްލު ގެނެސް، ޕްލޭނެއްގެ ދަށުން ކަންކަން ކުރެވޭނެ ގޮތްތައް ކަނޑައަޅާނެއެވެ.
