މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ހިޔާނާތުގެ މައްސަލާގައި ކުރީގެ ނާއިބުރައީސް އަހުމަދު އަދީބުގެ މައްޗަށް ކުރި ދެ މިލިއަން ރުފިޔާގެ ޖޫރިމަނާ ހޯދަން ދައުލަތުން ދައުވާކޮށްފިއެވެ.
އަދީބުގެ މައްޗަށް 20 އަހަރުގެ ޖަލު ހުކުމެއް އިއްވައި، ދެ މިލިއަން ރުފިޔާއިން ޖޫރިމަނާ ކޮށްފައި ވަނީ އެމްއެމްޕީއާރްސީގެ ބޮޑު ހިޔާނާތުގެ މައްސަލާގައި އޭނާގެ މައްޗަށް ދައުލަތުން އުފުލި ހަތް ދައުވާއަކަށް އިއުތިރާފު ވެވަޑައިގަތުމުންނެވެ.
އެޓަރނީ ޖެނެރަލް (އޭޖީ) އޮފީހުގެ އޮފިޝަލަކު ވަނީ، މިއީ ކްރިމިނަލް ކޯޓުގެ ހުކުމްގެ ދަށުން އަދީބު ދައްކަން ޖެހޭ ފައިސާ ކަމަށާއި، ސިވިލް ކޯޓަށް އަދީބުގެ ދެ މައްސަލަ ހުށަހަޅާފައިވާ ކަމަށް ވިދާޅުވެފައެވެ.
އަދީބުގެ މައްޗަށް ކުރި ދައުވާތަކާއި އަދަބުތައް:
ޚިޔާނާތްތެރިވުމުގައި ބައިވެރިވުން: 4 އަހަރާއި 9 މަހާއި 18 ދުވަހަށް ޖަލަށް
ޚިޔާނާތްތެރިވުމުގައި ބައިވެރިވުން: 2 އަހަރާއި 4 މަހާއި 24 ދުވަހަށް ޖަލަށްލުން
މަޤާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދައިދިނުން: 6 މަސް ދުވަހަށް ޖަލަށްލުން
ރަސްމީ ހައިސިއްޔަތު ނަހަމަ ގޮތުގައި ބޭނުންކުރުން: 3 މަހަށް ޖަލަށްލުން
މަނީ ލޯންޑަރ ކުރުން: 5 އަހަރާއި 11 މަހާއި 21 ދުވަހަށް ޖަލަށްލުމާއެކު 1 މިލިއަން ރުފިޔާއިން ޖޫރިމަނާ ކުރުން
މަޤާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދައިދިނުން: 1 މަހާއި 15 ދުވަހަށް ޖަލަށްލުން
މަނީ ލޯންޑަރ ކުރުން: 5 އަހަރާއި 11 މަހާއި 21 ދުވަހަށް ޖަލަށްލުމާއެކު 1 މިލިއަން ރުފިޔާއިން ޖޫރިމަނާ ކުރުން.
މަނީ ލޯންޑަރިންގެ ދެ ދައުވާއާ ގުޅިގެން އަދީބު ދެ މިލިއަން ރުފިޔާއިން ޖޫރިމަނާ ކޮށްފައިވާތީ، އެފައިސާ، 5 އޮކްޓޯބަރު 2020 ފެށިގެން އެއް މަސްދުވަހުގެ ތެރޭގައި މޯލްޑިވްސް އިންލަންޑް ރެވެނިއު އޮތޯރިޓީ (މީރާ)އަށް ދައްކައި ހަލާސް ކުރުމަށްވެސް ހުކުމުގައި ބުނެފައިވެއެވެ.
