ގޭބީސީތަކުން މީޓަރ އެކްސްކްލޫޝަން ފޯމް ނުފުރާނަމަ، ކުނީގެ ފީ ބިލްގައި ހިމެނުން އެކަށީގެންވޭ
މީޓަރު ޓައިކުރުމަށް އެދުމަކީ ވެރިފަރާތުގެ ޒިންމާއެއް
މާލޭގެ މަގުތައް ސާފުކުރުމުގައި ހަރަކާތްތެރިވާ އަންހެނުންތަކެއް
ގޭބީސީތަކުން މީޓަރ އެކްސްކްލޫޝަން ފޯމް ނުފުރާނަމަ ކުނީގެ ފީ ބިލްގައި ހިމެނުން އެކަށީގެންވާކަމަށް، ވެމްކޯގެ މެނޭޖިންގ ޑިރެކްޓަރު ޔޫސުފް ސިރާޖު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ޔޫސުފް ސިރާޖު ވިދާޅުވީ ގެނެވުނު ބަދަލާއެކު ކޮންމެ މީޓަރަކަށް ކުނި ފީ އިތުރުވެގެން އަންނާނެކަމަށާއި، މީޓަރ އެކްސްކްލޫޝަން ފޯމް މެދުވެރިކޮށް ރަޖިސްޓްރީ ނުކުރާނަމަ، ކަރަންޓު ބިލް އަންނައިރު ކުނީގެ ފީ އެ ބިލަކާއެކު އައުމަކީ އެކަށީގެންވާ ކަމެއް ކަމަށެވެ. އަދި މީޓަރު ޓައިކުރުމަށް އެދުމަކީ ވެރިފަރާތުގެ ޒިންމާއެއް ކަމަށްވެސް ވިދާޅުވިއެވެ.
ޕްރޮގްރާމުގައި ވާހަކަފުޅުދައްކަވަމުން އެންވަޔަރަމެންޓް މިނިސްޓްރީގެ އިންފޮމޭޝަން އެޑިއުކޭޝަން އެންޑް ކޮމިއުނިކޭޝަންސް ސްޕެޝަލިސްޓް އަހްމަދު އާޒިމް ވިދާޅުވީ, ކުނި މެނޭޖުކުރުމުގެ ޚިދުމަތަށް ރަޖިސްޓްރީވުމަށް ލިބެންޖެހޭ އަދަދަށް ފޯމްތައް ނުލިބޭތީ އެއީ އޮތް ވަރަށް ބޮޑު ކަންބޮޑުވުމެއް ކަމަށެވެ. އާޒިމް ވިދާޅުވީ މިފަހަރު ރައްޔިތުންނަށް ފަސޭހަކުރުމުގެ ގޮތުން، ފޯމްތައްވެސް އޮންލައިންކޮށް ލެވޭގޮތަށް ހަމަޖައްސާފައިވާކަމަށެވެ.
ބިލް ޓައިކުރުމުގެ މަޝްވަރާތައް އެންމެ ފުރަތަމަ ފެށިގެންދިޔައިރު ވެމްކޯއިން ބުނަމުންދިޔައީ 01 އޭޕްރީލް 2023ން ފެށިގެން ވެމްކޯގެ ބިލު، ސްޓެލްކޯގެ ކަރަންޓު ބިލުގެ ތެރޭގައި ހިމެނޭނެކަމަށެވެ. އެހެންނަމަވެސް ގިނަ މަޝްވަރާތަކަކަށްފަހު, ބިލު އެއްކޮށްލުމުގެ އެއްބަސްވުމަކާ ހަމައަށް އާދެވިފައިވަނީ ދެ މަސް ފަހުންނެވެ.
