މުދަލާއި ހިދުމަތުގެ އަގު ބޮޑުވުން ކޮންޓްރޯލްކުރުމަށް ގޮވާލާ ހުށަހެޅި ގަރާރު ފާހެއް ނުވި
ރަމަޟާން މަހަށް ދިވެހިން އާންމުކޮށް ބޭނުންކުރާ ކާބޯތަކެތީގެ އެކި ބާވަތްތަކުގެ އަގުތައް ކުރިއަށްވުރެ ބޮޑުވަމުންދޭ
އާދަމް ޝަރީފް
ސަރުކާރުން ޖީއެސްޓީ ބޮޑުކުރުމާއެކު، މުދަލާއި ހިދުމަތުގެ އަގު އިންތިހާއަށް ބޮޑުވެ، ރައްޔިތުންނަށް ކުރިމަތިވަމުންދާ ދަތިތަކާއި ގޮންޖެހުންތައް ކުޑަކޮށް، ތަކެތީގެ އަގުތައް ކޮންޓްރޯލް ކުރުމަށް ސަރުކާރުން ގޮވާލާ ހުށަހެޅި ގަރާރު ބަލައިނުގަނެ މަޖިލީހުގެ ތަޅުމުން ބޭރުކޮށްލައިފިއެވެ.
އެ ގަރާރު ބަލައިގަންނަން ފެންނަ ކަމަށް 16 މެމްބަރުން އަދި ގަރާރު ބަލައިގަންނަން ނުފެންނަ ކަމަށް 35 މެމްބަރުން ވަނީ ވޯޓުދެއްވާފައެވެ.
މި ގަރާރު ރައްޔިތުންގެ މަޖިލީހަށް ހުށަހެޅުއްވީ މަޑުއްވަރީ ދާއިރާގެ މެންބަރު އާދަމް ޝަރީފް އުމަރެވެ. ރާއްޖޭގައި މުދަލުން ނަގާ ޖީއެސްޓީ ބޮޑުކުރުމުގެ އިތުރުން ދިވެހިން ދިރިއުޅުމުގައި އާންމުކޮށް ބޭނުންކުރާ ކާބޯތަކެއްޗާއި މުދަލާއި ހިދުމަތުގެ އަގު ޖެނުއަރީ މަހުން ފެށިގެން 7 އިންސައްތަ ބޮޑުވެފައިވާ ކަމަށް އެ ގަރާރުގައި ވަނީ ބުނެފައެވެ.
ފާއިތުވި އަހަރުގެތެރޭގައި އިންފްލޭޝަން ރޭޓަށް ބަލާ ނަމަ ނިސްބަތުން ވޭތުވެދިޔަ އަހަރުގެ ތެރޭގައި 75 އިންސައްތައަށްވުރެ އިންފްލޭޝަން އުފުލިފައިވާ ކަމަށް ވެސް އެ ގަރާރުގައި ވަނީ ބުނެފައެވެ. މީގެ އިތުރުން ކާބޯތަކެތީގެ ހިދުމަތްދޭ ތަންތަނުގެ އަގުތައް 4.3 އިންސައްތަ ބޮޑުވެފައިވާކަން ނެޝަނަލް ބިއުރޯ އޮފް ސްޓެޓިސްޓިކްސް އިން އާންމުކުރި ތަފާސް ހިސާބުތަކުން ހާމަވާ ކަމަށް އެ ގަރާރުގައި ބުނެފައިވެއެވެ.
އާދަމް ޝަރީފް ވިދާޅުވީ ރަމަޟާން މަހަށް ދިވެހިން އާންމުކޮށް ބޭނުންކުރާ ކާބޯތަކެތީގެ އެކި ބާވަތްތަކުގެ އަގުތައް ކުރިއަށްވުރެ ބޮޑުވެފައިވާ ކަމަށެވެ.
އިތުރަށް އެ ގަރާރުގައި ބުނެފައިވަނީ ދިވެހި ސަރުކާރުން ބޮޑުކުރި ޖީއެސްޓީ، އަލުން މުރާޖާ ކުރުމަށާއި، ރައްޔިތުންގެ އަތްފޯރާ ހިސާބުގައި ހުރި މުދަލުގެ އަގުތައް ކޮންޓްރޯލް ކުރެވޭނެ ގޮތްތަކެއް ސަރުކާރުން ރޭވުމަށާއި ރަމަޟާން މަހު ބާޒާރުގެ އަގުތައް ހިފެހެއްޓޭނެ އިންތިޒާމްތަކެއް ހަމަޖެއްސުމަށް ސަރުކާރަށް އެ ގަރާރުގައި ގޮވާލާފައިވެއެވެ.
