ހިޓްލަރުގެ ގެ ފުލުހުންގެ އިންސާނީ ހައްގުތަކާ ބެހޭ ތަމްރީނުތަކަށް ބޭނުން ކުރަން ނިންމައިފި

އޮސްޓްރިއާގައި ހުންނަ އެޑޮލްފް ހިޓްލަރުގެ ގެއެއް ފުލުހުންގެ އިންސާނީ ހައްގުތަކާ ބެހޭ ތަމްރީނުތަކަށް ބޭނުން ކުރުމަށް ނިންމައިފިއެވެ.

ޖަރުމަނު ބޯޑަރު ކައިރީގައި އޮންނަ ބްރައުނައުއަމް އިންގައި ހުންނަ އެ އިމާރާތް ސަރުކާރުން ގަތީ ގިނަ ދުވަސްތަކެއް ވަންދެން އުފެދުނު މައްސަލަތަކަކަށް ފަހު 2016 ވަނަ އަހަރު ކޮމްޕަލްސަރީ ޕާޗޭސް އަމުރެއްގެ ދަށުންނެވެ.

އެތަނުގެ ކޮންސްޓްރަކްޝަން މަސައްކަތް އަންނަ އަހަރުގެ ތެރޭގައި ފެށޭނެ ކަމަށް މިވަނީ ބެލެވިފައެވެ. އޮސްޓްރިއާގެ ބައެއް މީހުން ބޭނުންވަނީ އެ ގެ ތަޅާލުމަށެވެ. އަދި އަނެއް ބަޔަކު ބުނަނީ އެ ގެ އަކީ ސުލްހަވެރިކަމުގެ ގެއެއްގެ ގޮތުގައި ނުވަތަ ޗެރިޓީއެއްގެ ތަނެއްގެ ގޮތުގައި ބޭނުން ކުރަން ޖެހޭ ތަނެއް ކަމަށެވެ.

ހިޓްލަރު އުފަންވީ 1889 ވަނަ އަހަރު އޮސްޓްރިއާގައެެވެ. ހިޓްލަރު އުފަންވި ގޭގައި އޭނާ ހޭދަކުރީ އެންމެ ތިން އަހަރު ކަމަށްވީ ނަމަވެސް، އޭނާގެ ނާޒީ ފިކުރަށް ތާއިދު ކުރާ މީހުން އަދިވެސް އޭނާއަށް އިހުތިރާމު ކުރުމުގެ ގޮތުން އެ ގެ ކައިރިއަށް އެއްވެއެވެ.

ޖަރުމަނުގައި 1933އިން 1945އަށް އޮތް ހިޓްލަރުގެ އަނިޔާވެރި ވެރިކަމުގައި އޭނާ ޕޮލެންޑަށް އެރުން ދެވަނަ ބޮޑު ހަނގުރާމަ ފެށުމުގެ ސަބަބަކަށްވި އެވެ. އެހަނގުރާމައިގައި 85 މިލިއަނާ ގާތްކުރާ ވަރުގެ އަދަދަކަށް މީހުން މަރުވި ކަމަށް ބެލެވެ އެވެ.