ކީޕަރު މާކް ފްލެކެން ބްރެންޓްފޯޑަށް، ރާޔާ ޓީމު ދޫކޮށްލުން ގާތް

ފްރީބާގްގެ ކީޕަރު މާކް ފްލެކެން ބްރެންޓްފޯޑާއެކު އެއްބަސްވުމެއްގައި ސޮއިކޮށްފިއެވެ.

ބްރެންޓްފޯޑުން ފްލެކެން ގެނައިކަން އާންމުކޮށް އިއުލާނުކޮށްފައިވަނީ އެ ޓީމުގެ އެއް ނަންބަރު ކީޕަރު، ޑޭވިޑް ރާޔާ އެހެން ޓީމަކަށް ބަދަލުވުމަށް މަސައްކަތްކުރާ ދަނޑުވަޅެއްގައެވެ. އެއްބަސްވުމުގައި ބާކީ އެއް އަހަރު އޮތްއިރު، ރާޔާގެ އަގަކީ 40 މިލިއަން ޕައުންޑެވެ. އޭނާހެ އެޖެންޓު ބުނި ގޮތުގައި ޓީމުން އެ އަގު ދަށް ނުކޮށްފިނަމަ، އެއްބަސްވުން ހަމަވުމުން ރާޔާ ޓީމު ދޫކޮށްލާނީ ހިލޭ ޓްރާންސްފާ އެއްގެގޮތުގައެވެ.

ބްރެންޓްފޯޑުން ފްލެކެން ގެނައީ 11 މިލިއަން ޕައުންޑަށެވެ. މި އެއްބަސްވުމުގެ މުއްދަތަކީ ހަތަރު އަހަރު ދުވަހެވެ. ޓީމުގެ ކޯޗު، ތޯމަސް ފްރޭންކް ބުނީ ފެލްކެން އަކީ މޮޅު، ތަޖުރިބާކާރު ކުޅުންތެރިއެއްކަމަށެވެ. އަދި ފްރީބާގް އިން މި ސީޒަން ތާވަލުގެ ފަސް ވަނައިގަ ނިންމާލާ ޔުރޮޕާ ލީގުން ޖާގަ ހޯދިއިރު ފްލެކެންގެ ދައުރު ބޮޑުކަމަށް ކޯޗު ބުންޏެވެ. ފްލެކެން ބުނި ގޮތުގައި ޕްރިމިއަރ ލީގަށް އައުމަކީ އަބަދުވެސް ދެކެމުން އައި ހުވަފެނެކެވެ.

މާކް ފްލެކެން ވަނީ މި ސީޒަނުގެ 13 މެޗުގައި ބައިކޮޅަށް ލަނޑެއް ވަނަނުދީ ނިންނާލާފައެވެ.