އޭސީ މިލާންގެ ޒުވާން ތަރި، ރަފައެލް ލިއާއޯގެ އެއްބަސްވުން އެ ޓީމުން އައުކޮށްފިއެވެ.
ދިގު މުއްދަތަކަށް ރަފައެލް ލިއާއޯގެ އެއްބަސްވުން އައުކުރިކަމަށް އެ ޓީމުން ރަސްމީކޮށް އިއުލާނުކުރީ ހުކުރު ދުވަހުއެވެ. އޭނާގެ އެއްބަސްވުން އައުކުރީ 2028 ވަނަ އަހަރުގެ ޖޫން މަހުގެ ނިޔަލަށެވެ.
2019 ވަނަ އަހަރުގެ ހޫނު މޫސުމުގައި އޭސީ މިލާންއާ ގުޅުނު ލިއާއޯ ވަނީ އެ ޓީމަށް 162 މެޗު ކުޅެ، 41 ލަނޑު ޖަހާ، 29 ލަނޑު ޖެހުމަށް އެހީތެރިވެދީފަވެއެެވެ. އަދި މިދިޔަ ސީޒަނުގައި އިޓަލިއަން ލީގުގެ އެންމެ މޮޅު ކުޅުންތެރިޔަކަށް ހޮވުނީވެސް ލިއާއޯއެވެ.
ލީގު ތާވަލުގެ ހަތަރު ވަނައިގައި މިވަގުތު އޮތްއިރު، އިޓަލިއަން ސުޕަ ކަޕުން އޭސީ މިލާން ބަލިވީ ފައިނަލުންނެވެ. އަދި ޗެމްޕިއަންސް ލީގުން ކެޓީ ސެމީ ފައިނަލުންނެވެ. ޗެމްޕިއަންސް ލީގު ސެމީގައި އެ ޓީމަށް އެންމެ ބޮޑަށް ދެއްކީ ލިއާއޯ ނެތް ތަންކޮޅެވެ.
