ލިވަޕޫލް ދޫކޮށްލުމާއެކު ނަބީ ކެއިޓާ ހިލޭ ޓްރާންސްފާއެއްގައި ވާޑާ ބްރޭމަންއާ ގުޅުނު ކަމަށް ޖަރުމަނު ލީގުގެ ކްލަބުން ހުކުރު ދުވަހު އިއުލާންކޮށްފިއެވެ.
އިނގިރޭސި ފުޓުބޯޅައިގެ ބޮޑު ކޮންމެ ތައްޓެއް ލިވަޕޫލް އާއެކު ހޯދުމަށްފަހު ކެއިޓާ ލިވަޕޫލް ދޫކޮށްލީ އެ ޓީމާއެކު ފަސް އަހަރު ހޭދަކުރުމަށްފަހުއެވެ. 2018 ވަނަ އަހަރު ލިވަޕޫލަށް ގުޅުމުގެ ކުރިން ކެއިޓާ ކުޅުނީ ޖަރުމަނު ލީގުގެ ލެއިޕްޒިގަށެވެ. އަނިޔާގެ ސަބަބުން އޭނާ އަށް މި ސީޒަނުގައި ކުޅެވިފައިވަނީ އެންމެ 13 މެޗެވެ.
މި ސީޒަނުގައި ޕްރޮމޯޓުވި ބްރޭމަން އިން ސީޒަން ނިންމާލީ ތާވަލުގެ 13 ވަނައިގައެވެ. ކެއިޓާ އެ ޓީމާ ގުޅުން ވާނީ ކުރިޔަށް އޮތް ސީޒަނުގައި ޓީމު އިތުރަށް ވަރުގަދަ ވާނެކަމަކަށެވެ.
ލިވަޕޫލްގައި އޭނާ ހޭދަކުރި ދުވަސްތަކުގައި އަނިޔާތަކުގެ ސަބަބުން ގިނަ ހުރަސްތަކެއް ކުރިމަތިވިއިރު، ހުރިހާ މުބާރާތެއް ހިމެނޭހެން އޭނާ ކުޅެފައިވަނީ 129 މެޗެވެ.
