މުޅިން އައު އައްޑޫއެއްގެ އުންމީދުގައި
6 ޖޫން 2023 | އަންގާރަ 14:10އައްޑޫގައި ގިނަ ތަރައްގީގެ މަޝްރޫއުތައް ކުރިއަށްދޭ
އައްޑޫ ސިޓީއަށް ރައީސް ކުރެއްވި ދަތުރުފުޅުގެ ތެރެއިން ހަވާ އެރުވުން
މިއީ އައްޑޫ ސިޓީއަށް އުފަން އައްޑޫގެ ދަރިއެއްގެ ވާހަކަތަކެވެ. ޅައުމުރުގެ ކުއްޖަކު ކުރާ އުންމީދުތަކެވެ. އެކުއްޖާ ދެކޭ ހުވަފެންތަކެވެ. ހަމަ މިގޮތަށް އައްޑޫގެ ކޮންމެ ރައްޔިތަކުވެސް މިފަދަ ހުވަފެންތަކެއް ދެކޭނެކަން ޔަގީނެވެ. އުފަން ރަށުގައި، އާއިލާއާ ގާތުގައި ތިބެގެން އާމްދަނީ ހޯދަން ކޮންމެ މީހަކުވެސް ބޭނުންވާނެއެވެ. ތައުލީމު ހޯދައި، ފަސޭހައިން ދިރިއުޅެވޭ ތަނަކަށް އުފަން ރަށް ވާން ބޭނުންނުވާނެ އެއްވެސް މީހަކު ނުހުންނާނެއެވެ.
އައްޑޫގެ ރައްޔިތުންގެ މި އުންމީދުތަކުގައި ހަގީގީ ކުލަ ޖެހިގެންދާނީ އެދެވޭ ވަރަށް ތަރައްގީ ގެނެސްދެވިގެންނެވެ. މިކަން ހަގީގަތަކަށް ހެދުމަށް މިހާރުވެސް އައްޑޫގައި ގިނަ މަޝްރޫއުތަކެއް ދަނީ ހިންގަމުންނެވެ. އާޚިރުގައި ނެރެން ބޭނުންވާ ނަތީޖާއަކީ އިގްތިސާދު ކުރިއަރުވައި ވަޒީފާގެ ފުރުސަތުތައް އިތުރުކޮށް ހަމަޖެހިގެން ދިރިއުޅެވޭނެ ތަނެއް ބިނާކުރުމެވެ. މިއީ މި ސަރުކާރުގެ ސިޔާސަތުވެސް މެއެވެ. ވަކިން ޚާއްސަކޮށްމުޅި ރާއްޖޭގެ އިގްތިސާދުގެ މުހިންމު ޕާޓްނަރަކަށް އައްޑޫ ސިޓީ ހެދުމަކީ ސަރުކާރުގެ މުހިންމު ސިޔާސަތެކެވެ.
އައްޑޫ ސިޓީއަށް ސަރުކާރުން ގެންނަން އަމާޒުހިފާފައިވާ ތަރައްގީއާ ގުޅޭގޮތުން އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވީ އުމްރާނީ ވަސީލަތްތައް ގާއިމްކުރުމަކީ ޚާއްސަ އިސްކަމެއް ދެއްވާ ކަމެއް ކަމަށެވެ. ދެކުނުގެ އިގްތިސާދީ ހަބަށް ހެދުމަށް އައްޑޫ ސިޓީގައި އެތައް ބައިވަރު ޕްރޮޖެކްޓުތަކެއް ހިންގަން ޖެހޭ ކަމަށާއި، ވަކިން ޚާއްސަ ކޮން ގަން އިންޓަރނޭޝަނަލް އެއަރޕޯޓުގެ މަޝްރޫއު މިނިސްޓަރ ފާހަގަކުރެއްވިއެވެ.
މިނިސްޓަރވެސް ފާހަގަކުރެއްވިގޮތަށް ގަން އިންޓަރނޭޝަނަލް އެއަރޕޯޓު ތަރައްގީކުރުމުގެ މަޝްރޫއަކީ ދެކުނުގެ އިގްތިސާދަށް މުހިންމު މަޝްރޫއެކެވެ. މި ޕްރޮޖެކްޓު ކުރިއަށްގެންދާއިރު މި ޕްރޮޖެކްޓާއެކު އައްޑޫ ސިޓީގެ ޓޫރިޒަމް ކުރިއެރުވުމަށް މަސައްކަތްތައް ފެށިގެންދާނެ ކަން މިނިސްޓަރ ފައްޔާޒް ފާހަގަކުރެއްވިއެވެ.
މި އެއަރޕޯޓުގެ މަސައްކަތާއި، އައްޑޫ ސިޓީގައި މިހާރު ހިންގަމުން ގެންދާ އެހެނިހެން މަޝްރޫއުތަކުގެ ސަބަބުން އައްޑޫ ސިޓީގެ ތަރައްގީގެ މައި ދޮރާށި ހުޅުވިގެންދާނެ ކަމަށް ސަރުކާރުން ގަބޫލުކުރެއެވެ. އަދި އެ ސިޓީގެ މެހެމާންދާރީއާއި ޚާއްސަ ސިފަތަށް ތަޖުރިބާކޮށްލުމުގެ ފުރުސަތު މުޅި ދުނިޔެއަށް ލިބިގެންދާނެ ކަމަށް ގަބޫލުކުރެއެވެ.
މި މަސައްކަތްތައް ނިމިގެންދާއިރު އައްޑޫ ފެނިގެންދާނީ މުޅިން ތަފާތު ތަނެއްގެ ގޮތުގައެވެ. އައްޑޫ ރައްޔިތުން ބޭނުންވާފަދަ ބަދަލުތަކަކާއެކު މުޅިން އައު އައްޑޫއެއްގެ ގޮތުގައެވެ.
