13 އަހަަރަށް ފަހު އިންޓަމިލާން ފައިނަލަށް

އެންމެ ވާދަވެރި އޭސީ މިލާން ކަޓުވާލައި އިޓަލީގެ އިންޓަމިލާން ޔޫރަޕިއަން ޗެމްޕިއަންސް ލީގު ފުޓްބޯޅަ މުބާރާތުގެ ފައިނަލަށް ދަތުރުކޮށްފި އެވެ.

އިޓަލީގެ އެންމެ ވާދަވެރި ދެ ޓީމުގެ އަމިއްލަ ދަނޑުގައި ކުޅުނު ސެމީ ފައިނަލްގެ ފަހު މެޗު ނިމުނީ 2-0ން އިންޓަ މޮޅުވެގެންނެވެ. މިއާއެކު އިންޓަ ފައިނަލަށް ދަތުރުކުރީ މި ދެ ޓީމުގެ ފުރަތަމަ މެޗު 2-0ން ކާމިޔާބުކޮށްފައިވާތީވެ އެގްރީގޭޓް ނަތީޖާ 3-0ންނެވެ. މެޗުގެ ހަމައެކަނި ލަނޑު ޖެހީ ކެޕްޓަން ބޭންޑް އަޅައިގެން ކުޅުނު އާޖެންޓީނާގެ ފޯވަޑް ލައުޓާރޯ މާޓިނޭޒެވެ.

ފައިނަލުގައި އިންޓައާ ވާދަކުރާނީ ސެމީ ފައިނަލްގެ ފަހު މެޗުގައި އެންމެ ފަހުގެ ޗެމްޕިއަން ރެއާލް މެޑްރިޑާއި މެންޗެސްޓާ ސިޓީ ކުޅެގެން މޮޅުވާ ޓީމެކެވެ. މި ދެ ޓީމު ކުޅުނު ފުރަތަމަ މެޗު ރެއާލްގެ ދަނޑުގައި ނިމުނީ 1-1ންނެވެ.

މިއީ 2010ގެ ފަހުން އިންޓަމިލާން ޔޫރަޕުގެ އެންމެ ޝަރަފުވެރި މުބާރާތުގެ ފައިނަލަށް ދިޔަ ފުރަތަމަ ފަހަރެވެ. އޭސީ މިލާނަކީ މުބާރާތް 7 ފަހަރު ކާމިޔާބުކޮށްފައިވާ މި މުބާރާތުގެ ދެ ވަނަ އަށް އެންމެ ކާމިޔާބު ޓީމެވެ.

މި މެޗުގައި ހުރިހާ ގޮތަކުން ވެސް މޮޅަށް ކުޅުނީ އިންޓަމިލާނެވެ. މެޗަށް ފަހު ކޯޗު ސިމޯން އިންޒާގީ ބުނީ ފައިނަލަށް ދިއުމަކީ ވަރަށް ބޮޑު ކާމިޔާބީއެއް ކަމަށާއި ކުޅުންތެރިންގެ މަސައްކަތް ބަރާބަރު ކަމަށެވެ.

އޭނާ ބުނީ އަންނަ މަހުގެ 10ގައި ތުރުކީގައި ކުޅޭ ފައިނަލަށް ކޮންމެ ޓީމަކާ ދެކޮޅަށް ނުކުންނަން ޖެހުނަސް ފަރުވާލެއް ނެތް ކަމަށެވެ.