އިނގިރޭސީން ފައިބައިގެން ދިޔަ ދުވަހުން ފެށިގެން އައްޑޫ ދިޔައީ ފަހަތަށް
ގަން އިންޓަރނޭޝަނަލް އެއަރޕޯޓުގެ އަމަލީ މަސައްކަތް ރައީސް ފައްޓަވައިދެއްވައި ވާހަކަފުޅުދައްކަވަނީ
އިޚްލާސްތެރިކަމާއެކު ތެދުވެރި މަސައްކަތްތަކެއް ކުރެވުނުނަމަ، 66 އަހަރު ފަހުން ގަން އިންޓަރނޭޝަނަލް އެއަރޕޯޓު ތަރައްގީކުރުމުގެ އަމަލީ މަސައްކަތް ރަސްމިއްޔާތެއްގެގޮތުގައި ބާއްވާކަށް ނުޖެހޭނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ގަން އިންޓަރނޭޝަނަލް އެއަރޕޯޓުގެ އަމަލީ މަސައްކަތް ފެށުމުގެ ރަސްމިއްޔާތުގައި ވާހަކަފުޅުއްދައްކަވަމުން ރައީސް ވިދާޅުވީ، މިއީ އިންޑިއާ ކަނޑުގެ ދެކުނުގައި ވަނިކޮށް ބަޔަކަށް ފެންނާނެ، އިސްތިރާޖީ ގޮތުން އެންމެ މުހިންމު އެއް ޕޮއިންޓުކަމަށެވެ. އިނގިރޭސިން ގަން ޚިޔާރުކުރީ އެ ސަބަބަށްޓަކައި ކަމަށާއި، އޭރު އައްޑޫގައި އޮތް މަދަނިއްޔަތުގެ ފައިދާ އެންމެ އުތުރުން ތުރާކުނުގެ ބޮލި ހުރާ ކޮޅާހަމައަށް ފޯރިކަމަށެވެ.
ނަމަވެސް، ކުރިއަރާފައި އޮތް އައްޑޫއިން، އިނގިރޭސީން ފައިބައިގެން ދިޔަ ދުވަހުން ފެށިގެން، އައްޑޫ ދިޔައީ ފަހަތަށްކަމަށް ރައީސް ވިދާޅުވިއެވެ. އަދި ގަމުގައި ހުރި، އޭރުގެ އެންމެ ޒަމާނީ އާލާތްތަކާއި ވަސީލަތްތައް އައްޑޫއިން ބޭލިކަމަށެވެ.
ރައީސް ވިދާޅުވީ ގަން އެއަރޕޯޓުގެ ޕްރެޒެންޓޭޝަންގައި ވާ ފެންވަރަށް އެއަރޕޯރޓް ނިންމަވާނެ ކަމަށެވެ. ގަން އިންޓަރނޭޝަނަލް އެއަރޕޯޓަކީ އައްޑޫގެ ފަޚުރަކަށް ވުމަށް އައްޑޫ ސިޓީގެ ރައްޔިތުން އެދިވަޑައިގަންނަވާ ވަރަށް އެމަނިކުފާނުވެސް އެދިވަޑައިގަންނަވާ ކަމަށެވެ.
މިއީ ޒަމާނީ ހުރިހާ ވަސީލަތްތަކާއެކު އަހަރަކު 1.5 މިލިއަން ފަތުރުވެރިންނަށް ޚިދުމަތްދެވޭގޮތަށް ތަރައްގީކުރެވޭ ބައިނަލްއަގުވާމީ އެއާޕޯޓެއްކަމަށާއި، މި މަޝްރޫއަކީ ދިވެހިރާއްޖެއާ އިންޑިއާއާ ދެމެދުއޮތް ޒަމާންވީ ގުޅުން ރަމްޒުކޮށްދޭ މަޝްރޫއެއް ކަމަށް ރައީސް ވިދާޅުވިއެވެ.
މީގ އިތުރުން މި މަސައްކަތް ކުރިއަށްގެންދިއުމުގައި އިންޑިއާ ސަރުކާރާއި އިންޑިއާ އެގްޒިމް ބޭންކުން ދޭ އެހީތެރިކަން ރައީސް ވަނީ ފާހަގަކުރައްވާފައެވެ.
