ކުރިމަގުގައި ވެސް ގަވީ ހުންނަން ބޭނުންވަނީ ބާސެލޯނާގައި

ކުރިމަގުގައި ހުންނަން ބޭނުން ވަނީ ބާސެލޯނާގައި ކަމަށް އެ ޓީމަށް ކުޅެމުން އަންނަ ސްޕެއިންގެ ޒުވާން ކުޅުންތެރިޔާ ގަވީ ބުނެފި އެވެ.

އުމުރުން 18 އަހަރުގެ ކުޅުންތެރިޔާ މިހެން ބުނީ އޭނާގެ މުސްތަޤުބަލާ ގުޅުވައިގެން ސްޕެއިންގެ މީޑިއާ ތަކުގައި ވެސް އެކި ވާހަކަތައް ދައުރުވަމުން ދަނިކޮށެވެ. ގަވީ ބުނީ އޭނާގެ ކުރިމަގާ މެދު އެއްވެސް މީހަކު ހާސްވާން ނުޖެހޭނެ ކަމަށާއި، ބާސެލޯނާގެ ސަޕޯޓަރުން ވެސް ހެމެޖެހުމަށް އެދޭ ކަމަށެވެ. ހަމައެއާއެކު ބާސެލޯނާގައި އޭނާ ހުރީ ވަރަށް ހަމަޖެހިގެންކަން ފާހަގަކޮށް ގަވީ ބުނީ، އަބަދު ވެސް އޭނާގެ އެންމެ ބޮޑު ހުވަފެނަކީ ބާސެލޯނާގައި ހުރުން ކަމަށެވެ. އެއީ އޭނާގެ މުސްތަޤުބަލާ ގުޅިފައި އޮތް ކުލަބުކަން ފާހަގަކޮށް ގަވީ ބުނީ، އޭނާއާމެދު އެއްވެސް މީހަކު ކަންބޮޑުުނުވުމަށް އެދޭ ކަމަށެވެ. ގަވީ ފާހަގަ ކުރި ގޮތުގައި އޭނާ ބޭނުންވަނީ މުސްތަޤުބަލުގައި ވެސް ބާސެލޯނާގައި ހުރެ، އެ ޓީމާއެކު ގިނަ ކާމިޔާބުތަކެއް ހޯދުމަށެވެ.

ބާސެލޯނާގެ ސީނިއާ ޓީމުން ގަވީ އަށް ފުރުސަތު ލިބުނީ 2021 ވަނަ އަހަރު އެވެ. އޭގެ ފަހުން ޒުވާން ކުޅުންތެރިޔާ އަންނަނީ ބާސެލޯނާގައި މޮޅު ކުޅުމެއް ދައްކަމުންނެވެ. އޭނާ އަކީ ބާސެލޯނާގެ ކޯޗު ޒަވީ ހެނާންޑޭޒް އެންމެ އިތުބާރު ކުރާ އެއް ކުޅުންތެރިޔާ ކަމަށާއި، ބާސެލޯނާ އިން ދޫކޮށްގެން ނުވާނެ ކުޅުންތެރިންގެ ތެރޭގައި ޒަވީ ވަނީ ގަވީ ހިމަނާފައި ކަމަށް ވެސް ރިޕޯޓުތައް ބުނެ އެވެ. މި ސީޒަނުގެ މިހާތަނަަށް ގަވީ ވަނީ ބާސެލޯނާ އަށް 46 މެޗު ކުޅެދީ، ދެ ލަނޑު ޖަހައިފަ އެވެ. ބާސެލޯނާއާއެކު ގަވީ މިހާރު ހަދާފައިވާ އެއްބަސްވުމުގެ މުއްދަތު ހަމަވާނީ 2026 ވަނަ އަހަރު އެވެ. އޭނާގެ ރިލީސް ކްލޯސްގެ ގޮތުގައި ބާސެލޯނާ އިން ވަނީ އެއް ބިލިއަން އެމެރިކާ ޑޮލަރު ހަމަޖައްސައިފަ އެވެ.

ގަވީ ވަނީ މިހާތަނަށް ބާސެލޯނާއާއެކު ދެ ތަށި ކާމިޔާބުކޮށްފަ އެވެ. އެއީ ސްޕެނިޝް ލީގު އަދި ސްޕެނިޝް ސުޕަ ކަޕް އެވެ.