ދިވެހި ޕްރިމިއާ ލީގުގައި ކުލަބު ވެލެންސިއާއާ ދެކޮޅަށް ކުޅުނު މެޗުން މޮޅުވެ ކުލަބު އީގަލްސް އިން، އެ ޓީމުގެ ދެ ވަނަ މެޗު ވެސް ކާމިޔާބުކޮށް އިތުބާރު ހިފަހައްޓައިފި އެވެ.

މުބާރާތުގައި އީގަލްސް ކުޅުނު ފުރަތަމަ މެޗު ވެސް އެ ޓީމު ވަނީ ކާމިޔާބުކޮށްފަ އެވެ. ނަމަވެސް ވެލެންސިއާ އިން އެ ޓީމު ކުޅުނު ފުރަތަމަ މެޗުން ވަނީ ބަލިވެފަ އެވެ. ވެލެންސިއާ އިން ސީޒަަނަށް ކުރިމަތިލީ ޓީމުގައި ގިނަ ޒުވާން ކުޅުންތެރިން ހިމަނައިގެންނެވެ.

ގަލޮޅު ރަސްމީ ދަނޑުގައި އާދީއްތަ ދުވަހުގެ ރޭ ކުޅުނު މެޗު އީގަލްސް އިން ކާމިޔާބުކުރީ 3-0 އިންނެވެ. މެޗު ފަށައިގެން ރަނގަޅަށް ކުޅެމުން އައީ ވެލެންސިއާ އެވެ. ނަމަވެސް ދެ ޓީމަށް ވެސް ވަނީ ރަނގަޅު ފުރުސަތުތަކެއް ލިބިފަ އެވެ. އީގަލްސްގެ ކެޕްޓަން އަޙުމަދު ރިޒުވާން (ރިޒޭ) އާއި ބިދޭސީ ކުޅުންތެރިޔާ އިވާން ކާލޮސް އަށް ވަނީ ރަނގަޅު ދެ ފުރުސަތެއް ލިބިފަ އެވެ. ބޮލުން ރިޒޭ ފޮނުވާލި ބޯޅަ ވެލެންސިއާގެ ގޯލް ކީޕަރު އާދަމް އިމްއާން މަތަކުރިއިރު، އިވާން ބޮލުން ފޮނުވާލި ބޯޅަ ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ. ފުރަތަމަ ހާފުގެ 43 ވަނަ މިނެޓުގައި އީގަލްސް އަށް ލީޑު ނަަގައިދިނީ އިވާން އެވެ.

ދެ ވަނަ ހާފު ފަށައިގެން ފުރަތަމަ ހާފެކޭ އެއް ގޮތަށް ވެލެންސިއާ އިން ވަނީ ހަމަލާތަކެއް އުފެއްދުމަށް މަސައްކަތްކޮށްފަ އެވެ. ހާފުގެ ކުރީ ކޮޅު ވެލެންސިއާގެ ޢަބްދުﷲ ޔާމީން (ޔާނު) ވަނީ ނުރައްކާތެރު ބޯޅައެއް ފޮނުވާލައިފަ އެވެ. އީގަލްސްގެ އޭރިޔާ ބޭރުން އޭނާ ފޮނުވާލި ބޯޅަ އީގަލްސްގެ ގޯލް ކީޕަރު ޙަސަން އަލީފް އިބްރާހީމް ވަނީ އަތުން ޖައްސައި ކޯނަރަކަށް ބޭރުކޮށްލައިފަ އެވެ. އޭގެ ފަހުން އީގަލްސްގެ ރިޒޭ އަށް ލިބުނު ފުރުސަތުގައި އޭނާ ފޮނުވާލި ބޯޅަ ދިޔައީ ވެލެންސިއާ ގޯލުގެ އަރިމަތީ ދަނޑި ކައިރިން ބޭރަށެވެ. މެޗުގެ 61 ވަނަ މިނެޓުގައި ވެލެންސިއާގެ އޭރިޔާ ތެރެއިން ލިބުނު ފުރުސަތެއްގައި އީގަލްސްގެ އިބްރާހީމް މަހުދީ ޙުސެއިން (ފޭދޫ އިއްބެ) ފޮނުވާލި ބޯޅަ ވެލެންސިއާގެ ގޯލް ކީޕަރު އިމްއާން ވަނީ މަތަކޮށްފަ އެވެ.

އީގަލްސް އަށް ލީޑު ފުޅާކޮށްދިނީ ކެޕްޓަން ރިޒޭ އެވެ. 64 ވަނަ މިނެޓުގައި ރިޒޭ އެ ލަނޑު ޖެހީ ލިބުނު ޕެނަލްޓީ ގޯލަށް ވައްދާލައިގެންނެވެ. އީގަލްސްގެ ތިން ވަނަ ލަނޑު މެޗުގެ 84 ވަނަ މިނެޓުގައި ޖެހީ، ފޭދޫ އިއްބެ އެވެ. މެޗުގެ ފުރަތަމަ ހާފުގައި ވެލެންސިއާ އިން ރަނގަޅަށް ކުޅުނު ނަމަވެސް، ފަހު ހާފުގައި އެ ޓީމަށް ވަނީ ވަރުބަލިކަމުގެ މައްސަލަ ދިމާވެފަ އެވެ.

މޮޅާއެކު އީގަލްސް އިން ވަނީ ކުޅުނު ދެ މެޗުން ހަ ޕޮއިންޓު ހޯދައިފަ އެވެ. އެ ޓީމުގެ އިތުރުން އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އަދި ސުޕަ ޔުނައިޓެޑު ސްޕޯޓްސް (ސަސް) ވެސް ވަނީ ކުޅުނު ދެ މެޗު ކާމިޔާބުކޮށް، ހަ ޕޮއިންޓު ހޯދައިފަ އެވެ. އީގަލްްސް އަތުން ބަލިވި ވެލެންސިއާ އަށް ޕޮއިންޓެއް ލިބިފައިނުވާއިރު، އެ ޓީމަށް ލަނޑެއް ވެސް ޖެހިފައެއް ނުވެ އެވެ.