ސައުދީ ޕްރޯ ލީގުގެ އަލް ނަޞްރަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އަށް އޮތީ އިޙުތިރާމް ކަމަށާއި، ރޮނާލްޑޯ އަދި ވެސް އަންނަނީ މަތީ ފަންތީގައި ކުޅެމުން ކަމަށް، އެމެރިކާގެ އިންޓަރ މިއާމީ އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނަލް މެސީ ބުނެފި އެވެ.

ދާދި ފަހުން ރޮނާލްޑޯއާ ގުޅޭ ގޮތުން ވާހަކަ ދައްކަމުން މެސީ ބުނެފައި ވަނީ، ރޮނާލްޑޯ އަށް، އަދި އޭނާގެ ފުޓުބޯޅަ ކެރިއަރަށް އޮތީ އިންތިހާ އަށް އިޙުތިރާމް ކަމަށެވެ. އަދި މިވަގުތު ވެސް ރޮނާލްޑޯ އަންނަނީ މަތީ ފަންތީގައި ކުޅެމުން ކަމަށް މެސީ ވަނީ ފާހަގަ ކޮށްފަ އެވެ.

މީގެ އިތުރުން ދެ ކުޅުންތެރިންގެ ދެމެދުގައި އޮތް ވާދަވެރިކަމާ ގުޅޭ ގޮތުން ސުވާލު ކުރުމުން މެސީ ބުނެފައި ވަނީ، ވާދަވެރިކަން އޮތީ ހަމައެކަނި ދަނޑު މަތީގައި ކަމަށެވެ. އެއީ ކޮންމެ މީހަކު ވެސް ބޭނުން ވަނީ އެ މީހަކު ކުޅެމުން އަންނަ ޓީމު މޮޅުވާންކަން ފާހަގަކޮށް މެސީ ބުނީ، ހުރިހާ ކަމެއް ވެސް އޮތީ ދަނޑު މަތީގައި ކަމަށެވެ.

އެހެން ނަމަވެސް، ދަނޑުން ބޭރުގައި ދެ ކުޅުންތެރިންނަކީ ވެސް އާދައިގެ ދެ މީހުން ކަމަށް މެސީ ވަނީ ބުނެފަ އެވެ. ރޮނާލްޑޯއާ މެސީ އަކީ އެހާ ގާާތް ދެ ކުޅުންތެރިން ނޫން ކަމަށާއި، ސަބަބަކީ ދެ ކުޅުންތެރިން ވެސް އެހާ ގިނައިން ބައްދަލުވެފައި ނެތުން ކަމަށް ވެސް މެސީ ބުންޏެވެ.

މީގެ އިތުރުން މެސީ ބުނީ އެހާ ގާތް ރަޙުމަތްތެރި ކަމުގެ ގުޅުމެއް ނެތް ނަމަވެސް، އަބަދު ވެސް އެއް ކުޅުންތެރިޔަކު އަނެއް ކުޅުންތެރިޔަކަށް އަދާ ކުރަނީ އިންތިހާ އިޙުތިރާމް ކަމަށާއި، އޭގައި އިތުރު އެހެން ސަބަބެއް ނޯންނާނެ ކަމަށެވެ.

މެސީ އާއި ރޮނާލްޑޯ ސްޕެއިންގައި ކުޅުނުއިރު މި ދެ ކުޅުންތެރިންގެ ވާދަވެރިކަން ބޮޑެވެ. ޚާއްސަކޮށް ބާސެލޯނާ އާއި ރެއާލް މެޑްރިޑް ބައްދަލު ކުރާ މެޗުތަކުގައި މެސީ އާއި ރޮނާލްޑޯގެ ވާދަވެރިކަން ފެނިގެންދެ އެވެ. މި ދެ ކުޅުންތެރިން ވަނީ އެތައް ފަހަރަކު ދުނިޔޭގެ މޮޅު ކުޅުންތެރިޔާ އަށް ދެމުން އަންނަ ބެލެންޑިއޯ އެވޯޑަށް ވެސް ވާދަކޮށްފަ އެވެ.

މެސީ ވަނީ މިހާތަނަށް އަށް ފަހަރު ބެލެންޑިއޯ އެވޯޑު ކާމިޔާބު ކޮށްފަ އެވެ. އަދި ރޮނާލްޑޯ ވަނީ ފަސް ފަހަރު ބެލެންޑިއޯ އެވޯޑު ކާމިޔާބު ކޮށްފަ އެވެ. މި ދެ ކުޅުންތެރިން ސްޕެއިން ދޫކޮށްލި ފަހުން، އެންމެ ފަހުން މެޗެއް ކުޅުނީ 2023 ވަނަ އަހަރު އެވެ.

އެއީ ރޮނާލްޑޯ ކުޅެމުން އަންނަ އަލް ނަޞްރާއި، ސައުދީގެ އަލް ޙިލާލް އިން އެކުލަވާލި ޓީމަކާއި، މެސީ އޭރު ކުޅެމުން އައި ފްރާންސްގެ ޕެރިސް ސެއިންޓް ޖާމަން (ޕީއެސްޖީ) ބައްދަލު ކުރި މެޗެވެ.