އިޓާލިއަން ލީގުގެ ޔުވެންޓަސް އަށް ކުޅެމުން އަންނަ އިޓަލީގެ ޑިފެންޑަރު ލިއޮނާޑޯ ބޮނޫޗީ އަންނަ ސީޒަނަށް ފަހު ކުޅުން ހުއްޓާލަން ނިންމާފައިވާކަމަށް އޭނާ ބުނެފި އެވެ.

އުމުރުން 36 އަހަރުގެ ކުޅުންތެރިޔާ އެކަން ހާމަކުރީ ޔުވެންޓަސް އަށް އޭނާ 500 ވަނަ މެޗު ހަމަކޮށްދިނުމަށް ފަހު އެކުލަބުގެ ޔޫޓިއުބު ޗެނަލްގައި ދިން އިންޓަވިޔުގަ އެވެ. ބޮނޫޗީ ބުނީ އޭނާ އެ ނިންމުން ނިންމީ ކުރިން ޔުވެންޓަސް އަށް ކުޅެފައިވާ ލެޖެންޑްރީ ގޯލް ކީޕަރު ޖިއަންލުއީޖީ ބުފޮންއާ މަޝްވަރާ ކުރުމަށް ފަހު ކަމަށެވެ. ބޮނޫޗީ ބުނީ އަންނަ ސީޒަނަށް ފަހު އޭނާ ކުޅުން ހުއްޓާލުން ވާނީ ޑިފެންސިވް ޒަމާނެއްގެ ނިމުން ކަމަށާއި، އެއީ އިޓަލީ ސްޓައިލް ޑިފެންސް ކުރާނެ ގޮތަކަށް ވާނެ ކަމަށެވެ. އޭނާ ބުނީ އެންމެ މޮޅު ކުޅުންތެރިންނާއެކު މަތީ ފަންތީގައި ހުރުމަކީ އޭނާ އަށް ލިބޭ ބޮޑު އުފަލެއް ކަމަށެވެ. ބޮނޫޗީގެ އުންމީދަކީ ބަރެސީ، މޯލްޑިނީ، ނެސްޓާ އަދި ކެނަވާރޯ ކަހަލަ މޮޅު ޑިފެންޑަރުން މުސްތަގުބަލުގައި އުފެދުމެވެ. ބޮނޫޗީ ފާހަގަ ކުރި ގޮތުގައި އޭނާ ހިމެނޭހެން އެ ކުޅުންތެރިން ވެސް ވަނީ ގިނަ ކާމިޔާބީތަކެއް ހޯދާފައި ކަމަށާއި، ފުޓުބޯޅަ އަށް ޚިދުމަތެއް ކޮށްދެވިއްޖެ ކަމުގެ އިހުސާސް ކުރެވޭ ކަމަށެވެ.

ބޮނޫޗީ އޭނާގެ ސީނިއާ ކެރިއަރު ފެށީ 2005 ވަނަ އަހަރު އިޓަލީގެ ވިޓާބީސް އިންނެވެ. އެއަށްފަހު އޭނާ ވަނީ މިހާތަނަށް އެކި ކުލަބުތަކަށް ކުޅެފަ އެވެ. ބޮނޫޗީ ކުޅުނު ކުލަބުތަކުގެ ތެރޭގައި އިންޓަ މިލާން އަދި ޔުވެންޓަސް ހިމެނެ އެވެ. އޭނާ އެންމެ ފުރަތަަމަ ޔުވެންޓަސް އަށް ބަދަލުވީ 2010 ވަނަ އަހަރު އެވެ. އެ ފަހަރު ޔުވެންޓަސް އަށް ހަތް އަހަރު އޭނާ ވަނީ ކުޅެފަ އެވެ. 2017 ވަނަ އަހަރު އޭނާ ޔުވެންޓަސް ދޫކޮށްލިއިރު ވަނީ އެ ކުލަބަށް 319 މެޗު ކުޅެދީ، 21 ލަނޑު ޖަހައިފަ އެވެ. އެއަށްފަހު އޭނަ ބަދަލުވީ އޭސީ މިލާނަށެވެ. އެ ކުލަބަށް އެއް އަހަރު ކުޅުމަށް ފަހު 2018 ވަނަ އަހަރު އަނެއްކާ ވެސް ބަދަލުވީ ޔުވެންޓަސް އަށެވެ. އޭގެ ފަހުން މިހާތަނަށް ވަނީ ޔުވެންޓަސް އަށް 181 މެޗު ކުޅެދީ، 16 ލަނޑު ޖަހައިފަ އެވެ. ބޮނޫޗީ ވަނީ ޔުވެންޓަސް އަށް ޖުމުލަ 500 މެޗު ކުޅެދީފަ އެވެ. އެ ކުލަބާއެކު އޭނާ ވަނީ 16 ތައްޓެއް ކާމިޔާބުކޮށްފަ އެވެ. އޭގެ ތެރޭގައި އިޓާލިއަން ލީގު އަށް ފަހަރު، އިޓާލިއަން ކަޕް ހަތަރު ފަހަރު އަދި އިޓާލިއަން ސުޕަ ކަޕް ހަތަރު ފަހަރު ކާމިޔާބު ކުރުން ހިމެނެ އެވެ.

ބޮނޫޗީ އަންނަނީ 2010 ވަނަ އަހަރުން ފެށިގެން އިޓަލީގެ ޤައުމީ ޓީމަށް ވެސް ކުޅެމުންނެވެ. މިހާތަނަށް އޭނާ ވަނީ ޤައުމީ ޓީމަށް 120 މެޗު ކުޅެދީ އަށް ލަނޑު ޖަހައިފަ އެވެ. ޤައުމީ ޓީމާއެކު އޭނާ ވަނީ 2020 ވަނަ އަހަރުގެ ޔޫރޯ ފުޓުބޯޅަ މުބާރާތް ކާމިޔާބުކޮށްފަ އެވެ. އޭގެ އިތުރަށް އެ މުބާރާތުގެ ފައިނަލްގައި 2012 ވަނަ އަހަރު ކުޅުނެވެ. ޔުއެފާ ނޭޝަންސް ލީގުގެ ފައިނަލްގައި ކުޅުނުއިރު، ފީފާ ކޮންފަޑަރޭޝަން ކަޕްގެ ތިން ވަނަ ހޯދި އެވެ. މިދިޔަ އަހަރު އިޓަލީ ޤައުމީ ޓީމުގެ ކެޕްޓަން ޖިއޮޖިއޯ ކިއެލީނީ ޤައުމީ ޓީމަށް ކުޅުން ހުއްޓާލުމާއެކު، ކެޕްޓަން ބޭންޑު ދީފައި ވަނީ ބޮނޫޗީ އަށެވެ.