ހަނިމާދޫ ބައިނަލްއަގުވާމީ ވައިގެ ބަނދަރު ތަރައްޤީ ކުރުމުގެ މަޝްރޫޢުގެ މަސައްކަތުގެ ތެރެއިން އައު ރަންވޭގެ މަސައްކަތާއި ޢިމާރާތްތަކުގެ ކޮންކްރީޓް މަސައްކަތް އަދި ޑްރެޖިންގ މަސައްކަތް ދަނީ ބާރަށް ކުރިޔަށް ކަމަށް އިކޮނޮމިކް މިނިސްޓްރީން ބުނެފިއެވެ.

އިކޮނޮމިކް މިނިސްޓްރީން އެފަދައިން ބުނެފައި ވަނީ ބުދަ ދުވަހުކޮށްފައިވާ ޓްވީޓެއްގައެވެ. އެ ޓްވީޓުގައި ބުނެފައި ވަނީ މި މަޝްރޫޢު އަކީ ބޮޑުތިލަދުންމަތީގެ ތަރައްޤީއާ ގުޅިފައިވާ އެންމެ މުހިންމު އެއް މަޝްރޫޢު ކަމަށެވެ.

ހަނިމާދޫ އިންޓަނޭޝަނަލް އެއަރޕޯޓް ތަރައްޤީކުރުމުގެ މަޝްރޫޢުގެ ދަށުން އެއަރޕޯޓްގެ ރަންވޭގެ ތާރުގެ މަސައްކަތްތައް ފަށާފައި ވަނީ 9 މޭއި 2023ގައެވެ. މީގެ ކުރިން 2012 ވަނަ އަހަރު ހަނިމާދޫ އެއަރޕޯޓުގެ ނަން އިންޓަނޭޝަނަލް އެއަރޕޯޓަކަށް ބަދަލުކުރިނަމަވެސް އެތަނުން ލިބޭ ޚިދުމަތްތަކުގެ ފެންވަރު ރަނގަޅެއް ނުވެއެވެ. އެގޮތުން ހަފްތާއަކު 1 ދުވަހު، ރާއްޖޭގެ ގައުމީ އެއަރލައިން މޯލްޑިވިއަންއިން ބާއްވާ އިންޑިއާ ދަތުރު ފިޔަވާ، އިތުރު ބައިނަލްއަޤްވާމީ ދަތުރެއް ތާވަލްކޮށްފައެއް ނެތެވެ.

ހަނިމާދޫ އެއަރޕޯޓް ތަރައްޤީކޮށް ނިމުމުން އުތުރުގެ ފަތުރުވެރިކަމަށް އިންޤިލާބީ ބޮޑު ބަދަލެއް އަންނާނެ ކަމަށް އިކޮނޮމިކް މިނިސްޓްރީން ބުނެއެވެެ. އަދި އެކަމުގެ އިޤްތިޞާދީ މަންފާ ސަރަޙައްދުގެ ރައްޔިތުންނަށް ލިބޭނެ ކަމަށް އެ ވުޒާރާއިން ބުނެއެވެ.

މިއަހަރުގެ ޖެނުއަރީ 18ވަނަ ދުވަހު ހަނިމާދޫ އިންޓަނޭޝަނަލް އެއަރޕޯޓްގެ ޢަމަލީ މަސައްކަތް ފައްޓަވައިދެއްވީ ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙުއެވެ. މިއީ މާލެ ފިޔަވާ އެހެން ތަނެއްގައި ހިންގާ ތަރައްޤީގެ އެންމެ ބޮޑު މަޝްރޫޢުތަކުގެ ތެރެއިން އެއް މަޝްރޫޢުއެވެ.

މުޅި މި މަޝްރޫޢު 2024 ގައި ނިމޭނެ ކަމަށް ލަފާކުރާއިރު މިއީ 136.6 މިލިއަން ޑޮލަރުގެ މަޝްރޫޢުއެކެވެ.