ކ. މާލެ
|
27 މެއި 2023 | ހޮނިހިރު 13:21
ކުރިން އިލެކްޝަންސް ކޮމިޝަނުން ބޭއްވި އިންތިޚާބެއްގެ ތެރެއިން
ކުރިން އިލެކްޝަންސް ކޮމިޝަނުން ބޭއްވި އިންތިޚާބެއްގެ ތެރެއިން
އިލެކްޝަންސް ކޮމިޝަން
ރިޔާސީ އިންތިޚާބު އޮބްޒަރވްކުރުން
ރިޔާސީ އިންތިޚާބު އޮބްޒަރވްކުރުމަށް 15 ގައުމަކަށް ދައުވަތު ފޮނުވައިފި
 
މިއަހަރުގެ ރިޔާސީ އިންތިޚާބު އޮންނާނީ 9 ސެޕްޓެމްބަރުގައި
 
15 ގައުމެއްގެ އިލެކްޝަންސް އިދާރާއަށް ރަސްމީކޮށް ދައުވަތު ފޮނުވާފައިވަނީ މިދިޔަ ހަފުތާގެ ތެރޭގައި
 
150 މީހުން ރަޖިސްޓަރީކޮށްފިނަމަ، 8 ގައުމެއްގައި ވޯޓުލާ މަރުކަޒު ގާއިމްކުރާނެ

ރިޔާސީ އިންތިޚާބު 2023 އޮބްޒަރވްކުރުމަށް 15 ގައުމަކަށް ރަސްމީކޮށް ދައުވަތު ފޮނުވާފައިވާކަމަށް އިލެކްޝަން ކޮމިޝަން (އީސީ)ން ބުނެފިއެވެ.

އިލެކްޝަންސް ކޮމިޝަންގެ ނައިބު ރައީސް އިސްމާއީލް ހަބީބު ވިދާޅުވީ، ރިޔާސީ އިންތިޚާބު 2023 އޮބްޒަރވްކުރުމަށް، 15 ގައުމެއްގެ އިލެކްޝަންސް އިދާރާއަށް އިލެކްޝަންސް ކޮމިޝަނުން މިދިޔަ ހަފުތާގައި ރަސްމީކޮށް ދައުވަތު ފޮނުވާފައިވާކަމަށެވެ.

މި 15 ގައުމުގެ ތެރޭގައި ހިމެނެނީ ޖޯޖިއާ، ފިލިޕީންސް، އިންޑޮނޭޝިއާ، ތައިލެންޑް، ސައުތު ކޮރެއާ، ސައުތު އެފްރިކާ، ކިރްގިސްތާން، ހޮންޑިއުރަސް, ސްރީލަންކާ، ބޮސްނިއާ، އޮސްޓްރޭލިއާ، ޖޯޑަން، ކެނެޑާ، ޖަޕާން އަދި ނޭޕާލެވެ.

ރިޔާސީ އިންތިޚާބު 2023 އޮބްޒަރވްކުރުމަށް 15 ގައުމަކަށް ރަސްމީކޮށް ދައުވަތު ފޮނުވާފައިވާއިރު، މިއަހަރުގެ ރިޔާސީ އިންތިޚާބުގައި 150 މީހުން ރަޖިސްޓަރީކޮށްފިނަމަ 8 ގައުމެއްގައި ވޯޓުލާ މަރުކަޒު ގާއިމްކުރުމަށް އީސީން ވަނީ ނިންމާފައެވެ.

އެގޮތުން އިންޑިޔާގެ ޓްރިވެންޑްރަމް، ނިއު ދިއްލީ، ސްރީލަންކާގެ ކޮލަމްބޯ، މެލޭޝިޔާގެ ކުއަލަ ލަމްޕޫރު، ސިންގަޕޫރު، އިނގިރޭސި ވިލާތުގެ ލަންޑަން، ތައިލެންޑުގެ ބެންގކޮކް، އެކުވެރި އަރަބި އިމާރާތުގެ އަބޫދާބީ އަދި ޖަޕާނުގެ ޓޯކިޔޯގައި، ވޯޓުލުމަށް 150 މީހުން ރަޖިސްޓަރީކޮށްފިނަމަ އެ 8 ގައުމުގެ 9 ސިޓީގައި، ވޯޓުލާ މަރުކަޒު ގާއިމްކުރުމަށް ކޮމިޝަނުން ނިންމާފައިވެއެވެ.

ކުރިއަށް އޮތް ރިޔާސީ އިންތިޚާބަށް ތައްޔާރުވުމުގެ މަސައްކަތް އީސީން ކުރަމުންދާއިރު، ވީހާވެސް ގިނަ ރައްޔިތުންނަށް ވޯޓު ލެވޭނެ އިންތިޒާމް ހަމަޖެއްސުމުގެ މަސައްކަތް ކޮމިޝަނުން ދަނީ ކުރަމުންނެވެ. އަދި ރިޔާސީ އިންތިޚާބަކީ އިންސާފުވެރި، ދެފުށް ފެންނަ އިންތިޚާބަކަށް ވާނެކަމުގެ ޔަގީންކަން ކޮމިޝަނުން ދެއެވެ.

މިއަހަރު ބާއްވާ ރިޔާސީ އިންތިޚާބުގައި 282،755 މީހުންނަށް ވޯޓުލުމުގެ ހައްގު ލިބިފައިވާ އެކަމަށް އީސީން ހާމަކޮށްފައިވާއިރު އެންމެފަހުން 2018 ވަނަ އަހަރު ބޭއްވި ރިޔާސީ އިންތިޚާބުގައި ވޯޓުލުމުގެ ހައްގު ލިބިފައިވަނީ 263،000 މީހުންނަށެވެ.

މިއަހަރުގެ ރިޔާސީ އިންތިޚާބު އޮންނާނީ 9 ސެޕްޓެމްބަރުގައެވެ. އަދި ދެވަނަ ބުރެއް ބާއްވަން ޖެހިއްޖެނަމަ ބާއްވާނީ 30 ސެޕްޓެމްބަރުގައެވެ.

އެންމެ ފަހުން އަޕްޑޭޓް ކުރީ: 4 ހަފްތާ ކުރިން
ރިވިއު ކުރީ: އައިޝަތު ރިޔާޒް
0%
0%
0%
0%
0%
0%
ކޮމެންޓް