ޖަންބޯ ދޯނީގައި ދަތުރުކުރި ދެ މީހުން ފެނިއްޖެ، ހާލު ރަނގަޅު: އެމްއެންޑީއެފް
12 މެއި 2023 | ހުކުރު 06:42ދޯންޏާ ގުޅޭ އިތުރު މައުލޫމާތެއް އަދި ހާމައެއް ނުކުރޭ
ޖަންބޯ ދޯނި
ބުރާސްފަތި ދުވަހު ހެނދުނު 10:40 ހާއިރު ކ.ގާފަރުން ފުރައިގެން ބ.ދަރަވަންދޫއަށް ދަތުރުކުރި "ޖަންބޯ" ދޯނިން ދަތުރު ކުރި ދެ މީހުން ފެނިއްޖެ ކަމަށް އެމްއެންޑީއެފުން ބުނެފިއެވެ.
ޖަންބޯ ދޯނީގެ ޚަބަރެއް ނުވެގެން ބުރާސްފަތި ދުވަހު އެމްއެންޑީއެފްގެ ކޯސްޓްގާޑުން ވަނީ އެ ދޯނި ހޯދުމުގެ މަސައްކަތް ފަށައިފައެވެ. އެގޮތުން، ހިލަވެލި ބަރުކޮށްގެން މާލެއިން ފުރައިގެން ކ.ގާފަރުގައި މަޑުކުރުމަށްފަހު، ފުރާފައިވާ އެ ދޯނީގެ ޚަބަރެއް އެންމެފަހުން ވެފައިވަނީ ބުރާސްފަތި ދުވަހުގެ މެންދުރު 11:35 ހާއިރުކަމަށް އެމްއެންޑީއެފުން ބުންޏެވެ.
މި ދޯނިން ދެ މީހަކު ދަތުރު ކުރި ކަމަށް އެމްއެންޑީއެފުން ބުނެފައިވާއިރު އެ މީހުން ފެނުނީ ސްޕީޑް ލޯންޗަކަށް ކަމަށް އެ އިދާރާއިން ބުންޏެވެ. ދެ މީހުންގެ ވެސް ހާލު ރަނގަޅު ކަމަށް މައުލޫމާތު ލިބިފައިވާ ކަމަށް ވެސް އެ އިދާރާއިން ބުންޏެވެ.
ޖަންބޯ ދޯނިން ދަތުރު ކުރި ދެ މީހުން ފެނިފައިވީ ނަމަވެސް ދޯންޏަށް ވީގޮތެއް އަދި އެމްއެންޑީއެފުން ހާމައެއް ނުކުރެއެވެ.
"ޖަންބޯ" ދޯންޏަކީ ދިގުމިނުގައި 65 ފޫޓު ހުންނަ ދޯންޏެއްކަމަށް އެމްްއެންޑީއެފް ކޯސްޓްގާޑަށް ވަނީ މަޢުލޫމާތު ލިބިފައެވެ. އަދި ބުރާސްފަތި ދުވަހުގެ 13:00 އާއި 13:30 ދެމެދުގެ ވަގުތެއްގައި އެ ދޯންޏާއި ވަަށްތަރު ދޯންޏެއްކަމަށްލަފާ ކުރެވޭ ދޯންޏެއް ކާށިދޫގެ ހުޅަނގު އުތުރުން ގާތްގަނޑަކަށް 6 މޭލުބޭރުން ފެނުނު ކަމަށް އެސަރަހައްދުން ދަތުރުކުރި ދޯންޏަކުން ބުރާސްފަތި ދުވަހުގެ ރޭގެ ވަގުތެއްގައި ކޯސްޓްގާޑަށް މައުލޫމާތު ދީފައިވާ ކަމަށް އެމްއެންޑީއެފުން ބުންޏެވެ.
މި ދޯނި ފުރިފަހުން ޚަބަރެއް ނުވެގެން އެމްއެންޑީއެފް ކޯސްޓްގާޑްގެ މެރިޓައިމް ރެސްކިއު ކޯޑިނޭޝަން ސެންޓަރ (އެމްއާރުސީސީ) ރިޕޯޓްކޮށްފައި ވަނީ ބުރާސްފަތި ދުވަހުގެ ހަވީރު 18:03 ހާއިރުއެވެ.
