50 ޓަނުގެ ބްރައިން ފްރީޒިންގ ކެޕޭސިޓީ 100 މެޓްރިކް ޓަނަށް ބޮޑުކުރުމުގެ އަމަލީ މަސައްކަތް އަންނަ ޖުލައި މަހު ފަށާނެ
ރައީސް ސާލިހު - ގަން އިންޓަރނޭޝަނަލް އެއަރޕޯޓުގެ އަމަލީ މަސައްކަތް ފައްޓަވައިދެއްވަނީ
އައްޑޫ ފިޝަރީޒް ކޮމްޕްލެކްސްގެ ބްރައިން ޕްރީޒިންގ ކެޕޭސިޓީ ދެގުނަ ކުރައްވާނެކަން ރައީސް އިއުލާން ކުރައްވައިފިއެވެ.
ރައީސް މިކަން އިއުލާން ކުރެއްވީ، އައްޑޫ އަދި ދެކުނުގެ މަސްވެރިން ބާނާ މަސް އެކްސްޕޯޓްކުރުމުގައި ހުރި ހުރަސްތައް ނައްތާލައި، ގަން އިންޓަރނޭޝަނަލް އެއަރޕޯޓުގެ އަމަލީ މަސައްކަތް ފައްޓަވައިދެއްވައި ވާހަކަފުޅުދައްކަވަމުންނެވެ.
ރައީސް ވިދާޅުވީ ރާއްޖޭގެ އިގްތިސާދު 10 އަހަރުން ދެގުނަ ކުރުމަށްޓަކައި މިހާރު ކުރިއަށް ގެންދަނީ އިންގިލާބީ މަޝްރޫއުތަކެއް ކަމަށެވެ. އަދި މިގޮތުން 7000 ޓޫރިސްޓް އެނދު އައްޑޫ ސިޓީއަށް އަންނާނެކަމަށާއި، ފަތުރުވެރިކަން ފުޅާވުމަކީ އެއާގުޅޭ އެހެން ކިތަންމެ ވިޔަފާރިއަކާއި ވަޒީފާގެ ފުރުސަތު ފުޅާވެ އިތުރުވާނެ ކަމެއް ކަމަށެވެ.
އޭގެ ސަބަބުން އައްޑޫގައި ހިނގާ މުދަލުގެ މުއާމަލާތު އިތުރުވާނެކަމަށާއި، ގަން އެއަރޕޯރޓް ފަރުމާކޮށްފައި އެވަނީ މިކަންކަމަށް ރިއާޔަތްކޮށްގެން، ބޭނުންވާ ކޯލްޑް ސްޓޯރޭޖާއި، ކާގޯ ފެސިލިޓީގެ ޚިދުމަތްތަކަށް ވިސްނައިގެންކަމަށް ރައީސް ވިދާޅުވިއެވެ.
ރައީސް ވިދާޅުވީ ދެކުނާއި އައްޑޫގެ ބޮޑުކަންނެލި އެކްސްޕޯރޓްކުރުމަށް މާލެއަށް ކުރަންޖެހޭ ދަތުރުތަކަށް ގަން އެއަރޕޯރޓުން ލިބޭނެ ބޮޑެތި މަންފާތަކެއް އެބަހުރިކަމަށެވެ. އެއީ ތަރައްގީކުރެވެމުންދާ އައްޑޫ ފިޝަރީޒް ކޮމްޕްލެކްސްއާއި، ގަން އެއަޕޯރޓްގެ ކޯލްޑް ސްޓޯރޭޖާއި ކާގޯ ފެސިލިޓީގެ ޚިދުމަތް ކަމަށެވެ.
ރައީސް ވިދާޅުވީ އިގްތިސާދީ ހުރިހާ ބުރު އެކުއެކީ އެނބުރިގެން ނޫނީ ނަތީޖާއެއް ނުހޯދޭނެ ކަމަށެވެ. އައްޑޫއަށް ބަލާނަމަ، ބިން އިތުރުކޮށް، މަގުތައް ހަދައި، ފަތުރުވެރިކަމަށް އިތުރު ރަށްތަށް އުފައްދައި، އަދި އެއަރޕޯރޓް ތަރައްގީކުރުން ކުރިއަށްގެންދަނީ އެކުއެކީގައިކަމަށެވެ. ހަންކެޑެގެ އިތުރަށް, ފަތުރުވެރިކަމަށް މުޅިން އަލަށް އިތުރުކުރެވޭ އިތުރު 5 ރަށް ދާދި އަވަހަށް ފެނިވަޑައިގަންނަވާނެ ކަމަށެވެ.
ރައީސް ވިދާޅުވީ، މީގެ 5 އަހަރު ކުރިން އައްޑޫ ސިޓީން އެދުނު ކަންކަން އެދަނީ ހިނގަމުން ކަމަށާއި، އަދި ޖުމްލަ 7000 ޓޫރިސްޓް އެނދުގެ އަމާޒު އައްޑޫގައި ހާސިލުކުރުމަށް މިހާރު ހުރަހެއް ނެތްކަމަށެވެ. ޝަންގްރިއްލާއާއި ހަންކެޑެގެ އިތުރަށް އަމިއްލަ ފަރާތްތަކުން ދިގުމުއްދަތަށް ކުއްޔަށް ނަގާފައިވާ ބިންތައް އޮޕަރޭޝަނަށް ގެނައުމަށް، މިހާރު ދައްޗެއް ނެތްކަމަށް ރައީސް ވިދާޅުވިއެވެ.
