މާލޭގައި ވައްކަން ކުރި މީހެއްގެ ގައިގައި ދަވާދު ހޭކި މައްސަލަ ބަލަމުންދާ ކަމަށް ފުލުހުން ބުނެފިއެވެ.
ފުލުހުން ބުނީ މާފަންނުގައި ހުރި ފިހާރައަކުން ވައްކަން ކުރި މީހަކު ހިފަހައްޓައިގެން އުޅޭ ކަމަށް މައުލޫމަތު ލިބިފައި ވަނީ ރޭ ދަންވަރުގެ ވަގުތެއްގައި ކަމަށެވެ.
އެ މައްސަލަ ފުލުހުންނަށް ރިޕޯޓްކުރުމުން ފުލުހުން އެ ސަރަހައްދަށް ދިޔަ އިރު ވައްކަން ކުރި މީހާ އާއި އޭނާ ހިފެހެއްޓި މީހުން އެ ސަރަހައްދު ދޫކޮށް ގޮސްފައިވާ ކަމަށް ފުލުހުން ވަނީ ބުނެފައެވެ.
އެހެންކަމުން އެ ސަރަހައްދުގެ ސީސީޓީވީ ފުޓޭޖް ބަލައިގެން ވައްކަން ކުރި މީހާ އާއި އޭނާ އާއި މެދު އެ އަމަލު ހިންގި މީހުން ދެނެގަތުމުގެ މަސައްކަތް ކުރާ ކަމަށް ފުލުހުން ވަނީ ބުނެފައެވެ.
ފުލުހުން މިހެން ބުނެފައިވާއިރު ވައްކަން ކުރި މީހާ ހިފަހައްޓާ އޭނާގެ ގައިގައި ކުލަ ހާކާފައިވާ މަންޒަރު ފެންނަ ވީޑިއޯ އެއް މީސްމީޑިއާގައި ވަނީ އާއްމުވެފައެވެ.
