އުރުގުއޭގެ ކޯޗުކަމާ ބިއެލްސާ ހަވާލުވެއްޖެ

އުރުގުއޭ ގައުމީ ފުޓުބޯޅަ ޓީމުގެ ކޯޗަކަށް އާޖެންޓީނާގެ މާސެލޯ ބިއެލްސާ ހަމަޖައްސައިފި އެވެ.

އުމުރުން 67 އަހަރުގެ ތަޖުރިބާކާރު ކޯޗު އެންމެ ފަހުން ހުރީ އިނގިރޭސި ޕްރިމިއާ ލީގުގެ ލީޑްސް ޔުނައިޓެޑުގެ ކޯޗުގެ މަގާމުގައެވެ. އެހެންނަމަވެސް، އޭނާއާއެކު އެ ޓީމުގެ ނަތީޖާތައް ދަށްވުމުގެ ސަބަބުން ލީޑްސްއިން ވަނީ ފެބްރުވަރީ މަހު ބިއެލްސާ މަގާމުން ވަކިކޮށްފައެވެ. އޭގެ ފަހުން މިހާތަނަށް އޭނާ ހުރީ އެއްވެސް ވަޒީފާއެއް ނެތިއެވެ.

އުރުގުއޭގެ ކޯޗުކަމުގައި އެންމެ ފަހުން ހުރީ ޑިއޭގޯ އަލޮންސޯއެވެ. އެހެންނަމަވެސް މިދިޔަ އަހަރު ގަތަރުގައި ނިމުނު ފީފާ ވޯލްޑް ކަޕަށްފަހު އޭނާ ވަނީ މަގާމުން ވަކިކޮށްފައެވެ. ހޯމަ ދުވަހު އެ ޤައުމުގެ ފުޓުބޯޅަ އިދާރާ އިން ހާމަކޮށްފައިވާ ގޮތުގައި ބިއެލްސާ އުރުގުއޭ ޤައުމީ ޓީމުގެ ކޯޗުކަމާ ހަވާލުވީ 2026 ވަނަ އަހަރުގެ ނިޔަލަށެވެ. ރަސްމީކޮށް އުރުގުއޭ ކޯޗުގެ ގޮތުގެ ބިއެލްސާ ތައާރަފު ކުރުމާއި، ނޫސްވެރިންނާ އޭނާ ބައްދަލު ކުރުން ބުދަ ދުވަހު އޮންނާނެ ކަމަށް އެ ޤައުމުގެ މީޑިއާތަކުގައި ވަނީ ބުނެފަ އެވެ.

ބިއެލްސާ އޭނާގެ ކޯޗިން ކެރިއަރު ފެށީ 1982 ވަނަ އަހަރު އެވެ. އޭގެ ފަހުން އޭނާ ވަނީ މިހާތަނަށް އެކި ޓީމުތަކަށް އިރުޝާދު ދީފައެވެ. އުރުގުއޭ ވާނީ ބިއެލްސާ ހަވާލުވާނެ ދެވަނަ ގައުމީ ޓީމަށެވެ. މީގެ ކުރިން ވަނީ 1998ން 2004 ވަނަ އަހަރަށް އަމިއްލަ ގައުމުކަމަށްވާ އާޖެންޓީނާއަށް އިރުޝާދު ދީފަ އެވެ. އޭގެ ފަހުން އެ ގައުމުގެ 23 އަހަރުން ދަށުގެ ޓީމާވެސް ހަވާލުވި އެވެ. އެއަށްފަހު 2007 ވަނަ އަހަރުން 2011 ވަނަ އަހަރަށް ވަނީ ޗިލީގެ ގައުމީ ޓީމަށްވެސް އިރުޝާދު ދީފަ އެވެ. ބިއެލްސާ އިރުޝާދު ދިން ކުލަބުތަކުގެ ތެރޭގައި އެތުލެޓިކް ބިލްބާއޯ، އެސްޕަންޔޯލް، މާސޭ، ލީލް އަދި ލީޑްސް ޔުނައިޓެޑުވެސް ހިމެނެ އެވެ.