ރޮނާލްޑޯގެ އަލް ނަސްރު އެއްވަރުވެ އިއްތިހާދަށް ލީގު ލިބިއްޖެ

ސައުދީ ޕްރޯ ލީގުގައި ރޮނާލްޑޯގެ އަލް ނަސްރު ކުޅުނު މެޗުން އެއްވަރުވެ، ލީގުގެ ޗެމްޕިއަންކަން އިއްތިހާދަށް ކަށަވަރުވެއްޖެއެވެ.

މި ސީޒަނުގެ ދެވަނައަށް ފަހު މެޗަށް ނިކުތްއިރު، އަލް ނަސްރު އޮތީ ދެވަނައިގަ 63 ޕޮއިންޓާއެކުއެވެ. އެއްވަނައިގައި 66 ޕޮއިންޓާއެކު އޮތީ އިއްތިހާދެވެ. އަލް ނަސްރަށް މެޗުން މޮޅު ނުވެވި، އިއްތިހާދު މޮޅުވުުމުން އިއްތިހާދަށް ވަނީ ލީގު ލިބިފައެވެ. މިއީ 2009 ވަނަ އަހަރުގެ ފަހުން އިއްތިހާދަށް ލީގު ކާމިޔާބު ކުރެވުނު ފުރަތަމަ ފަހަރެވެ.

އަލް އިއްތިފާގް އާއި އަލް ނަސްރު ބައްދަލުކުރި މެޗު ނިމުނީ 1-1 އިން ދެ ޓީމު އެއްވަރުވެގެނެވެ. ފުރަތަމަ ހާފު ނިމެން ދެ މިނެޓަށް ވެފައިވަނިކޮށް އަލް އިއްތިފާގަށް ކުރިހޯދަދިނީ ޔޫސުފޫ ނިއަކާޓޭއެވެ. މެޗުގެ 56 ވަނަ މިނެޓުގައި އަލް ނަސްރަށް ނަތީޖާ ހަމަހަމަ ކޮށްދިނީ ބްރެޒިލްގެ ލުއިޒް ގުސްތާވޯއެވެ.

އިއްތިހާދުން އަލް ފޭހާގެ މައްޗަށް ކުރިހޯދީ 3-0 ގެ ނަތީޖާއަކުންނެވެ. މި މެޗުގައި ބްރެޒިލްގެ ރިކާޑޯ ޑަ ސިލްވާ ވަނީ ދެ ލަނޑު ޖަހާފައެވެ.

ޖެނުއަރީގައި ރޮނާލްޑޯ އަލް ނަސްރަށް ބަދަލުވިއިރު، ފުރަތަމަ ސީޒަން ނިންމާލަން ޖެހުނީ ތައްޓެއް ނުލިބި ހުސްއަތާއެވެ.