ރައީސް ސާލިހުގެ ސަރުކާރަކީ ގައުމުތަކާއެކު ގުޅުން ބަދަހިކުރަމުންދާ ސަރުކާރެއް
ރައީސް އޮފީހުގެ ތަރުޖަމާނު، މިއުވާން މުހައްމަދު
ކޮސޯވޯއަކީ މިނިވަން ގައުމެއްގެ ގޮތުގައި މިހާރު ދިވެހިރާއްޖެއިން ނުބަލާކަމަށް ދެކެވޭ ވާހަކަތައް ސަރުކާރުން ދޮގުކޮށްފިއެވެ.
ބުރާސްފަތި ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރާއްޖެއެމްވީން ދެންނެވި ސުވާލަކަށް ޖަވާބުދެއްވަމުން ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ، ކޮސޯވޯއަކީ މިނިވަން ގައުމެއްގެ ގޮތުގައި މިހާރު ރާއްޖެއިން ނުބަލާކަމަށް ދެކެވޭ ވާހަކައަކީ ކަނޑައެޅިގެން ދޮގެއް ކަމަށާއި، ކޮސޯވޯގެ މިނިވަންކަން ގަބޫލުނުކުރުމަށް ނިންމާފައި ނުވާކަމަށެވެ.
ރައީސް އިބްރާހީމް މުހައްމަދު ސާލިހުގެ ސަރުކާރަކީ ގައުމުތަކާއެކު ގުޅުން ބަދަހިކުރަމުންދާ ސަރުކާރެއްކަން ފާހަގަކުރައްވައި މިއުވާން ވިދާޅުވީ، މިސަރުކާރުން އެއްގައުމާއެކު އޮންނަ ގުޅުން ބަދަހިކޮށްފައި އަނެއް ގައުމާ އޮންނަ ގުޅުން ކުޑަ ނުކުރާނެ ކަމަށެވެ. މިއުވާން ވިދާޅުވީ ސަރުކާރުގެ ހާރިޖީ ސިޔާސަތުގެ ކާމިޔާބީ ދުނިޔޭގެ އެކި ގައުމުތަކުން ފެންނަމުންދާ ކަމަށެވެ. އަދި ތަފާތު ހިޔާލުތަކުގެ ދެ ގައުމާއެކު ވެސް މަސައްކަތްކުރަމުން ދާނީ ބައިނަލްއަގުވާމީ ހަމަތަކުގެ މަތިން ކަމަށް މިއުވާން ވިދާޅުވިއެވެ.
2007 ވަނަ އަހަރު ކޮސޯވޯގެ މިނިވަންކަން އިއުލާންކޮށްފައިވާއިރު، ރާއްޖެއިން ކޮސޯވޯގެ މިނިވަންކަން ބަލައިގަތީ 2008 ވަނަ އަހަރުގެ ތެރޭގައެވެ. ރާއްޖެއަކީ ކޮސޯވޯގެ މިނިވަންކަން ބަލައިގަތް 55 ވަނަ ގައުމެވެ. މިހާރު ގިނަ ގައުމުތަކުން ކޮސޯވޯގެ މިނިވަންކަން ބަލައިގަނެއެވެ. ނަމަވެސް ސާބިއާއިން ދެކެނީ އަދިވެސް ކޮސޯވޯއަކީ އެ ގައުމުގެ ޕްރޮވިންސެއްގެ ގޮތުގައެވެ.
