ލިވަޕޫލަށް ކުޅެމުން އަންނަ މިސްރުގެ ފޯވާޑް މުޙައްމަދު ޞަލާޙު، އެ ކުލަބު ދޫކޮށްނުލާނެކަމުގެ ޔަޤީންކަން އެބައޮތްކަމަށް ކޯޗު ޔާގަން ކްލޮޕް ބުނެފިއެވެ.
ކްލޮޕް މިހެން ބުނީ މި ސީޒަނުގެ އިނގިރޭސި ޕްރިމިއަރ ލީގުގެ ގަދަ ހަތަރަކުން ޖާގަ ނުލިބި، ލިވަޕޫލް ޔުއެފާ ޔޫރޮޕާ ލީގު ކުޅެން ޖެހުމުން ދެކެވެމުން އަންނަ ވާހަކަތަކާ ގުޅިގެންނެވެ. އެކަމާ ގުޅިގެން ޞަލާޙުވެސް ވަނީ ވާހަކަ ދައްކައިފައެވެ. އޭނާ ބުނީ އެއީ އެއްވެސް ވަރަކަށް އުންމީދުކުރި ކަމެއް ނޫންކަމަށާއި، ޔުއެފާ ޗެމްޕިއަންސް ލީގުން ޖާގަ ގެއްލުމުން ވަރަށް ހިތްދަތިވާކަމަށެވެ.
އެކަމާ ގުޅިގެން ވާހަކަދައްކަމުން ކްލޮޕް ބުނީ، ކުރިއަށް އޮތް ސީޒަނުގައިވެސް ޞަލާޙު ހުންނާނީ ލިވަޕޫލްގައި ކަމަށެވެ. ކްލޮޕް ބުނީ ލިވަޕޫލް ޗެމްޕިއަންސް ލީގަށް ކޮލިފައިނުވީ އޭނާގެ ސަބަބުން ކަމަށާއި، އޭނާ ކުލަބު ދޫކޮށްލަން ޖެހޭނެ ކަމަށް އެއްވެސް ކުޅުންތެރިޔަކު ބުނެފިނަމަ އެ ކުޅުންތެރިޔަކަށް ލިވަޕޫލުން ފުރުޞަތެއް ނޯންނާނެ ކަަމަށެވެ. ނަމަވެސް އެއީ ޞަލާޙުއާ ގުޅުންހުރި ކަމެއް ނޫންކަމަށާއި، އެކަން އެގޮތަށް ނުވާނެ ކަމަށްވެސް ކްލޮޕް ވަނީ ބުނެފައެވެ. އޭނާ އިތުރަށް ބުނީ ކުޅުންތެރިންނަށް އަބަދުވެސް އިތުބާރު އޮންނަކަމަށާއި، މިހާރު އޮތް ޙާލަތުން ލިވަޕޫލް އަރައިގަންނާނެ ކަމަށެވެ. އެކަމަށްޓަކައި އަންނަ ސީޒަނުގައި ޓީމު ވަރުގަދަކޮށް، ޓީމު ދާން ބޭނުންވާ މަންޒިލަށް ގެންދާނެ ކަމަށްވެސް ކްލޮޕް ވަނީ ބުނެފައެވެ.
ލީގުގައި ކޮންމެ ޓީމަކަށްވެސް މިހާރު ބާކީ އޮތީ އެންމެ މެޗެކެވެ. ލީގުގައި މިހާތަނަށް ކުޅުނު 37 މެޗުން 66 ޕޮއިންޓާއެކު ލިވަޕޫލް އޮތީ ފަސް ވަނާގައެވެ. ލީގުގެ ގަދަ ހަތަރަކަށް ވަނުމުގެ ފުރުޞަތު މިހާރު ވަނީ މުޅިން ގެއްލިފައެވެ.
