ވެޓަރަންސް މުބާރާތުގެ އޯޕަން ޑަބަލްސް ފައިލަނުގައި ކުޅޭނެ ބައިވެރިން ކަށަވަރުވެއްޖެ

މިހާރު ކުރިޔަށްދާ ވެޓަރަންސް ކެރަމް ޗެމްޕިއަންޝިޕްގެ އޯޕަން ޑަބަލްސް ފައިނަލުގައި ކުޅޭނެ ބައިވެރިން ކަށަވަރުވެެއްޖެއެވެ.

އާދިއްތަ ދުވަހުގެ ރޭ މި މުބާރާތް ފަށާފައިވާއިރު, އޯޕަން ޑަބަލްސްގެ ސެމީ ފައިނަލް މެޗުތައް ކުޅެފައިވަނީ ހޯމަ ދުވަހުގެ ރެއެވެ. ފައިނަލުގެ ޖާގަތައް ކަށަވަރުކޮށްފައިވަނީ ނާޒިމް ހަސަނާއި އިސްމާއީލް ސުޖާއުގެ ޕެއަރގެ އިތުރުން އާދަމް ސާލިމާއި އަބްދުﷲ އިސްމާއީލްގެ ޕެއަރއެވެ.

ނާޒިމާއި ސުޖާއުގެ ޕެއަރ ފައިނަލަށް ދަތުރުކުރީ އިބްރާހީމް މުހައްމަދާއި އަފީފުއްނިސާގެ ޕެއަރ ސީދާ ދެ ގޭމުން ބަލިކުރުމަށްފަހުއެވެ. ފައިނަލުން ޖާގަ ހޯދި ޕެއަރއިން ވަނީ މެޗުގެ ފުރަތަމަ ގޭމު 25-1ން، އަދި ދެވަނަ ގޭމު 25-4ން ކާމިޔާބުކޮށްފައެވެ.

އޯޕަން ޑަބަލްސް ފައިނަލުގެ ދެވަނަ ޖާގަ ހޯދީ އާދަމް ސަލީމް (ކުނޑި)އާއި އަބްދުﷲ އިސްމާއީލްގެ ޕެއަރއެވެ. މި ޕެއަރއިން ސެމީ ފައިނަލުގައި އިބްރާހީމް ލިފާއު އާމިރާއި ހަސަން ލަތީފްގެ ޕެއަރ ބަލިކޮށްފައިވަނީ 2-1ގެ ނަތީޖާއަކުންނެވެ. ފުރަތަމަ ސެޓު 21-20ން ކާމިޔާބުކޮށްފައި ވަނީ ލިފާއުއާއި ހަސަން ލަތީފުގެ ޕެއަރއިންނެވެ. ނަމަވެސް ކުނޑިއާއި އަބްދުﷲ އިސްމާއީލްގެ ޕެއަރއިން ވަނީ ޖެހިގެން އައި ދެ ސެޓު ކާމިޔާބުކޮށްފައެވެ. ދެވަނަ ސެޓު 25-10ން ކާމިޔާބުކޮށްފައިވާއިރު، ތިންވަނަ ސެޓު ކާމިޔާބުކުރީ 25-16ގެ ނަތީޖާއަކުންނެވެ.

މި މުބާރާތުގެ އޯޕަންސް ސިންގަލްސްގެ މެޗުތައްވެސް ހޯމަ ދުވަހު ވަނީ ފަށާފައެވެ. މުބާރާތުގެ ފައިނަލް މެޗުތައް ކުޅުމަށް ހަމަޖެހިފައިވަނީ މި މަހު 16 ވަނަ ދުވަހުއެވެ.