ކ. މާލެ
|
17 މެއި 2023 | ބުދަ 08:03
ރެއާލާ ދެކޮޅަށް ނުކުންނަ ދެ ވަނަ ލެގުގެ ކުރިން އޮތް ޕްރެސް ކޮންފަރެންސްގައި ގާޑިއޯލާ
ރެއާލާ ދެކޮޅަށް ނުކުންނަ ދެ ވަނަ ލެގުގެ ކުރިން އޮތް ޕްރެސް ކޮންފަރެންސްގައި ގާޑިއޯލާ
ރޮއިޓާސް
ޔުއެފާ ޗެމްޕިއަންސް ލީގު
ފައިނަލަށް ދާން ބޭނުންނަމަ ބާނަބެއުގައި ދެއްކި ކުޅުމަށްވުރެ މޮޅަށް ކުޅެން ޖެހޭނެ: ގާޑިއޯލާ
 
ސިޓީގެ އިއްތިހާދު ސްޓޭޑިއަމްގައި އޮންނަ މެޗުގެ ފޭވަރިޓުންނަކީ ސިޓީ ކަމަށް ޤަބޫލު ކުރަންތޯ ސުވާލު ކުރުމުން ގާޑިއޯލާ ވަނީ އެކަމާ ދެކޮޅު ހަދައިފައި

ޔުއެފާ ޗެމްޕިއަންސް ލީގުގެ ފައިނަލަށް ދާން ބޭނުންނަމަ، ރެއާލް މެޑްރިޑުގެ ސަންޓިއާގޯ ބާނަބެއު ގައި ދެއްކި ކުޅުމަށްވުރެ މޮޅު ކުޅުމެއް ދެ ވަނަ ލެގުގައި ދައްކަން ޖެހޭނެ ކަމަށް މެންޗެސްޓަރ ސިޓީގެ ކޯޗު ޕެޕް ގާޑިއޯލާ ބުނެފި އެވެ.

ގާޑިއޯލާ މިހެން ބުނީ ސިޓީގެ އިއްތިހާދު ސްޓޭޑިއަމްގައި ކުޅޭ ދެ ވަނަ ލެގުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުންނެވެ. މި ދެ ޓީމު ރެއާލްގެ އަމިއްލަ ދަނޑުގައި ކުޅުނު މެޗު ނިމުނީ 1-1 އިން އެއްވަރުވެގެންނެވެ. އެހެންކަމުން ފައިނަލުން ޖާގަ ލިބޭނީ ދެ ވަނަ ލެގު ކާމިޔާބު ކުރާ ޓީމަކަށެވެ.

އެ މެޗުގެ ކުރިން ވާހަކަ ދައްކަމުން ގާޑިއޯލާ ބުނީ، މުޅި ސިޓީ އޮތީ ވަރަށް ރަނގަޅަށް ކަމަށާއި، ޓީމު ރޫހު ވެސް ރަނގަޅު ކަމަށެވެ. އެހެން ނަމަވެސް ކުރިއަށް ދާން ބޭނުންވާ ނަމަ، މިދިޔަ ހަފްތާގައި އޮތް މެޗުގައި ދެއްކި ކުޅުމަށް ވުރެ މޮޅު ކުޅުމެއް ދައްކަން ޖެހޭނެ ކަމަށެވެ. އޭނާ ބުނީ ސެމީގެ ދެ ވަނަ ލެގަށް ނުކުންނައިރު، ފާއިތުވި އަހަރުތަކުގައި ރެއާލުން ކުރަމުން އައި ކަންކަން އެނގި ތިބެން ޖެހޭނެ ކަމަށެވެ. އެހެންކަމުން ބާނަބެއު ގައި ދެއްކި ކުޅުމަށްވުރެ މޮޅު ކުޅުމެއް ދައްކަން ޖެހޭނެ ކަމަށް ގާޑިއޯލާ ވަނީ ބުނެފަ އެވެ.

ސިޓީގެ އިއްތިހާދު ސްޓޭޑިއަމްގައި އޮންނަ މެޗުގެ ފޭވަރިޓުންނަކީ ސިޓީ ކަމަށް ޤަބޫލު ކުރަންތޯ ސުވާލު ކުރުމުން ގާޑިއޯލާ ވަނީ އެކަމާ ދެކޮޅު ހަދައިފަ އެވެ. ގާޑިއޯލާ ބުނީ މުބާރާތުގެ ނޮކްއައުޓް ބުރުގައި ސިޓީން ކޮންމެ އަހަރަކު ވެސް ވާދަކުރާ ކަމަށެވެ. ނަމަވެސް އެންމެ ފަހު ވަގުތު ކުރިއަށް އޮންނަ ބުރަށް ދަތުރު ކުރަނީ އެންމެ މޮޅު ޓީމުކަމަށް އޭނާ ވަނީ ފާހަގަކޮށްފަ އެވެ. ގާޑިއޯލާ ބުނީ ސީޒަނުގެ މިހާތަނަށް އައިއިރު ސިޓީގެ ސަޕޯޓަރުން ތިބީ ވަރަށް އުފަލުން ކަމަށާއި، އެހެންކަމުން އެކަން ދެމެހެއްޓުމަކީ އޭނާގެ ބޮލުގައި އެޅިފައި އޮތް ޒިންމާއެއް ކަމަށް ދެކޭ ކަމަށެވެ.

އިތުރަށް ވާހަކަ ދައްކަމުން ގާޑިއޯލާ ބުނީ، އޭނާ އަށް ޤަބޫލު ކުރާ ގޮތުގައި އަމިއްލަ ދަނޑުގައި ސިޓީގެ ކުޅުންތެރިން މާ ހަމަޖެހިގެން، މޮޅަށް ކުޅޭނެ އެވެ. އެގޮތުން ކުޅުންތެރިން އަމިއްލަ އިތުބާރު ހިފަހައްޓަން ޖެހޭނެ ކަމަށާއި، ސިޓީން މެޗުގައި ސަމާލުވެ ތިބުމަކީ ވެސް ކުރަން ޖެހޭ ކަމެއް ކަަމަށެވެ. އަދި އޭނާ ވަނީ މިހާތަނަށް ޗެމްޕިއަންސް ލީގުގައި ދިހަ ފައިނަލްގައި ވާދަކޮށްފައި ކަމަށެވެ. ނަމަވެސް އޭގެ ތެރެއިން ހަތް ސެމީ ފައިނަލުން ބަލިވެފައިވާކަން ފާހަގަކޮށް އޭނާ ބުނީ، އެކަމުގެ އިހުސާސް އޭނާ އަށް ވަރަށް ރަނގަޅަށް އިނގޭ ކަމަށް އޭނާ ބުންޏެވެ. ނަމަވެސް ދުނިޔޭގެ ފުޓުބޯޅައިގައި ކަންކަން ވާނީ އެކި ފަހަރު އެކި ގޮތަށް ކަމަށާއި، ކުރިން އަހަރުތަކޭ އެއް ފަދައިން މިއަހަރު ވެސް އޭނާ ހުރީ އުންމީދުގައި ކަމަށެވެ.

އަހަރަމެން ވަރަށް ބޮޑަށް ސަމާލުވާން ވެސް ޖެހޭނެ. އަހަރެން ދިހަ ސެމީ ފައިނަލުގައި ކުޅުނުއިރު، ހަތް ފަހަރު ވަނީ ބަލިވެފައި. އަހަރެންނަށް އިނގޭ އެކަމުގެ އިހުސާސްތައް، ހިތްދަތިކަން. އެހެން ނަމަވެސް، ދުނިޔޭގެ ފުޓުބޯޅައިގައި ކަންކަން ބަދަލުވާނެ، ކޮންޓްރޯލް ނުކުރެވޭނެ ކަންކަން ވެސް ހުންނާނެ.
ޕެޕް ގާޑިއޯލާ / މެންޗެސްޓަރ ސިޓީގެ ކޯޗު

މީގެ އިތުރުން ގާޑިއޯލާ ވަނީ ޔޫރަޕުގައި ރެއާލުން ދައްކަމުން އަންނަ މޮޅު ކުޅުމުގެ ވާހަކަ ވެސް ދައްކައިފަ އެވެ. ގާޑިއޯލާ ބުނީ އެކަމަށް ރެއާލުން ބޭނުން ކުރަނީ ކޮން ގޮތެއް ކަމެއް އޭނާ އަށް ނޭންގޭ ކަމަަށާއި، އޭނާ އަށް އެނގޭނަމަ އެކަން ކޮޕީ ކުރާނެ ކަމަށެވެ. ނަމަވެސް އޭނާ ދެކޭ ގޮތުގައި އެއީ މުޅި ޓީމުގައި ވެސް ފެންވަރު ރަނގަޅު މޮޅެތި ކުޅުންތެރިން ތިބުމުން ކުރެވޭ ކަމެއް ކަމަށެވެ. އެކަން ފާހަގަކޮށް ގާޑިއޯލާ ވަނީ ސްޕެއިންގެ ބާސެލޯނާގެ ވާހަކަ ބުނެފަ އެވެ. އެގޮތުން އޭނާ ބާސެލޯނާގައި ހުރި ދުވަސްވަރު އެކަން ކުރެވުނީ އޭރު އެ ޓީމުގައި ވެސް ފެންވަރު ރަނގަޅު މޮޅެތި ކުޅުންތެރިން ގިނައިން ތިބުމުން ކަމަށް އޭނާ ބުންޏެވެ.

މިއީ ޗެމްޕިއަންސް ލީގުގެ ނޮކްއައުޓް ބުރުގައި މި ދެ ޓީމު ބައްދަލު ކުރާނެ ތިން ވަނަ ފަހަރެވެ. އެންމެ ފަހުން މިދިޔަ ސީޒަނުގައި ވެސް ސިޓީ މުބާރާތުން ކެޓީ ރެއާލް އަތުން ބަލިވެގެންނެވެ. ސިޓީގެ އިއްތިހާދު ސްޓޭޑިއަމްގައި އެ ޓީމުން ރެއާލާ ދެކޮޅަށް ނުކުންނާނީ ބުދަ ދުވަހުގެ ރޭ ދަންވަރު ރާއްޖެ އިން 12 ޖަހާއިރު އެވެ.

އެންމެ ފަހުން އަޕްޑޭޓް ކުރީ: 3 މަސް ކުރިން
ރިވިއު ކުރީ: މަރްޔަމް ދާނިޝް ނަޝީދު
0%
0%
0%
0%
0%
0%
ކޮމެންޓް