ރޯމާ ފައިނަލާ ގާތަށް، ޔުވެންޓަސް އާއި ސެވިއްޔާ ހަމަހަމަ

ބަޔާން ލެވަކޫސަން ބަލިކޮށް، ޔޫރޮޕާ ލީގުގެ ފައިނަލާ ގާތަށް ރޯމާ ޖެހިލިއިރު ޔުވެންޓަސް އާއި ސެވިއްޔާގެ މެޗު ހަމަހަމަވެގެން ނިމިއްޖެ އެވެ.

މިހެންވެ ފައިނަލަށް ދިއުމަށް ސެވިއްޔާގެ ދަނޑުގައި ކުޅޭ މެޗުގެ ވާދަވެރިކަން ވަރަށް ބޮޑުވާނެ އެވެ.

ޔުވެންޓަސް ކޮޅަށް ސެވިއްޔާގެ ގޯލު ޖެހީ މެޗުގެ 26 ވަނަ މިނެޓުގައި ޔޫސުފް އެން ނަސީރީ އެވެ. ނަތީޖާ ހަމަހަމަކޮށްދިން ލަނޑު ޕައުލް ޕޮގްބާ ޔުވެންޓަސް އަށް ޖަހައިދިނީ މެޗުގެ އިތުރު ވަގުތުގެ ހަތް ވަނަ މިނެޓުގަ އެވެ. މި މެޗުގައި ސެވިއްޔާ އަސްވުރެ މޮޅަށް ކުޅުނީ ޔުވެންޓަސް އެވެ. ނަމަވެސް ހަ ފަހަރު މުބާރާތް ކާމިޔާބުކޮށް އެންމެ ކާމިޔާބު ޓީމުގެ އޮތުގައި އޮތް ސެވިއްޔާގެ އަމިއްލަ ދަނޑުގައި ފަހު ލެގު ކުޅެން ޖެހުމަކީ އެޓީމަށް އޮތް އެޑްވާންޓޭޖެކެވެ.

ފައިނަލަށް ދިއުމުގެ ފުރުސަތު ހޯސޭ މޮރީނިއޯގެ ރޯމާ ތަނަވަސްކުރީ ޖަރުމަނުގެ ބަޔާން ލެވަކޫސަން 1-0އިން ބަލިކޮށްފަ އެވެ. މެޗުގެ ހަމައެކަނި ލަނޑު ޖެހީ 62 ވަނަ މިނެޓުގައި އެޑުއާޑޯ ބޯވް އެވެ.

މޮރީނިއޯގެ އިރުޝާދުގެ ދަށުންރެއާލް މެޑްރިޑަށް ތިން ސީޒަނެއްގައި ކުޅުނު ޒަބީ އަލޮންސޯ ކޯޗުކޮށްދިން ލެވަކޫސަން ވަނީ މެޗު ފަށައިގެން ރަނގަޅު ދެ ފުރުސަތު ހޯދައިފަ އެވެ. ނަމަވެސް އޭގެ ފަހުން ރޯމާ މެޗު ކޮންޓްރޯލްކޮށް ރަނގަޅު ފުރުސަތުތަކެއް ހޯދި އެވެ.

މެޗަށް ފަހު ރޯމާގެ ކޯޗު މޮރީނިއޯ ބުނީ މޮޅުވީ ކުޅުންތެރިން އެކަމަށް ބޭނުންވެފައިތިބުމުން ކަމަށާއި މެޗަކީ ވަރަށް އުނދަގޫވި މެޗެއް ކަމަށެވެ.

އެންމެ ފަހުގެ ކޮންފަރެންސް ލީގުގެ ޗެމްޕިއަނުންގެ ގޮތުގައި ޔޫރޮޕާ ލީގުގައި ކުޅެމުން އަންނަ ރޯމާ އަށް ފައިނަލަށް ދިއުމަށް އެޑްވާންޓޭޖް އޮތް ނަމަވެސް ފަހު މެޗު ކުޅޭނީ ލަވަކޫސަންގެ ދަނޑުގަ އެވެ.