އަލް ހިލާލްއާ ހަވާލުވުމަށް ބްރެޒިލްގެ ކުރީގެ ކޯޗު ޓީޓޭއާ މަޝްވަރާ ކުރަނީ

ސައުދީ ޕްރޯ ލީގުގެ އަލް ހިލާލްގެ ކޯޗުކަމާ ހަވާލުވުމަށް ބްރެޒިން ޤައުމީ ޓީމުގެ ކުރީގެ ކޯޗު ޓީޓޭއާ މަޝްވަރާ ކުރަމުން އަންނަ ކަމަށް މީޑިއާތަކުގައި ބުނެފި އެވެ.

މީޑިއާތަކުގައި ބުނެފައިވާ ގޮތުން އަލް ހިލާލްގެ ކޯޗަކަށް ހުރި އާޖެންޓީނާގެ ރާމޮން ޑިއާޒް މިހާރު ވަނީ އޭނާގެ އަމިއްލަ ބޭނުމެއްގައި ޤައުމަށް ގޮސްފަ އެވެ. އަދި ޑިއާޒް އެނބުރި ސައުދީ އަރަބިއްޔާ އަށް ނައުމަކީ ގާތް ކަމެއް ކަމަށް ވެސް ވަނީ ބުނެފަ އެވެ. އެހެންކަމުން އަލް ހިލާލްއާ ހަވާލާދީ މީޑިއާތަކުގައި ބުނެފައި ވަނީ ވަގުތީ ގޮތުން އެ ޓީމަށް އިރުޝާދު ދެމުން އަންނާނީ ޑިއާޒްގެ ދަރި އެމިލިއާނޯ އެވެ. އޭނާ އެ ޓީމަށް އިރުޝާދު ދޭނީ މި ސީޒަނުގެ ނިޔަަލަށް ކަމަށާއި، އެއަށްފަހު އަންނަ ސީޒަނުގައި އައު ކޯޗެއް ހަމަޖައްސާނެ ކަމަށް ވެސް ވަނީ ބުނެފަ އެވެ.

މީޑިއާތަކުގައި ބުނެފައިވާ ގޮތުން އަލް ހިލާލުން މިހާރު އަންނަނީ ބްރެޒިލްގެ ކުރީގެ ކޯޗު ޓީޓޭއާ މަޝްވަރާކުރަމުންނެވެ. އޭގެ ކުރިން ސްޕެއިން ޤަައުމީ ޓީމުގެ ކުރީގެ ކޯޗު ލުއިސް އެންރީކޭއާ ވެސް މަޝްވަރާ ކުރި ކަމަށް ވަނީ ބުނެފަ އެވެ. އެހެން ނަމަވެސް އަލް ހިލާލުން މަސައްކަތް ކުރަނީ ޓީޓޭ ހޯދުމަށް ކަމަށާއި، އެ ކުލަބުގެ އިސްވެރިން އެންމެ ގަޔާވާ ކޯޗަކީ ޓީޓޭ ކަމަށް ވެސް ބުނެފައިވެ އެވެ.

އަލް ހިލާލްއާއެކު ޑިއާޒް ހަދާފައިވާ އެއްބަސްވުމުގެ މުއްދަތު ހަމަވާނީ މި ސީޒަނުގެ ނިޔަލަށެވެ. ނަމަވަސް ކުއްލި ގޮތަކަށް އޭނާ ޤައުމަށް ދިޔައީ، އެކްސިޑެންޓެއްގައި އޭނާގެ އާއިލާ ދެ މެންބަރުން މަރުވުމާ ގުޅިގެންނެވެ. އެހެން ނަމަވެސް އަލް ހިލާލުން އޭނާގެ އެއްބަސްވުން އައު ކުރުމަށް ބޭނުންނުވާ ކަމަށާއި، އޭނާ އެނބުރި ނާންނަނީ އެ ސަބަބަށްޓަކައި ކަމަށް ވެސް ބުނެފައިވެ އެވެ.

އަލް ހިލާލުން ޓީޓޭ ހޯދުމަށް މަސައްކަތް ކުރަމުން އަންނަ ކަމަށް ބުނެފައިވާއިރު، އެ ޓީމުން ވަނީ ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނަލް މެސީ ހޯދުމަށް ވެސް ބޮޑު އަގެއް ހުށަހަޅައިފަ އެވެ. ނަމަވެސް މެސީ މިހާތަނަށް ވަކި ގޮތެއް ނިންމައިފައެއް ނުވެ އެވެ. މެސީގެ ބައްޕަ ޖޯޖު ހާމަކޮށްފައިވާ ގޮތުގައި މުސްތަޤުބަލާމެދު މެސީ ގޮތެއް ނިންމާނީ މިހާރު ކުރިއަށްދާ ސީޒަން ނިމުމުންނެވެ.