އަލިފާން ރޯވި ދޯނި އަނދާ ހުލި، މުދާތައް އޮޔާދާތީ ސަމާލުވުމަށް އިލްތިމާސްކޮށްފައިވޭ

މާލެއިން ފުރައިގެން ރ. ރަސްގެތީމަށް ދަތުރުކުރަމުން ދަނިކޮށް އަލިފާން ރޯވި ދޯނި އަނދާ ހުލިވެއްޖެއެވެ.

އަލިފާނުގެ ހާދިސާ ހިނގާފައިވަނީ "ހޮރައިޒިއާ 2" ގައެވެ. މި އަލިފާނުގެ ހާދިސާ ހިނގާފައިވަނީ ދޯނީގެ އިންޖީނު ރޫމްގައި ރޯވެގެން ކަމަށް އެމްއެންޑީއެފުން މައުލޫމާތުދެއެވެ. މި ހާދިސާގެ ރިޕޯޓު ލިބިފައިވަނީ ހުކުރު ދުވަހުގެ ރޭ 19:16 އެހާއިރެވެ.

މި ދޯނީގައި އަލިފާން ރޯވެފައި ވަނީ ބ.އަތޮޅު ފޯ ސީޒަން ރިސޯޓް (ލަނޑާ ގިރާވަރު) އުތުރުން 3.04 ނޯޓިކަލް މޭލު ބޭރުންނެވެ.

މިހާދިސާއާ ގުޅޭގޮތުން ފުލުހުން ބުނީ އަލިފާން ރޯވި ދޯނި އަޑިއަށް ގޮސްފައިވާ ކަމަށާއި، ދޯނީގައި ހުރި މުދާތައް އޮޔާދާތީ އެސަރަހައްދުން ދަތުރުކުރާ ފަރާތްތަކުން ސަމާލުވާން ޖެހޭ ކަމަށެވެ.

ފުލުހުން ބުނީ ދޯނީގައި ތިބި 10 މީހުން ފޯ ސީޒަން ރިސޯޓްގެ ލޯންޗަކަށް ނަގައި، ބ.ކަމަދޫއަށް ގެންގޮސްފައިވާ ކަމަށެވެ. އެމީހުންނަށް އެހީތެރިކަން ފޯރުކޮށްދިނުމުގެ މަސައްކަތް ކައުންސިލްއާ ގުޅިގެން ކުރަމުންދާ ކަމަށް ފުލުހުން ބުނެއެވެ. އަދި އެ އެންމެންގެ ހާލުވެސް ރަނގަޅު ކަމަށް ފުލުހުން ބުނެއެވެ.

ފުލުހުން ވަނީ އަލިފާން ނިއްވުމުގެ މަސައްކަތުގައި ސޮނޭވާ ފެންފުށި ރިސޯޓުން ދީފައިވާފައިވާ އެހީތެރިކަމަށާއި، މީހުން ސަލާމަތް ކުރުމަށް އަނަންތަރާ ރިސޯޓު އަދި ފޯ ސީޒަން ރިސޯޓުން ދީފައިވާ އެއްބާރުލުން ފާހަގަކޮށް ޝުކުރު އަދާކޮށްފައެވެ.