ޗެމްޕިއަންސް ލީގަށް ފަހު ގާޑިއޯލާގެ އިންޒާރެއް ރެއާލަށް، "އަހަރަމެން އެބަ އަންނަން!"

ޔުއެފާ ޗެމްޕިއަންސް ލީގު ފުރަތަމަ ފަހަރަށް ކާމިޔާބު ކުރުމަށް ފަހު މެންޗެސްޓަރ ސިޓީގެ ކޯޗު ޕެޕް ގާޑިއޯލާ، މުބާރާތުގެ އެންމެ ކާމިޔާބު ޓީމު ރެއާލް މެޑްރިޑަށް "މަޒާޖީ" ގޮތެއްގައި އިންޒާރެއް ފޮނުވައިފި އެވެ.

ސްޕެއިންގެ ރެއާލުން ވަނީ ޗެމްޕިއަންސް ލީގު 14 ފަހަރު ކާމިޔާބުކޮށްފަ އެވެ. މިއީ ރެކޯޑު އަދަދެކެވެ. އެ ޓީމު މި ސީޒަނުގެ މުބާރާތުން ކެޓީ ސެމީ ފައިނަލްގައި ސިޓީއަތުން ބަލިވެގެންނެވެ. ފައިނަލަށް ފަހު ވާހަކަ ދައްކަމުން ގާޑިއޯލާ ބުނީ، މިހާރު ސިޓީ އޮތީ ރެއާލަށް ވުރެ 13 ތަށި ފަހަތުގައި ކަމަށެވެ. އޭނާ ބުނީ އެއީ ހަމައެކަނި 13 ކަމަށާއި، އެހެންކަމުން ރެއާލުން ވަރަށް ބޮޑަށް ސަމާލުކަން ދޭން ޖެހޭނެ ކަމަށެވެ. ސަބަބެއްގެ ގޮތުގައި ގާޑިއޯލާ ބުނީ، ސިޓީން އެމީހުންގެ މިސްރާބުގައި އެދިމާލަށް ދަތުރު ކުރުމެވެ. އެކަން ފާހަގަކޮށް ގާޑިއޯލާ ބުނީ، ރެއާލުން ކުޑަކޮށް ނަމަވެސް މަޑު ޖެހި، "ނިދައިފިނަމަ" ސިޓީން ފަހަތުން އަރައި އެމީހުން އަތުލާނެ ކަމަށެވެ.

އިތުރަށް އޭނާ ބުނީ މިއީ ސިޓީގެ ފުރަތަމަ ޗެމްޕިއަންސް ލީގު ކަމަށާއި، މިހިސާބުން އަދި ނިންމާލަން ބޭނުންނުވާ ކަމަށެވެ. އެހެންކަމުން އަންނަ ސީޒަނުގައި ވެސް މިއަށްވުރެ ބުރަކޮށް މަސައްކަތްކޮށް، އަނެއްކާ ވެސް އެ މުބާރާތް ކާމިޔާބު ކުރުމަށް ފޯކަސް ކުރާނެ ކަމުގައި ވެސް އޭނާ ވަނީ ބުނެފަ އެވެ. އޭނާ ބުނީ ދެ ސީޒަނެއް ނުވަތަ ތިން ސީޒަނެއްގައި ޗެމްޕިއަންސް ލީގު ކާމިޔާާބު ކުރުމަށްފަހު ބައެއް ޓީމުތައް "ގެއްލޭ" ކަމަށެވެ. ސިޓީން އެކަން އެއް ފަރާތްކުރަން ޖެހޭކަން ފާހަގަކުރަމުން އޭނާ ބުނީ، އެ ޓީމަށް އެ ހާލަތު ދިމާނުވާނެ ކަމަށެވެ. ގާޑިއޯލާ ބުނީ އޭނާ ދެކޭ ގޮތުގައި މިއީ ސިޓީން ދުރާލާ ރާވައިގެން، ވަގުތު ދީގެން ކުރިއަށް ގެންދިޔަ ޕްރޮޖެކްޓު ކާމިޔާބުވުން ކަމަށެވެ.

ސިޓީގެ މި ކާމިޔާބާއެކު ގާޑިއޯލާ ވެސް ވަނީ ތާރީޚުން ޖާގަ ހޯދައިފަ އެވެ. އޭނާ އަކީ ދެ ކުލަބެއްގައި ޓްރެބަލް ހޯދި ހަމައެކަނި ކޯޗެވެ. މީގެ ކުރިން އޭނާ ވަނީ ސްޕެއިންގެ ބާސެލޯނާގައި ވެސް ޓްރެބަލް ކާމިޔާބުކޮށްފަ އެވެ. އެއީ މީގެ 14 އަހަރު ކުރި އެވެ.