މިއަހަރު ރާއްޖެއިން ހައްޖަށް ދާ މީހުންގެ ފުރަތަމަ ގްރޫޕް ފުރައިފި

1444ވަނަ އަހަރު ރާއްޖެއިން ހައްޖަށް ދާ މީހުންގެ ފުރަތަމަ ގްރޫޕް ފުރައިފިއެވެ.

މިއަދު ހައްޖަށް ފުރީ، މޯލްޑިވްސް ހައްޖު ކޯޕަރޭޝަން ލިމިޓެޑުގެ ފުރަތަމަ ގްރޫޕްގައި ހިމެނޭ 294 ހައްޖާޖީންނެވެ. މި ހައްޖާޖީން ފުރީ 12 ޖޫން 2023ވީ ހޯމަ ދުވަހުގެ ހަވީރު 15:10ގެ ފްލައިޓުންނެވެ. ހައްޖުވެރިންނަށް ކިންގް އަބްދުލް އަޒީޒު އިންޓަރނޭޝަނަލް އެއަރޕޯޓަށް ދެވޭނީ ރާއްޖޭ ގަޑިން ރޭގަނޑު 6:45ގައެވެ.

މިފަހަރު، ހައްޖުވެރިން ޖުމްލަ 6 ފްލައިޓެއްގައި ދަތުރުކުރުމަށް ހަމަޖެހިފައިވާއިރު، ފްލައިޓްތައް އޮންނާނީ މި ހިނގާ ޖޫންމަހުގެ 12، 13، 15، 16 އަދި 19 ވަނަ ދުވަހުއެވެ. މިގޮތުން 13 ޖޫން 2023ގައި ސިސިލްފަރު ހައްޖު އެންޑް އުމްރާ ގްރޫޕް ޕްރައިވެޓް ލިމިޓެޑުން ފުރަން ހަމަޖެހިފައިވާއިރު، އެ ގްރޫޕް ފުރާނީ 12:50ގައެވެ. 15 ޖޫން 2023ގައި އަލްމަނާސިކް ޕްރައިވެޓް ލިމިޓެޑުން ފުރާއިރު، އެ ގްރޫޕް ފުރަން ހަމަޖެހިފައިވަނީ ރޭގަނޑު 19:00ގައެވެ. 16 ޖޫން 2023ގައި މޯލްޑިވްސް ހައްޖު ކޯޕަރޭޝަނުން ފުރާއިރު، އެ ގްރޫޕް ފުރަނީ މެންދުރުފަހު 15:10ގައެވެ. 16 ޖޫން 2023ގެ ރޭގަނޑު 19:00ގައި އަލްހަރަމައިން ހައްޖު އެންޑް އުމްރާ ކޮމްޕެނީ މޯލްޑިވްސް ޕްރައިވެޓް ލިމިޓެޑުން ފުރާނެއެވެ. އަދި 19 ޖޫން 2023 ވަނަ ދުވަހުގެ މެންދުރުފަހު 15:10ގައި މޯލްޑިވްސް ހައްޖު ކޯޕަރޭޝަން ލިމިޓެޑްގެ ގްރޫޕު ފުރާނެއެވެ. އަދި އެއީ ރާއްޖެއިން ހައްޖަށް ފުރާ މީހުންގެ އެންމެ ފަހު ގްރޫޕެވެ.

އެހެން އަހަރުތަކެކޭ އެއްގޮތަށް މި އަހަރުވެސް ހައްޖުވެރިންނަށް ފަސޭހައިން ފުރުމުގެ އިންތިޒާމްތައް ހަމަޖައްސާފައިވާއިރު، ހައްޖުވެރިން އެއަރޕޯޓަށް ގެންދިއުމާއި ލަގެޖް ކަލެޓްކުރުމުގެ މަސައްކަތް ސަރުކާރުގެ މުއައްސަސާތަކާ ގުޅިގެން ކުރިއަށްގެންދާނެއެވެ.

އަދި އުމުރުން ދުވަސްވީ މީހުންނާއި ބަލި މީހުން، ކުދި ވެހިކަލްތަކުގައި ބަހާ ހަމައަށް ގެންގޮސްދިނުމާއި، ހައްޖުވެރިޔާއާއި އާއިލާގެ މީހުންނަށް ބަހުގައި ނުވަތަ އޭސީ ފެރީގައި އެއަރޕޯޓަށް ދެވޭގޮތް ހަމަޖެއްސުމާއި، ފުރުމުގެ އެއްދުވަސް ކުރިން ފޮށިތައް އެއަރޕޯޓަށް ގެންގޮސްދިނުމުގެ އިންތިޒާމުވެސް ވަނީ ހަމަޖެހިފައެވެ.

ހައްޖަށް ދާ ފަރާތްތަކަށް ޚާއްސަކޮށް ދަތުރުތައް ހަމަޖެހިފައިވާއިރު، މާލެއާއި ހުޅުމާލެ އަދި ވިލިމާލެއިން ފަސޭހަކަމާއެކު ދަތުރުކުރެވޭނެ އިންތިޒާމުވެސް ވަނީ ހަމަޖައްސާފައެވެ