މުވައްޒަފުން ތަމްރީނުކުރުމަށް 30 މިލިއަން ރުފިޔާގެ ބަޖެޓެއް ފާސްކޮށްފައިވާނެ: އެމްޓީސީސީ
16،900 ގަޑިއިރުގެ ތަމްރީނު އެމްޓީސީސީގެ މުވައްޒަފުންނަށް ދީފައިވޭ
އެމްޓީސީސީގެ ސީއީއޯ އާދަމް އާޒިމް
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގައި މަސައްކަތްކުރާ މުވައްޒަފުންނަކީ ގާބިލް ބަޔަކަށް ހެދުމަށް 30 މިލިއަން ރުފިޔާގެ ބަޖެޓެއް ފާސްކޮށްފައިވާކަމަށް އެކުންފުނީގެ ސީއީއޯ އާދަމް އާޒިމް ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުން އާޒިމް ވިދާޅުވީ އެންމެ ބޮޑު ސަމާލުކަމެއް ދެއްވަނީ އެކުގައި މަސައްކަތްކުރާ މީހުން ކުރިއެރުވުމަށް ކަމަށެވެ. މިގޮތުން 16،900 ގަޑިއިރުގެ ތަމްރީނު އެމްޓީސީސީގެ މުވައްޒަފުންނަށް ދީފައިވާނެކަން ފާހަގަކުރެއްވިއެވެ.
މީގެ އިތުރުން އެކި ދާއިރާތަކުން މީހުން ތަމްރީނުކުރުމަށް ކުރަމުންދާ މަސައްކަތުގެ ތެރެއިން 2021 އަދި 2022 ވަނަ އަހަރު 50 ސްކޮލަރޝިޕެއްގެ ދަށުން ޔޫރަޕުގެ ގައުމުތަކުން މުވައްޒަފުން ތަމްރީނުކޮށްފައިވާކަމަށް އާޒިމް ވިދާޅުވިއެވެ. މިއީ ޓެކްނިކަލް ދާއިރާތަކުން މީހުން ތަމްރީނުކުރުމުގެ ސްކޮލަރޝިޕްތަކެއް ކަމަށާއި، ޓެކްނިކަލް ޓީމު ވަރުގަދަނުކޮށް އެމްޓީސީސީ ފަދަ ކުންފުންޏެއް އިތުރަށް ތަރައްގީ ނުކުރެވޭނެ ކަމަށް އާޒިމް ވިދާޅުވިއެވެ.
އެމްޓީސީސީގައި މަސައްކަތްކުރާ ޓީމު ވަރުގަދަކުރުމަށް އެކުންފުނީގެ ބޯޑުން ދޭ އެއްބާރުލުން އާޒިމް ފާހަގަކުރެއްވިއެވެ. މިގޮތުން މުވައްޒަފުން ތަމްރީނުކުރުމަށް 30 މިލިއަން ރުފިޔާގެ ބަޖެޓެއް ފާސްކޮށްފައިވާ ކަމަށާއި، ކޮންމެ އަހަރަކުވެސް މަސައްކަތްކުރަމުންދަނީ އެވަރުގެ ބަޖެޓެއްގައި ކަމަށް އާޒިމް ވިދާޅުވިއެވެ. މި ތަމްރީނުތަކުގެ ނަތީޖާއެއްގެ ގޮތުން ކުންފުނީގެ އާމްދަނީ އިތުރުވެގެންދާ ކަމަށާއިި، މިއީ ކުންފުނީގެ ކުރިމަގަށް ކުރެވޭ މަސައްކަތެއް ކަމަށް އާޒިމް ވިދާޅުވިއެވެ.
އާޒިމް ވިދާޅުވީ ފާއިތުވި 4 އަހަރުވެސް އެ ކުންފުންޏަށް ބޮޑު ފައިދާއެއް ވެފައިވާކަމަށެވެ. މި ހުރިހާ ކަމެއްވެސް ބިނާވަނީ މުވައްޒަފުންނަށް ދެވޭ ތަމްރީނަށް ކަމަށާއި، ކުރިއަށްއޮތްތަނުގައިވެސް ރައީސްގެ އިރުޝާދާ އެއްގޮތަށް އެމްޓީސީސީގެ ކަންކަން ކުރިއަށްގެންދާނެ ކަމަށް އާޒިމް ވިދާޅުވިއެވެ.
