ލިވަޕޫލް އިން މެކް އަލިސްޓާ އާއެކު އެއްބަސްވުމަކާ ގާތަށް

ލިވަޕޫލުން ބްރައިޓަން އާއި އާޖެންޓީނާގެ މިޑްފީލްޑަރު އެލެކްސިސް މެކް އަލިސްޓާ އާއެކު އެއްބަސްވުމަކަށް ދިއުމަށް ކައިރިވަމުން އަންނަ ކަމަށް ރިޕޯޓްތަކުން ބުނެފިއެވެ.

2022 ވަނަ އަހަރުގެ ވޯލްޑް ކަޕް ކާމިޔާބުކުރި ކުޅުންތެރިޔާ ކުރިއަށް އޮތް 48 ގަޑިއިރުގެ ތެރޭގައި މެޑިކަލް ހަދާނެ ކަމަށް ބެލެވޭއިރު، ބްރައިޓަން އާއެކު އޭނާ ހަދާފައިވާ އެއްބަސްވުން ހަމަވަނީ 2025 ވަނަ އަހަރުއެވެ. ނަމަވެސް ލިވަޕޫލުން ވަނީ އޭނާގެ ބައިއައުޓް ކްލޯޒް މިހާރު ވެސް ޓްރިގަރކޮށް، އެ ކުޅުންތެރިޔާއާ އެކު ވާންޖެހޭ އެއްބަސްވުންތައް ވެފައެވެ.

އާޖެންޓީނޯސް ޖޫނިއާސް އިން ބްރައިޓަންއަށް މެކް އަލިސްޓާ ބަދަލުވެފައިވަނީ 2019 ވަނަ އަހަރުއެވެ. އޭނާ ވަނީ ބްރައިޓަން އަށް ކުޅުނު 112 މެޗުން 20 ލަނޑު ޖަހާފައެވެ.

ލިވަޕޫލްއިން ޓީމުގެ މެދުތެރެ ރަނގަޅު ކުރުމަށް ގިނަ ކުޅުންތެރިން ތަކެއް ދޫކޮށް، އައު ކުޅުންތެރިން ގެންނަން ވަނީ ނިންމާފައެވެ. އެގޮތުން މިލްނާ، ޗެމްބަލެއިން، ކެއިޓާ އަދި އާތާ ދޫކޮށްލާކަން ޓީމުން ވަނީ އިއުލާނުކޮށްފައެވެ.

މި ސީޒަނުގައި ލީގު ތާވަލުގެ ފަސް ވަނައިގައި ލިވަޕޫލް ނިމުނުއިރު ބްރައިޓަން އޮތީ ހަ ވަނައިގައެވެ. ދެ ޓީމުވެސް ޔުރޮޕާ ލީގުގައި ކުޅޭނެއެވެ.