ކަންސޭލޯ ބާސެލޯނާ އަށް ދޭން ސިޓީން ބޭނުން ނުވީ!
އެކަމަށް ކަންސޭލޯ އަށް ހުށަހެޅި، ކުޅުންތެރިޔާގެ ފަރާތުން އެކަމަށް އާބަސް ލިބުނު
ލޯނު އެއްބަސްވުމެއްގެ ދަށުން ބަޔާނަށް ކުޅެމުން އަންނަ ކަންސޭލޯ
މެންޗެސްޓަރ ސިޓީ އަށް ކުޅެމުން އައި ޔާއޯ ކަންސޭލޯ ބާސެލޯނާ އަށް ދޫކޮށްލަން އެ ކުލަބުން ބޭނުންނުވީ ކަމަށް ބާސެލޯނާގެ ކޯޗު ޒަވީ ހެނާންޑޭޒް ބުނެފި އެވެ.
އުމުރުން 29 އަހަރުގެ ކުޅުންތެރިޔާ ބާސެލޯނާ އަށް ގެންދިޔުމަށް އެ ކުލަބުން ވަނީ މަސައްކަތްކޮށްފަ އެވެ. ނަމަވެސް އެކަން ކާމިޔާބުވާ ގޮތް ނުވެ، ކަންސޭލޯ ބަދަލުވީ ބަޔާން މިއުނިކަށެވެ. ލޯނު އެއްބަސްވުމެއްގެ ދަށުން އޭނާ ބަޔާނަށް ބަދަލުވީ މި ސީޒަންގެ ނިޔަލަށެވެ. ކުރިއަށް އޮތް ޓްރާންސްފާ މާކެޓާ ގުޅޭ ގޮތުން ވާހަކަ ދައްކަމުން ޒަވީ ބުނީ، ޖެނުއަރީ ގައި ކަންސޭލޯ ބާސެލޯނާ އަށް ގެނައުމުގެ ފުރުސަތު އޮތް ކަމަށެވެ. އެކަމަށް ކަންސޭލޯ އަށް ހުށަހެޅި ކަމަށާއި، ކުޅުންތެރިޔާގެ ފަރާތުން އެކަމަށް އާބަސް ލިބުނު ކަމަށް ޒަވީ ބުންޏެވެ. ނަމަވެސް އެކަމުގައި ސިޓީން އެކުލަބުގެ އެތެރޭގައި ކުރިއަށް ގެންދިޔަ މަޝްވަރާތަކަށް ފަހު ނިންމީ، ކަންސޭލޯ ބާސެލޯނާ އަށް ދޫނުކުރަން ކަމަށް އޭނާ ވަނީ ބުނެފަ އެވެ.
ކަންސޭލޯ ބަޔާނަށް ބަދަލުވެ އެ ޓީމަށް ކުޅެދިން 21 މެޗުގައި ވަނީ އެއް ލަނޑު ޖަހައިފަ އެވެ. ޒަވީ ބުނީ ކަންސޭލޯ ގެންނަން އެންމެ ފުރަތަމަ ވެސް ބާސެލޯނާ އިން ބޭނުންވީ، އޭނާގެ ކުޅުމުގެ ހުނަރު މޮޅުވުމުން ކަމަށެވެ. އަދި ކަންސޭލޯ އަކީ ބާސެލޯނާ އިން ބޭނުންވާ ފެންވަރުގެ ކުޅުންތެރިޔެއް ކަމަށް ޒަވީ ބުންޏެވެ. ކުރިއަށް އޮތް ތަނުގައި ކަންސޭލޯ ހޯދުމަށް މަސައްކަތް ކުރާނެތޯ ސުވާލު ކުރުމުން ޒަވީ ބުނީ، ސްކޮޑު ވަރުގަދަ ކުރުމަށް ބާސެލޯނާ އިން މަސައްކަތް ކުރާނެ ކަމަށެވެ. ނަމަވެސް ވަކި ކުޅުންތެރިޔެއްގެ ނަން ބުނަން ބޭނުންނުވާ ކަމަށާއި، ކުޅުންތެރިން ހޯދުމުގެ ކުރިން ބާސެލޯނާ އިން ރަނގަޅު ކުރަން ޖެހޭ އެހެން ކަންކަން ހުރި ކަމަށް އޭނާ ބުންޏެވެ. ޒަވީ އެ އިޝާރާތް ކުރީ ބާސެލޯނާާގެ މާލީ ހާލަތުގެ މައްޗަށެވެ. އެކުލަބުން މިހާރު އަންނަނީ މާލީ ހާލަތު ރަނގަޅު ކުރުމަށް މަސައްކަތް ކުރަމުންނެވެ.
