119 ކިލޯ ޑްރަގް ކޭސް: ޝަރީއަތުގެ ކުރީގެ ހުށައެޅުންތަކަށް ގޮތް ނިންމުން ދެން އޮންނަ އަޑުއެހުމެއްގައި
މިހާރު މި މައްސަލަ ބައްލަވަނީ އެ ކޯޓަށް އަލަށް އައްޔަނު ކުރެއްވި ގާޒީ އިބްރާހިމް އިހުސާން
119 ކިލޯ ޑްރަގް ކޭސްގައި ހައްޔަރުކޮށް ދައުވާ އުފުލާފައިވާ މީހުން
މާލެއާއި ހުޅުމާލޭގައި ފުލުހުން ހިންގި ޑްރަގް އޮޕަރޭޝަނެއްގައި އަތުލައިގަތް 119 ކިލޯގެ މަސްތުވާތަކެތީގެ މައްސަލައިގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލަ މީގެ ކުރިން ބައްލަވަމުން ގެންދެވީ އެ ކޯޓުގެ ގާޒީ ދީބާނާޒް ފަހުމީއެވެ. ނަމަވެސް ދީބާނާޒް ހައިކޯޓަށް އައްޔަނު ކުރައްވާފައިވާތީ މިހާރު މި މައްސަލަ ބައްލަވަނީ އެ ކޯޓަށް އަލަށް އައްޔަނު ކުރެއްވި ގާޒީ އިބްރާހިމް އިހުސާންއެވެ.
ގާޒީ ވަނީ މި މައްސަލަ ގޮސްފައިވާ ހިސާބު ސާފު ކުރައްވާފައެވެ.
މިހާރު މި މައްސަލައިގައި އޮތީ ޝަރީއަތުގެ ކުރީގެ ހުށައެޅުންތަކަށް ގޮތެއް ނިންމުންކަމަށް ދައުލަތުގެ ވަކީލު ވިދާޅުވިއެވެ. ދިފާއުންވެސް ބުނެފައިވަނީ އެހެންނެވެ.
މި އަޑުއެހުމުގައި ގާޒީ ވަނީ ޝަރީއަތުގެ ކުރީގެ ހުށައެޅުންތަކާ ގުޅޭގޮތުން އިތުރަށް ވާހަކަ ދެއްކުމަށް ފުރުސަތު ދެއްވާފައެވެ. އަދި ދެން އޮންނަ އަޑުއެހުމެއްގައި އެ ހުށައެޅުންތަަކަށް ގޮތެއް ނިންމަވާނެކަމަށް ގާޒީ ވިދާޅުވިއެވެ.
މި މައްސަލައިގެ ޒިންމާ ވަކި މީހަކު ނަގަންޖެހޭ ގޮތަށް އަމަލުކުރާކަމުގެ ތުހުމަތާއެކު ދައުލަތުން ވަނީ އެކަމާ ކަންބޮޑުވުން މީގެ ކުރިން ފާޅުކޮށްފައެވެ.
ގާޒީ ދީބާނާޒް މި މައްސަލަ ބެއްލެވިއިރު ދައުލަތުގެ ވަކީލުން ވަނީ މި މައްސަލައިގައި ފެނިފައިވާ މަސްތުވާތަކެއްޗަށް ވަކި މީހަކު ޒިންމާ ކުރުވުމުގެ މިސްރާބަށް ދިފާއުން ދާ ކަމުގެ ތުހުމަތު ކުރައްވާފައެވެ. އެގޮތުން މި މައްސަލައިގައި ދައުވާލިބޭ އަލީ ޒުބައިރުގެ ވަކީލުން އެކަށީގެންވާ ގޮތެއްގައި އޭނާ ދިފާއު ނުކުރާކަމަށް ބަޔާންކޮށް ދައުލަތުން ވަނީ ކަންބޮޑުވުން ފާޅުކޮށްފައެވެ.
ދައުލަތުގެ ވަކީލުން ވިދާޅުވީ، މި މައްސަލައިގައި އަލީ ޒުބައިރުގެ ފަރާތުން އެއްވެސް ހުށައެޅުމެއްވެސް ހުށައަޅާފައިނުވާ ކަމަށެވެ. ނަމަވެސް އަހުމަދު ސުނައިނުއާއި އަހުމަދު މުޖާހިދުގެ ފަރާތުން ހުށައެޅުންތައް ހުށައަޅާފައިވާކަން ދައުލަތުގެ ވަކީލުން ފާހަގަ ކުރެއްވިއެވެ.
އެކަމާ ގުޅިގެން ވާހަކަ ދެއްކުމަށް ފުރުސަތު ދިނުމުން އަލީ ޒުބައިރު ބުނީ، ދައުލަތުގެ އެ ވާހަކަތައް އޭނާ ޤަބޫލު ނުކުރާ ކަމަށެވެ. އެގޮތުން ދިފާއީ ވަކީލުން އެކަށީގެންވާ ގޮތެއްގައި އޭނާ ދިފާއު ކުރުމަށް މަސައްކަތް ކުރައްވާކަން ޤަބޫލު ކުރާކަމަށް އޭނާ ބުންޏެވެ.
ވުމާއެކު، އެ އަޑުއެހުމުގައި ގާޒީ ދީބާނާޒް ފަހުމީ ވިދާޅުވީ، ދައުލަތުން ފާހަގަކުރި ކަންބޮޑުވުމާއި ގުޅޭގޮތުން އަލީ ޒުބައިރުގެ އެފަދަ ޝަކުވާއެއް ނެތްނަމަ ޝަރީއަތަށް އެ މިންވަރަށް ފުދޭ ކަމަށެވެ.
ނެޓްވޯކެއްގެ ގޮތުގައި އޮޕަރޭޓްކޮށް ޑްރަގް ޓްރެފިކް ކުރިކަމަށް ތުހުމަތުވާ މި މައްސަލައިގައި ޑައިމޯފިން ޓްރެފިކް ކުރުމުގެ ކުށުގެ ދައުވާ ދައުލަތުން މިހާރު އުފުލާފައިވަނީ ގދ. ހޯނޑެއްދޫ އިރުމަތީގެ، އަޙްމަދު ސުނައިނު އާއި ގދ. ހޯނޑެއްދޫ ގުލޭނޫރަންމާގެ، އަލީ ޒުބައިރުގެ އިތުރުން، ގދ. ހޯޑެއްދޫ އަލޯރާ އަހުމަދު މުޖާހިދު މައްޗަށެވެ.
