ކުޅުންތެރިންގެ މުސާރަ މައްސަލައިގައި ޔުވެންޓަސްއަށް ބޮޑު ޖޫރިމަނާއެއް

ކުޅުންތެރިންގެ މުސާރަ މައްސަލައަކާ ގުޅިގެން ޔުވެންޓަސް 718،000 (ހަތް ލައްކަ އަށާރަ ހާސް) ޔޫރޯ އިން ޖޫރިމަނާކޮށްފިއެވެ.

ޔުވެންޓަސްގެ 10 ޕޮއިންޓު ދާދި ފަހުން އުނިކޮށްފައިވާއިރު، މިހާރުކޮށްފައިވާ ޖޫރިމަނާ ދެއްކުމަށްފަހު އިތުރު ފިޔަވަޅެއް ނާޅާނެ ގޮތަށް އިޓަލީގެ ފުޓުބޯޅަ ފެޑަރޭޝަނާއި ޔުވެންޓަސް އިންވަނީ އެއްބަސްވެފައެވެ.

ޔުވެންޓަސް އާ ދެކޮޅަށް ދައުވާ ކޮށްގެން ގިނަ ދުވަސްތަކަކަށް ކުރިޔަށް ދިޔަ މައްސަލަ ވަނީ މި ޖޫރިމަނާއާއެކު ނިމިފައެވެ. ކުލަބުގެ އިތުރުން، އިޓަލީގެ ފުޓުބޯޅަ ފެޑަރޭޝަނުން ވަނީ ޔުވެންޓަސްގެ ގިނަ އޮފިޝަލުންތަކެއްވެސް ޖޫރިމަނާކޮށްފައެވެ. އޭގެ ތެރޭގައި ވައިސް ޗެއާމަން ޕަވެލް ނެޑްވެޑް އާއި ކުރީގެ ސްޕޯޓިންގ ޑިރެކްޓަރ އަދި މެނޭޖިންގ ޑިރެކްޓަރ ފަބިއޯ ޕަރަޓިސީ ހިމެނެއެވެ.

ކުލަބުން ބުނީ މި ނިންމުމާއެކު ކޯޗު މަސިމިލިއާނޯ އެލެގްރީ އާއި ކުޅުންތެރިންނަށް ކުރިޔަށް އޮތް ސީޒަނަށް ތައްޔާރުވުމަށް މަސައްކަތް ކުރެވޭނެ ކަމަށެވެ. ޖެނުއަރީ ޓްރާންސްފާ މައްސަލައިގައި ފުރަތަމަ އުނިކުރީ ޔުވެންޓަސްގެ 15 ޕޮއިންޓެވެ. ނަމަވެސް ފަހުން ވަނީ މައްސަލަ އިތުރަށް ބަލާ، 10 ޕޮއިންޓަށް މަދުކޮށްފައެވެ.

ޔުވެންޓަސްގެ 10 ޕޮއިންޓު އުނިކުރުމާއެކު މިވަގުތު އޮތީ ތަވަލުގެ ހަތް ވަނައިގައެވެ. ނަމަވެސް ޔުރޮޕާ ލީގު ނުވަތަ ކޮންފަރެންސް ލީގުން ޖާގަ ހޯދުމުގެ ފުރުސަތު އެ ޓީމަށް އެބައޮތެވެ.