ޗެމްޕިއަންސް ލީގުގެ ޖާގަ އޭސީ މިލާން އިން ކަށަވަރުކޮށްފި
29 މެއި 2023 | ހޯމަ 06:51އޭސީ މިލާން ވަނީ މި ސީޒަނުގެ ޗެމްޕިއަންސް ލީގު ސެމީ އާ ހަމައަށް ދަތުރުކޮށްފައި
އޭސީ މިލާން އަދި ޔުވެންޓަސް ބައްދަލުކުރި މެޗަށްފަހު އޭސީ މިލާން ކުޅުންތެރިން ކޯޗާ އެކު
ކުރިޔަށް އޮތް ސީޒަނުގެ ޗެމްޕިއަންސް ލީގުގެ ޖާގަ އޭސީ މިލާން އިން ކަށަވަރުކޮށްފިއެވެ.
އޭސީ މިލާންއަށް ޗެމްޕިއަންސް ލީގުން ޖާގަ ކަށަވަރުވީ އާދިއްތަ ދުވަހު ޔުވެންޓަސް ކައިރިން 1-0 ގެ ނަތީޖާއަކުން މޮޅުވުމުންނެވެ. މެޗުގެ ހަމައެކަނި ލަނޑު 40 ވަނަ މިނެޓުގައި ކާމިޔާބުކޮށްދިނީ އޮލިވިއާ ޖިރޫޑްއެވެ.
އޭސީ މިލާން އަށް ގަދަ ހަތަރެއް ވަނީ ޔަގީންވެފައެވެ. އެ ޓީމު ހަތަރު ވަނައިގައި އޮތީ 67 ޕޮއިންޓާއެކުއެވެ. ބާކީ އެންމެ މެޗެއް އޮތްއިރު ފަސް ވަނައިގައި އޮތް އެޓްލާންޓާއަށް ލިބިފައިވަނީ 61 ޕޮއިންޓެވެ. މެޗުން ބަލިވި ޔުވެންޓަސްގެ 10 ޕޮއިންޓު ވަނީ ދާދި ފަހުން އުނިކުރިނަމަވެސް ޔޫރަޕުގެ މުބާރާތަކުން އެޓީމަށް ޖާގަ ވަނީ ކަށަވަރުވެފައެވެ. ފަހު މެޗުގައި އެޓްލާންޓާ ނުވަތަ ރޯމާ މޮޅު ނުވެއްޖެނަމަ ޔުވެންޓަސް އަށް ޔުރޮޕާ ލީގު ކުޅުމުގެ ފުރުސަތު އޮންނާނެއެވެ. މިވަގުތު އޮތީ ކޮންފަރެންސް ލީގުގެ ޖާގައިގައެވެ.
އޭސީ މިލާން ވަނީ މި ސީޒަނުގެ ޗެމްޕިއަންސް ލީގުގައިވެސް ރަނގަޅު ކުޅުމެއް ދައްކާފައެވެ. އެ ޓީމު ކެޓީ ވާދަވެރި އިންޓަރ މިލާން ކައިރިން ސެމީގައި ބަލިވުމުންނެވެ.
