"އާއިލާތައް ރޫޅެނީ ޒަވާޖީ ހަޔާތަށް ތައްޔާރުނުވެ ކައިވެނިކުރާތީ"

އާއިލީ މައްސަލަތައް އުފަންވުމާއި، އާއިލާ ރޫޅެން މެދުވެރިވާ މައިގަނޑު އެއް ސަބަބަކީ އުފާވެރި ޒަވާޖީ ހަޔާތަކަށް ތައްޔާރުނުވެ ކައިވެނިކުރުން ކަމަށް ފެމިލީ ކޯޓުގެ އިސް ގާޒީ އިބްރާހީމް މާހިރު ވިދާޅުވެއްޖެއެވެ.

ގާޒީ މިހެން ވިދާޅުވީ ބައިނަލްއަގުވާމީ އާއިލާތަކުގެ ދުވަހާ ގުޅިގެން ފޮނުއްވި ޚިޠާބުގައެވެ.

އާއިލާތަކާ ގުޅޭގޮތުން ފެމިލީ ކޯޓަށް ހުށަހެޅޭ މައްސަލަތަކަށް އިޝާރަތްކުރައްވައި ގާޒީ މާހިރު ވިދާޅުވީ ކައިވެނީގެ ޕާޓީގެ ކަންކަމާ މަޝްވަރާކުރެވޭ ވަރަށްވެސް ދިރިއުޅޭނެތަނާއި، ދިރިއުޅުމުގެ ޚަރަދުތައް ހަމަޖެއްސުމާއި، ޒިންމާތައް ބަހާލުމާއި، އާއިލީ ދިރިއުޅުން ބައްޓަންކުރުމަށް ބޭނުންވާގޮތާއި، ސިއްހީ މައްސަލައެއް ހުރިނަމަ އެކަމުގައި އަމަލުކުރާނެ ގޮތްފަދަ ދެމަފިރިންނާ ސީދާ ގުޅުންހުރި މުހިންމު ކަންކަމަށް މަޝްވަރާ ނުކޮށް ޒަވާޖީ ހަޔާތް ފެށުމަކީ މައްސަލަތައް ޖެހުން އަވަސްވާ ސަބަބެއް ކަމަށް އިސްގާޒީ ވިދާޅުވިއެވެ.

މީގެ އިތުރުން ދެމަފިރިންގެ މެދުގައި މައްސަލަތައް ޖެހުމުން، ދެމަފިރިންނާއި ދަރިންނަށް އެންމެ ފައިދާހުރި ހައްލެއް ހޯދައިދިނުމަށް މަސައްކަތްކުރުމުގެ ބަދަލުގައި އަވަހަށް ކައިވެނި ރޫޅާލުމަށް އާއިލާގެ ތެރެއިންނާއި ރައްޓެހިންގެ ފަރާތުން ހިތްވަރުދެވޭކަން ފާހަގަކުރެވޭކަމަށް ގާޒީ މާހިރު ވިދާޅުވިއެވެ.

ގެވެށި އަނިޔާގެ މައްސަލަތަކަށް ބަލާއިރު އާންމުކޮށް އެންމެ ގިނައިން ހުށަހެޅެނީ ދެމަފިރިން ނުވަތަ ވަރިވެފައިވާ މީހުންގެ މައްސަލަތައް ކަމަށް ގާޒީ ވިދާޅުވިއެވެ. އެހެންނަމަވެސް، ދަރިންގެ ފަރާތުން މައިންބަފައިންނަށް ގެވެށި އަނިޔާ ލިބެމުންދާތީ ރައްކާތެރިކަމަށް އެކި ހުށަހެޅޭ މައްސަލަތައް މިފަހަކަށް އައިސް އިތުރުވާކަން ފާހަގަކުރެވިފައިވާކަމަށް ގާޒީ މާހިރު ވިދާޅުވިއެވެ.

ދަރިންނަކީ މައިންބަފައިންނަށް ލޯތްބާއި އަޅާލުމާއި، ހިމާޔަތާއި އަމާންކަމާއި ލޮލަށް ފިނިކަން ގެނުވާ ބަޔަކަށް ވާންޖެހުނުނަމަވެސް ބައެއް އާއިލާތަކުގައި މައިންބަފައިންގެ ހިތުގައި އަޅަމުންދާ ވޭން ކޯޓުގައި އެމައިންބަފައިން އަޅާ ކަރުނައިން ފާޅުވާކަން ގާޒީ އިބްރާހިމް މާހިރު ފާހަގަކުރެއްވިއެވެ.