ލީގުގެ ފުރަތަމަ މޮޅު ހޯދުމުގެ އުއްމީދުގައި ގްރީން ސްޓްރީޓްސް އަދި ޔޫވީ

ދިވެހި ޕްރިމިއަރ ލީގުގައި ޔުނައިޓެޑް ވިކްޓްރީ (ޔޫވީ) އާއި ކްލަބް ގްރީން ސްޓްރީޓްސް ބައްދަލުކުރާ މެޗުގައި ދެ ޓީމުގެވެސް އުއްމީދަކީ ފުރަތަމަ މޮޅު ހޯދުމެވެ.

މި ސީޒަނުގައި ކޮންމެ ޓީމަކުންވެސް ދެ މެޗު ކުޅެފައިވާއިރު، ދެ ޓީމުވެސް ވަނީ ކުޅުނު ދެމެޗުން ބަލިވެފައެވެ. ޔޫވީ ފުރަތަމަ ކުޅުނު މެޗުގައި 7-2 ގެ ބޮޑު ތަފާތަކުން ޗެމްޕިއަން މާޒިޔާ އަތުން ބަލިވިއިރު، ގްރީން ވެސް ވަނީ ފުރަތަމަ މެޗުގައި 5-1 އިން ސަސް ކައިރިން ބަލިވެފައެވެ. ޔޫވީ ކުޅުނު ދެވަނަ މެޗުގައި ސަސް ކައިރިން ބަލިވީ 3-0 ގެ ނަތީޖާއަކުންނެވެ. އަދި ގްރީންގެ ދެވަނަ މެޗުގައި މާޒިޔާ އަތުން ބަލިވީ 5-0 ގެ ނަތީޖާއަކުންނެވެ. އެހެންކަމުން ދެ ޓީމުވެސް ނުކުންނާނީ ލީގު މެދުކެނޑުމުގެ ކުރިން މޮޅެއް ހޯދުމުގެ އަޒުމުގައެވެ.

ޔޫވީ އަދި ގްރީން ބައްދަލުކުރާ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ޔޫވީގެ ކޯޗު އަލީ ނިޝްތާރު ބުނީ ޓީމު ހާލަތު އޮތީ ރަނގަޅަށްކަމަށާއި، ނަމަވެސް ސަސްޕެންޝަނުގައި ހުރި ހަސީބު ނެތުން ވާނީ ޗެލެންޖެއްކަމަށެވެ. ނިޝްތާރު ބުނި ފުރަތަމަ ދެ މެޗު ދިޔައީ އުނދަގުކޮށް ކަމަށާއި، ކޮންފިޑެންސް ގެންނަން މެޗުން މޮޅުވުމަކީ ވަރަށް މުހިންމު ކަމެއް ކަމަށެވެ. އޭނާ އިތުރަށް ބުނީ، ލަނޑު ޖެހުމުގައި ޓީމު އަދި ދަށްކަމާއި، އެކަމަށް އިތުރަށް ސަމާލުކަން ދޭނެކަމަށެވެ. އިދިކޮޅު ޓީމާ ގުޅޭގޮތުން ވާހަކަ ދައްކަމުން ނިޝްތާރު ބުނީ ދެ ޓީމަކީ ވެސް ދާދި އެއްވަރުގެ ދެ ޓީމުކަމަށާއި، އެއްވަރަކަށް ތައްުޔާރުވެވިފައި އޮތުމުން އެއްވެސް އުޒުރެއް ނުދެއްކޭނެކަމަށެވެ.

ނޫސްވެރިންގެ ބައްދަލުވުމުގައި ޔޫވީގެ ކޯޗު އަހުމަދު ޝާކިރު (ޝާކިއްޓެ) ބުނީ، ޓީމު ފަރާތުން ފެންނަނީ މެޗަކަށްވުރެ މެޗެއް ރަނގަޅުވަމުން އަންނަ ތަންކަމަށެވެ. ޝާކިއްޓެެ ބުނީ ސްކޮޑަށް ބަލާއިރު ދެ ޓީމަކީވެސް އެއްވަރުގެ ދެ ޓީމުކަމަށާއި، އައު ކުޅުންތެރިން ދެ ޓީމުންވެސް ފެންނަ ކަމަށެވެ. އަދި އެއް ލެވެލްއެއްގެ ޓީމެއް އަތުން ޕޮއިންޓެއް ގެއްލިއްޖެނަމަ ވަރަށް އުނދަގޫ ހާލަތަކަށް ދާނެކަމަށާއި، މި މެޗަކީ ޔޫވީ އަށް އެންމެ މުހިންމު އެއް މެޗުކަމަށް އޭނާ ބުންޏެވެ.

ދިވެހި ޕްރިމިއަރ ލީގުގައި ޔޫވީ އާއި ގްރީން ސްޓްރީޓްސް ބައްދަލުކުރާ މެޗު ފެށުމަށް ހަމަޖެހިފައިވަނީ ހުކުރު ދުވަހު ހަވީރު 16:00 ގައެވެ.