ކަނޑުމަތީގެ ހާދިސާތައް އެންމެ ގިނައިން ހިނގަނީ އިންޖީނު ހުއްޓިގެންނާއި ފަރަށް އަރައިގެން

ވޭތުވެދިޔަ ހުރިހާ އަހަރެއްގައި އެންމެ ގިނައިން ރިޕޯޓުކޮށްފައިވަނީ ފަރަށް އެރުމާއި، އުޅަނދުގެ އިންޖީނުގެ ހުއްޓިގެން ހިނގާ ހާދިސާތައް ކަމަށް ކޯސްޓްގަރޑުން ބުނެފިއެވެ.

ރާއްޖެޓީވީގެ ފަސްކާފު ޕްރޮގްރާމްގައި ވާހަކަ ދައްކަވަމުން ސަރޖަންޓް ފަސްޓް ކްލާސް އިބްރާހިމް ދީދީ ވިދާޅުވީ މޫސުން ގޯސް ދުވަސްވަރު ކަނޑުމަތީގެ ހާދިސާތައް ހިނގާ މިންވަރު ވަރަށް ބޮޑަށް އިތުރުވާ ކަމަށެވެ.

Advertisement

ކަނޑުމަތީގެ ހާދިސާތަކަށް ބަލާއިރު، އުޅަނދުގެ އިންޖީނަށް މައްސަލައެއް ދިމާވެގެން ހިނގާ ހާދިސާ އަދި ފަރަށް އަރައިގެން ހިނގާ ހާދިސާތައް އިތުރު ކަމަށެވެ. އަދި ވިދާޅުވީ މެނުއަލް ފެއިލިއަރ އެއްގެ ސަބަބުން ވެސް ބޮޑެތި ހާދިސާތައް ހިނގާފައިވާ ކަަމަށެވެ.

ކޮންމެ އަހަރަކު ވެސް ރިޕޯޓު ކުރެވޭ ހާދިސާތަކަށް އިޝާރާތް ކުރައްވައި މޭޖަރ މުހައްމަދު ނައީމް ވިދާޅުވީ ފަރަށް އަރައިގެން ރިޕޯޓު ކުރާ ހާދިސާތައް ގިނަ ކަމަށެވެ. އެގޮތުން މިއަހަރުގެ މާޗް މަހާ ހިސާބަށް ވެސް އެންމެ ގިނައިން ރިޕޯޓު ކޮށްފައިވަނީ އުޅަނދު ފަރަށް އެރުމުގެ ހާދިސާތައް ކަމަށް އޭނާ ވިދާޅުވިއެވެ.

މީގެ އިތުރުން މެރިން ޕޮލިސްގެ ފަރާތުން ސަބް އިންސްޕެކްޓަރ ޒަހީރު އީސަ ވެސް ވަނީ ޕްރޮގްރާމްގައި ބައިވެރިވެވަޑައިގެން ފުލުހުންނަށް ރިޕޯޓުކުރެވޭ ކަނޑުމަތީގެ ހާދިސާތަކުގެ މައުލޫމާތު ހިއްސާކޮށްދެއްވާފައެވެ.

ޒަހީރު ވިދާޅުވީ މިއަހަރު ވެސް ކަނޑުމަތީގެ ހާދިސާތައް ވަރަށް ގިނަ ކަމަށެވެ. އެގޮތުން މިހާތަނަށް އައިރު ވަރަށް ހިތާމަވެރި ތަފާތު އެކްސިޑެންޓްތަކާއި، ހާދިސާތައް ހިނގައިގެން ރިޕޯޓުކޮށްފައިވާ ކަމަށެވެ. ބައެއް ހާދިސާތަކުގައި މީހުންގެ ފުރާނަ ގޮސްފައިވާކަން އޭނާ ފާހަގަކުރެއްވިއެވެ.

ޒަހީރު ވިދާޅުވީ މިއަހަރުގެ މިހާތަނަށް އައިރު ކަނޑުމަތީގެ ގާތްގަނޑަކަށް 54 ހާދިސާއެއް ހިނގައިގެން ރިޕޯޓުކޮށްފައިވާ ކަމަށެވެ.

މީގެ އިތުރުން ޒަހީރު ވިދާޅުވީ ރިޕޯޓުކޮށްފައިވާ ގިނަ ހާދިސާތަކަށް ބަލާއިރު، ވަރަށް ބޮޑަށް އިހުމާލުވުމާއި، ފަރުވާ ކުޑަވުމުގެ ސަބަބުން ހިނގާފައިވާ ހަދިސާތައް ފާހަގަކުރެވޭ ކަމަށެވެ.

ހުޅަނގު މޫސުމާ ގުޅިގެން ރާއްޖޭގެ މޫސުން ގޯސްވެފައިވާއިރު، ކަނޑުދަތުރުކުރާ ފަރާތްތަކުން ޚާއްސަކޮށް މޫސުމަށް ސަމާލުވުމަށް މެރިން ޕޮލިސް އަދި ކޯސްޓްގަރޑުން ވަނީ އިލްތިމާސްކޮށްފައެވެ.