ޑްރޯން ބޭނުންކޮށްގެން އައްސޭރި ޖަލަށް މަސްތުވާތަކެތި ވައްދަން އުޅެނިކޮށް ފަޅާއަރައިފި
އަތުލައިގަތީ ފަސް ބުލެޓަށް އަޅާފައި ހުރި، 29 ގްރާމުގެ މަސްތުވާތަކެއްޗާއި ފަސް ސިމް ކާޑު
އައްސޭރި ޖަލަށް ވައްދަން މަސައްކަތްކުރި ތަކެތި
ޑްރޯނެއް ބޭނުންކޮށްގެން އައްސޭރި ޖަލަށް މަސްތުވާތަކެއްޗާއި ސިމް ކާޑުތަކެއް ވައްދަނިކޮށް ފަޅާއަރައިފިއެވެ.
މިކަމާގުޅިގެން ކޮމިޝަނަރ އޮފް ޕްރިޒަންސް އަހުމަދު މުހައްމަދު ފުޅު ކުރެއްވި ޓްވީޓެއްގައި ވިދާޅުވީ، ޖަލަށް މަނާ ތަކެތި ވައްދަން އުޅުނު ޑްރޯން ވައްޓާލައި ވައްދަން އުޅުނު ތަކެތި ހޯދާފައިވާކަމަށެވެ.
ސީޕީ މިކަން ހާމަކުރައްވައި ކުރެއްވި ޓްވީޓްގައި އާންމުކުރައްވާފައިވާ ފޮޓޯތަކަށް ބަލާއިރު، ޖަލަށް މިތަކެތި ވައްދަން އުޅުނީ ޑްރޯނެއްގައި ކަންވާރަކާއި ބުޅިއެއް އައްސައިގެންނެވެ. ބުޅީގައި އަޅުވާފައި އޮތީ ޔޯގަޓް ފުޅިއެކެވެ. އެތަކެތި ލާފައިވަނީ ޔޯގަޓް ފުޅީގެ އެތެރެއަށެވެ.
ސީޕީ ވިދާޅުވީ، އަތުލައިގަތީ ފަސް ބުލެޓަށް އަޅާފައި ހުރި 29 ގްރާމުގެ މަސްތުވާތަކެއްޗާއި ފަސް ސިމް ކާޑު ކަމަށެވެ.
އައްސޭރި ޖަލަށް މަސްތުވާތަކެތި ވައްދަން އުޅެނިކޮށް ތަކެއްޗާއެކު މިދިޔަ ހުކުރު ދުވަހު ޖަލު އޮފިސަރަކުވެސް ވަނީ އަތުލައިގެންފައެވެ.
