ޔުއެފާ ޗެމްޕިއަންސް ލީގުގެ ސެމީ ފައިނަލްގެ ދެ ވަނަ ލެގުގައި އެންމެ ފަހުގެ ޗެމްޕިއަން ރެއާލް މެޑްރިޑަށް ވުރެ މޮޅަށް ކުޅުނީ މެންޗެސްޓަރ ސިޓީ ކަމަށް، ރެއާލްގެ ކޯޗު ކާލޯ އަންޗެލޮޓީ ބުނެފި އެވެ.
ސެމީ ފައިނަލްގެ ދެ ވަނަ ލެގުގައި ސިޓީ އަތުން ބަލިވެ މުބާރާތުން ކެޓި މެޗަށްފަހު ވާހަކަ ދައްކަމުން އަންޗެލޮޓީ ބުނީ، ރެއާލުން ކުޅުނީ އެ މެޗުން މޮޅުވާން ހައްގު އިދިކޮޅު ޓީމަކާ ދެކޮޅަށެވެ. ސަބަބަކީ އެ މެޗުގައި ފުރަތަމަ ހާފުގައި ވެސް އެޑްވާންޓޭޖު ނެގޭ ވަރަށް މޮޅަށް ކުޅުނީ ސިޓީން ކަމަށް އޭނާ ފާހަގަކުރި އެވެ. އެހެންކަމުން އެ މެޗުގައި ސިޓީން ދެއްކީ ފައިނަލަށް ދިޔުމަށް ހައްގުވާ ވަރުގެ ކުޅުމެއް ކަމަށް ވެސް އަންޗެލޯޓީ ބުންޏެވެ. އޭނާ ފާހަގަ ކުރި ގޮތުގައި މިދިޔަ ސީޒަނުގައި ސިޓީ އަށް ވުރެ ރެއާލް މޮޅުވި ފަދައިން، މި ސީޒަނުގައި ރެއާލަށް ވުރެ ސިޓީ މޮޅު ކަމަށެވެ. އޭނާ ބުނީ ޗެމްޕިއަންސް ލީގުގެ ފައިނަލްގައި ކަންކަން ވާނީ މިފަދަ ގޮތަކަށް ކަމަށެވެ. ޚާއްސަކޮށް ވަރަށް ވަރުގަދަ އިދިކޮޅު ޓީމަކާ ދެކޮޅަށް ކުޅެ ބަލިވާ ފަހަރު ވެސް އަންނާނެ ކަމަށް އޭނާ ޤަބޫލު ކުރެ އެވެ.
އަންޗެލޮިޓީ ޤަބޫލު ކުރާ ގޮތުގައި ޗެމްޕިއަންސް ލީގުގެ ސެމީ ފައިނަލްގައި ކުޅެވުމަކީ ވެސް ކާމިޔާބެކެވެ. ޚާއްސަކޮށް ގިނަ ޓީމުތަކެއްގެ ތެރެއިން ސެމީ ފައިނަލާ ހަމައަށް އަންނާނީ އެންމެ ވަރުގަދަ ހަތަރު ޓީމުކަމަށް އޭނާ ވަނީ ބުނެފަ އެވެ. އޭނާ ބުނީ އަބަދު މޮޅުވުމަކީ ވެސް ކުޅިވަރުގައި ޚާއްސަކޮށް ފުޓުބޯޅައިގައި ކުރަން އުނދަގޫ ކަމެއް ކަމަށެވެ. އެހެންކަމުން މި ސީޒަނުގެ ފައިނަލަށް ދުވެނު ނަމަވެސް، ރެއާލުން މަސައްކަތް ކުރާނީ އަންނަ ސީޒަނުގެ ފައިނަލަށް ދިޔުމަށް ކަމަށް އޭނާ ބުންޏެވެ. އެކަން ފާހަގަކޮށް އަންޗެލޮޓީ ވަނީ މިހާރަށް ވުރެ ވަރު ގަދަޔަށް ރެއާލް އެނބުރި އަންނާނެ ކަމުގެ ޔަގީންކަން ވެސް ދީފަ އެވެ.
މޫގެ އިތުރުން އޭނާ ބުނީ، މިދިޔަ ސީޒަނުގައި އޮތް ސިޓީއާ މި ސީޒަނުގައި އޮތް ޓީމާ ވަރަށް ތަފާތު ކަމަށެވެ. ޚާއްސަކޮށް އެ ޓީމު ދައްކަމުން އައި ކުޅުމާއި، އެ ޓީމު ނެރެމުން އަންނަ ނަތީޖާ ތަކަކީ އެކަމުގެ ހެއްކެއް ކަމަށް އޭނަ ދެކެ އެވެ. މި ޕްރެސްގައި ވެސް އަޗެލޮޓީ ވަނީ އޭނާގެ މުސްތަޤުބަލާ ގުޅޭ ވާހަކަ ވެސް ދައްކައިފަ އެވެ. އޭނާ ބުނީ އެކަމުގެ ރެއާލްގެ ރައީސް ވެސް ވަރަށް ސާފުކޮށް ބުނެދީފައިވާ ކަމަށެވެ. އެހެންކަމުން އޭނާ ބޭނުންވަނީ ރެއާލްގައި ހުންނަން ކަމަށާއި، އެއްބަސްވުމުގައި ބާކީ އެއް އަހަރު އޮތް ކަމަށް އަންޗެލޮޓީ ބުންޏެވެ.
ރެއާލް އަކީ ޗެމްޕިއަންސް ލީގުގެ އެންމެ ކާމިޔާބު ޓީމެވެ. އެ ޓީމުން ވަނީ 14 ފަހަރު މުބާރާތް ކާމިޔާބުކޮށްފަ އެވެ.
